വെള്ളത്തിൽ വളരുന്ന പൂവ്….
നൗഫു ❤❤❤

 

 

 

“”ഇഷാ.. നിന്നോടാ ചോദിച്ചത് വെള്ളത്തിൽ വിരിയുന്ന പൂവ് ഏതാ??…””

തലേദിവസം നടന്ന ഒരു ഓൺലൈൻ പരീക്ഷ ക്ലാസ് ആണ് നിങ്ങളിപ്പോൾ കാണുന്നത്…

ഫ്രെയ്മിൽ എന്റെ മൂത്ത മോളും.. ഭാര്യയും..

മകളായി ചെറുത് ഒരാൾ കൂടേ ഉണ്ട്.. അവൾ കൂടേ ഉണ്ടേൽ പരീക്ഷ എഴുതാൻ കഴിയില്ല എന്നുള്ള ഉറപ്പ് ഉള്ളത് കൊണ്ടാണെന്നു തോന്നുന്നു.. ആൾക്ക് ഫുഡ്‌ കൊടുത്തു തൊട്ടിലിൽ കിടത്തിയിട്ടുണ്ട് ..

ഇതെല്ലാം വീഡിയോ കാണുന്നത് പോലെ ഒരു മൂലയിൽ ഇരുന്നു വീഡിയോ കാളിലൂടെ ഞാനും കാണുന്നുണ്ട് ട്ടോ..

പരീക്ഷ സമയത്തും മോൾക് ക്ലാസ് ഉണ്ടാവുമ്പോഴും വിളിക്കരുതെന്ന് സ്ട്രിക്റ്റ് വാണിങ് ഉണ്ട്. പക്ഷെ എന്താ പറയാ… ഞാൻ രാവിലെ എഴുന്നേറ്റ് വീട്ടിലേക് ആ സമയത്ത് അല്ലാതെ വിളിക്കാറില്ല…

ഇന്ന് മലയാളം പരീക്ഷയാണ്.. അതിൽ അഞ്ചു ചോദ്യങ്ങൾ ഉണ്ട്… വേറെയും ഒന്ന് രണ്ടു ചോദ്യങ്ങൾ കൂടേ ഉണ്ട് പക്ഷെ അത് ഫോണിലൂടെ ചെയ്യാൻ ഉള്ളത് ആയിരുന്നു…

എന്റെ ഭാര്യ സെമി,… ടീച്ചർ രാവിലെ അയച്ചു കൊടുത്ത ചോദ്യങ്ങൾ മോളോട് ചോദിക്കുന്നു..

ഒന്നാമത്തെ ചോദ്യമാണ് നിങ്ങൾ ആദ്യം കേട്ടത്…

“”വെള്ളത്തിൽ വിരിയുന്ന പൂവ്…””

അവൾ വീണ്ടും ചോദിച്ചു…

“”ആ………. ഈ ആ ക് കുറച്ചു നീളം ഉണ്ട്ട്ടോ…””

“”ആ… എനിക്കറിയാം…””

എന്നും പറഞ്ഞു മോള് ഒരു രണ്ടു മിനിറ്റ് വായ പൂട്ടാതെ ഓളെ നോക്കി നിന്നു…

എന്റെ പെണ്ണിന് കുറച്ചു ദേഷ്യം കൂടുതൽ ആണ്.. അത് എന്നോട് ആണേലും അങ്ങനെ തന്നെ…

അവളുടെ മുഖം കണ്ടിട്ട് തന്നെ നല്ല ദേഷ്യം ഉള്ളത് പോലെ തോന്നുന്നുണ്ട്.. ഒരു ചോദ്യം തന്നെ ആയി അഞ്ചോ ആറോ വട്ടം…

“”ഇഷാ… വെള്ളത്തിൽ വിരിയുന്ന പൂവ് ഏതാ…””

“”ഉമ്മച്ചി എനിക്ക് അറിയാം… മറന്നു പോയി…””

“”നിനക്ക് ഇന്നലെ ഞാൻ പഠിപ്പിച്ചു തന്നില്ലേ.. ഫോട്ടോ കണ്ടിരുന്നില്ലേ നീ …””

“”ആ…””

വീണ്ടും മോള് വായ തുറന്നു ഓളെ നോക്കി നിന്നു…

ഇതാ ഇവിടെ നോക്ക്.. എന്നും പറഞ്ഞു അവൾ ഒരു പെൻസിൽ എടുത്തു മോളെ മുന്നിലുള്ള നോട് ബുക്കിൽ എഴുതാൻ തുടങ്ങി..

” താ ” ” മ ” ” ര ”

“”ഇത് എന്താ..””

താ ചൂണ്ടി കാണിച്ചു സെമി ചോദിച്ചു,…

ഓരോന്നും മോള് വളരെ വെക്തമായി തന്നെ പറഞ്ഞു.. താ… മ… ര… പക്ഷെ കൂട്ടി പറയുന്നില്ല.. വീണ്ടും വീണ്ടും ചോദിച്ചിട്ടും അവൾ അങ്ങനെ തന്നെ ആണ് പറയുന്നത്…

താ…. മ… ര….

ഇപ്പുറത് ഫോണിൽ നിൽക്കുന്ന എനിക്ക് ആണേൽ ഉത്തരം പറയാൻ പറ്റാത്ത സങ്കടം…

“”മോളൂ ഒന്ന് സ്പീഡിൽ പറഞ്ഞു നോക്കിക്കേ..””

അത് കേട്ട അവൾ ഉടനെ തന്നെ താമര എന്ന് പറഞ്ഞു…

“”ഹാവൂ സമാധാനം… ഒന്നിന്റെ ഉത്തരം കിട്ടി…””