ശിവാത്മിക [മാലാഖയുടെ കാമുകൻ] 2634

“പറഞ്ഞതല്ലെടീ ഞാൻ.., ഇനി നീ ഗൗരിയെ അറിയും…”

ഒരു ചിരിയോടെ ഗൗരി ശങ്കർ അവളുടെ ചെവിയിൽ മെല്ലെ പറഞ്ഞപ്പോൾ അവൾ നിറഞ്ഞ കണ്ണുകളോടെ അവനെ നോക്കി. അവൾക്ക് എന്ത് പറയണം എന്ന് പോലും അറിയാത്ത ഒരു അവസ്ഥയിൽ ആയിരുന്നു..

എല്ലാവരും ചതിച്ചു.. ഇത്ര വിശ്വാസം ഇല്ലെങ്കിൽ അതും ചതി അല്ലെ?

ഒന്നറിയാം.. ഇപ്പോൾ ഈ താലി കഴുത്തിൽ വീണാൽ ജീവിതം അവിടെ അവസാനിക്കും എന്ന് അവൾ ചിന്തിച്ചു..

അവിടെ നിന്നും എങ്ങനെ രക്ഷപെടും എന്നറിയാതെ അവൾ ഇരുന്നു ഉരുകി.. ഗൗരി ശങ്കർ താലി എടുത്ത് ചിരിയോടെ അവളുടെ കഴുത്തിന് നേരെ നീട്ടി..

ശിവക്ക് എല്ലാം അവസാനിച്ചു എന്ന് തോന്നിയ നിമിഷം.. അവൾ കണ്ണുകൾ ഇറുക്കി അടച്ചു. പ്രതികരിക്കാൻ അവൾക്ക് ധൈര്യം കിട്ടിയില്ല.

“ഗൗരി ഒരു നിമിഷം.. ഡോക്യുമെന്റ് കിട്ടിയിട്ടില്ല…”

ഗൗരിശങ്കറിന്റെ അപ്പ അവന്റെ ചെവിയിൽ മെല്ലെ പറയുന്നത് കേട്ടു.

അത് കേട്ടപ്പോൾ പെട്ടെന്ന് അടച്ച കണ്ണുകൾ തുറന്ന് ശിവ നോക്കി..

“ആദ്യം ഇതൊന്നു കഴിയട്ടെ അപ്പാ.. അതിന് ശേഷം എല്ലാം നമ്മുടെ അല്ലെ…രസം കളയല്ലേ അപ്പാ..”

അവൻ ചിരിയോടെ തിരിച്ചു മറുപടി പറഞ്ഞ ശേഷം താലി വീണ്ടും നീട്ടി.. എവിടെ നിന്നോ കിട്ടിയ ഒരു ധൈര്യത്തിൽ ശിവ കൈ നീട്ടി അത് തടഞ്ഞു.

“എന്ത് ഡോക്യുമെന്റ്…??”

അവളുടെ ശബ്ദം അല്പം ഉച്ചത്തിൽ ആയിരുന്നു. പെട്ടെന്ന് ഗൗരി ഒന്ന് പതറി. അതിന് ശേഷം ചിരിച്ചുകൊണ്ട് താലി വീണ്ടും നീട്ടി..

ശിവ ആ താലി കയറി പിടിച്ചു.. ആളുകൾ പകച്ചു നോക്കി.

“ശിവ..? എന്താ ഇത്?”

അവന്റെ കണ്ണിൽ പരിഭ്രമം ആയിരുന്നു.. ആളുകൾ എന്തൊക്കെയോ പറഞ്ഞു അവളെ നോക്കി. മേളം നിന്നു.