ശ്രീ നാഗരുദ്ര ? ???? ഏഴാം ഭാഗം – [Santhosh Nair] 1046

ആമാടപ്പെട്ടിയുടെ അടുത്തു ചെന്നു അതിനടുത്തു ചമ്രം പടഞ്ഞു ഇരുന്നശേഷം അതിൽ തൊട്ടു വന്ദിച്ചു. പിന്നീടു ഗുരു കാരണവന്മാരെയും ശ്രീമൻ നാരായണനെയും മനസ്സിലോർത്തുകൊണ്ടു അൽപനേരം ധ്യാനിച്ച ശേഷം അതിന്റെ മുകളിൽ കൈ വെച്ചു നെഞ്ചോടു ചേർത്തു.

എന്നിട്ടു ഹരേ കൃഷ്ണ മന്ത്രം പതിനാറു പ്രാവശ്യം ചൊല്ലി –
ഹരേ കൃഷ്ണ ഹരേ കൃഷ്ണ കൃഷ്ണ കൃഷ്ണ ഹരേ ഹരേ
ഹരേ രാമ ഹരേ രാമ രാമ രാമ ഹരേ ഹരേ

പിന്നീടു വീണ്ടും വന്ദിച്ച ശേഷം ആ പെട്ടി തുറന്നു. ആദ്യം കണ്ടത് കുറെ ഡോകുമെന്റുകൾ ആണ്. മുദ്ര പത്രങ്ങളും ആധാരങ്ങളും ബോണ്ട് പേപ്പറുകളും ബാങ്ക് പാസ് ബുക്കുകളും ഒക്കെ. അവയോരോന്നും പ്രത്യേകം എടുത്തു നോക്കി. താഴെ ഒരരികിൽ വെച്ചു.

പിന്നീട് കണ്ടതു ചില ജനന സർട്ടിഫിക്കറ്റുകളും മരണ സർട്ടിഫിക്കറ്റുകളും വിവാഹ സർട്ടിഫിക്കറ്റുകളും അങ്ങനെ എന്തൊക്കെയോ ഉണ്ടായിരുന്നു. കൂടാതെ ചില വിവാഹ ഫോട്ടോകളും ഒക്കെ ഉണ്ടായിരുന്നു. കൂടാതെ തന്റെ മുഖ സാമ്യമുള്ള ചില ആണുങ്ങളുടെയും മറ്റും ഫോട്ടോസ് അവനെ അത്ഭുതപ്പെടുത്തി. അതിനിടയിൽ അവന്റെ അച്ഛന്റെയും അമ്മയുടെയും കല്യാണ ഫോട്ടോയും മാര്യേജ് സർട്ടിഫിക്കറ്റും അവൻ കണ്ടു. അതിനടിയിൽ തന്നെ അവന്റെയും അവന്റെ ചേട്ടന്റെയും ജനന സർട്ടിഫിക്കറ്റുകളും അവനു കാണാൻ കഴിഞ്ഞു. എല്ലാം വളരെ പഴയ കോപ്പികൾ – പക്ഷെ ഒറിജിനലുകൾ. അവയെല്ലാം എടുത്തു അവൻ വെളിയിൽ വെച്ചു.

അതിനടിയിൽ മറ്റൊരു പലക ഉണ്ടായിരുന്നു- അതു നന്നായി തിളങ്ങുന്നുണ്ടായിരുന്നു – ഉടുത്തിരുന്ന മുണ്ടുകൊണ്ടു നന്നായി തുടച്ചപ്പോൾ അതൊരു ശ്രീചക്രം പോലെ തോന്നി, പക്ഷെ അത് ചക്രമായിരുന്നില്ല, ചക്രത്തിന്റെ ഡിസൈനിൽ ഉണ്ടാക്കിയ ഒരടപ്പു – രണ്ടു കിലോയോളം ഭാരമുള്ള വെള്ളിപ്പലക. അതും അവനെടുത്തു താഴെ വെച്ചു.

അടിയിൽ പത്തോളം ചെറിയ അറകൾ ആ പെട്ടിയ്ക്കുള്ളിൽ ഉണ്ടായിരുന്നു. ഒരു ഗ്രാം രണ്ടു ഗ്രാം അഞ്ചു ഗ്രാം ഭാരമുള്ള സ്വർണ നാണയങ്ങളും വെള്ളി നാണയങ്ങളും അതിൽ കണ്ടു. എങ്ങനെപോയാലും രണ്ടു കിലോയോളം സ്വർണവും അത്രയും തന്നെ വെള്ളിയും നാണയങ്ങളാക്കി അതിൽ വെച്ചിരുന്നു. വെറുതെ ഒന്നു തൂക്കി നോക്കിയപ്പോൾ ആ കള്ളികൾ ഉള്ള നിര അങ്ങനെയേ പൊങ്ങി വന്നു. അതിനടിയിൽ ഏറെക്കുറെ ഇരുപതു ലക്ഷം രൂപയ്ക്കുള്ള രണ്ടായിരം നോട്ടിന്റെ കെട്ടുകൾ ഉണ്ടായിരുന്നു. അല്ലാതെ രണ്ടു കിലോയോളം ഭാരമുള്ള സ്വർണ ബിസ്കറ്റുകളും.

ആ നിരയും അവൻ ഉയർത്തിയെടുത്തു, അടിയിൽ പട്ടുതുണികളിൽ പൊതിഞ്ഞ ചെറിയ കെട്ടുകൾ – ഓരോന്നും തുറന്നു നോക്കി – വജ്രം രത്നം പുഷ്യരാഗം പവിഴം അങ്ങനെ ഓരോ പൗച്ചിലും അഞ്ചു വീതം കല്ലുകൾ. അതിൽ ഓരോ കല്ലുകൾക്കും ആവറേജ് ഒരു കോടിയോളം വിലയുണ്ട്. പതിനഞ്ചോളം കെട്ടുകൾ ആ നിരയിലുണ്ട്. കൂടാതെ കുറെ സ്വർണ കമ്പികളും വെള്ളി കമ്പികളും. ഇതൊക്കെ എന്തിനുള്ളതാണാവോ – അവൻ ഓർത്തു. നെക്‌ലേസുകൾ പോലുള്ള ചില ആന്റിക് ആഭരണങ്ങളും മാലകളും വേറെ.  അതിനടിയിൽ രണ്ടായിരം ഇരുനൂറു അമ്പതു രൂപ നോട്ടുകൾ കുറച്ചു വിതറി വെച്ചതുപോലെ ഇട്ടിരുന്നു.