വീട് പറഞ്ഞ കഥ.. [Elsa2244] 77

വീട് അതിൻ്റെ കഥ പൂർണമായും ഉദ്യോഗസ്ഥരോട് പറഞ്ഞ് കഴിഞ്ഞു. പക്ഷേ ഇനിയും ഉത്തരമില്ലാത്ത ഒരുപാട് ചോദ്യങ്ങൾ ബാക്കിയാണ്. കൊലപാതകം നടന്നു എങ്കിൽ ഡെഡ് ബോഡി എവിടെയാണ്.? കൊലപാതകത്തിന് ഉപയോഗിച്ച ആയുധം എവിടെയാണ്.? യഥാർത്ഥത്തിൽ ഈ കണ്ടെത്തിയ രക്തം കാരെൻ കംബാനോയുടെത് തന്നെയാണോ.?. ഇപ്പോഴും കംബാനോ വീട്ടിൽ ഒരു കൊലപാതകം നടന്നു എന്ന് തെളിയിക്കാൻ വേണ്ട തെളിവുകൾ പോലീസിന് ലഭിച്ചിട്ടില്ല.

കൊലപാതകം നടന്നു എന്നതിന് മതിയായ തെളിവുകൾ ഇല്ലെങ്കിലും വീടിനുള്ളിൽ ആരോ ഒരാൾ ക്രൂരമായി ആക്രമിക്കപ്പെട്ടിട്ടുണ്ട് എന്ന് പോലീസിന് ഉറപ്പായി. ഒരാളുടെ ജീവൻ നഷ്ടമാവാൻ മാത്രം രക്തം വീട്ടിൽ ഉണ്ടോ എന്നും ഇനി ഉണ്ടെങ്കിൽ അത് കാരെൻ കംബാനോയുടെത് തന്നെയാണോ എന്നുമാണ് ഇനി ഉദ്യോഗസ്ഥർ തെളിയിക്കേണ്ടത്.

ഇതിനായി അവർ ഒരു അസാധാരണ വഴി കണ്ടെത്തി. കാർപ്പെറ്റിൽ കണ്ടെത്തിയ വലിയ രക്തക്കറ രൂപപ്പെടാൻ യഥാർത്ഥത്തിൽ എത്രത്തോളം രക്തം വേണ്ടി വന്നിരിക്കും എന്ന് കണ്ടെത്താൻ അവർ തീരുമാനിച്ചു. തങ്ങളുടെ പരീക്ഷണം പരമാവധി കൃത്യത ഉള്ളതാവണം എന്നുറപ്പിക്കാൻ അവർ യഥാർത്ഥ കാർപ്പെറ്റിൻ്റെ മറ്റൊരു ഭാഗം മുറിച്ചെടുത്തു. തുടർന്ന് മനുഷ്യൻ്റെ തലയുടെ ഭാരത്തിന് സമാന ഭാരമുള്ള ഒരു വസ്തു അതിൽ വച്ചു. തുടർന്ന് ഉദ്യോഗസ്ഥർ ഈ വസ്തുവിലൂടെ കാർപ്പെട്ടിലേക്ക് മനുഷ്യ രക്തം ഒഴിച്ചു. ഏകദേശം 887 സ്ക്വയർ ഇഞ്ച് വലുപ്പത്തിൽ കറ ഉണ്ടാകുന്നത് വരെ അവർ ഇത് തുടർന്ന്. യഥാർത്ഥത്തിൽ കണ്ടെത്തിയ രക്തക്കറയും ഇതേ വലുപ്പം ആയിരുന്നു ഉണ്ടായിരുന്നത്.

കാരെൻ കംബാനോയുടെ അതെ ശരീര അളവിൽ ഉള്ള ഒരു സ്ത്രീയുടെ ശരീരത്തിലെ 40 ശതമാനത്തിന് മുകളിൽ രക്തം വേണം 887 സ്ക്വയർ ഇഞ്ച് വലിപ്പമുള്ള ആ കറ രൂപ്പെടാൻ എന്ന് ഉദ്യോഗസ്ഥർ കണ്ടെത്തി. ഒരാൾക്കും അത്രയും രക്തം നഷ്ടമായാൽ ജീവൻ നിലനിർത്താൻ സാധിക്കില്ല.

???????

അന്വേഷണ ഉദ്യോഗസ്ഥർക്ക് ആ വീടിനുള്ളിൽ ഒരു വ്യക്തി ചോര വാർന്ന് മരണപ്പെട്ടിട്ടുണ്ട് എന്ന് തെളിവ് സഹിതം ബോധ്യമായി. അവർക്ക് മുന്നിലുള്ള അടുത്ത കടമ്പ അത് കാരെൻ കംബാനോയുടെ രക്തം ആണോ എന്ന് കണ്ടെത്തൽ ആണ്. എന്നാല് ഇതിനായി ഡിഎൻഎ ടെസ്റ്റ് നടത്താനായി പോലീസിൻ്റെ കയ്യിൽ കാരെൻ കംബാനോയുടെ ഡിഎൻഎ സാമ്പിൾ ഇല്ലായിരുന്നു. കാരെനിൻ്റെ അച്ഛനും അമ്മയും ജീവിച്ചിരിക്കുന്നു എങ്കിൽ ഈ പ്രശ്നം നിസ്സാരമായി പരിഹരിക്കാം. ഉദ്യോഗസ്ഥർക്ക് അവർ ഇരുവരുടെയും ഡിഎൻഎ പരിശോധിച്ചാൽ മതിയാകും. കാരണം, കാരെൻ അവരുടെ മകൾ ആണെന്നിരിക്കെ അവളുടെ പാതി ഡിഎൻഎ അവളുടെ അമ്മയിൽ നിന്നും മറുപാതി അച്ഛനിൽ നിന്നും ആവും ലഭിച്ചിരിക്കുക. പക്ഷേ നിർഭാഗ്യവശാൽ അവളുടെ അച്ഛൻ നേരത്തെ മരണപ്പെട്ടിരുന്നു.

തുടർന്ന് കംബാനോ വീട്ടിൽ നിന്ന് കണ്ടെത്തിയ രക്ത സാമ്പിളുകൾ യഥാർത്ഥത്തിൽ കാരെൻ കംബാനോയുടെത് തന്നെയാണോ എന്ന് തെളിയിക്കാൻ ഒക്ലഹോമ പോലീസ് ഡിപ്പാർട്ട്മെൻ്റ് എഫ്ബിഐ യെ സമീപിച്ചു.