വീട് പറഞ്ഞ കഥ.. [Elsa2244] 77

വളരെ സെൻസിറ്റീവ് ആയ ടെസ്റ്റ് ആണ് ലൂമിനോൾ ടെസ്റ്റ്. ഒരു പ്രതലത്തിൽ നിന്ന് ജലമോ, സോപ്പ് പൊടിയോ, ബ്ലീചോ ഉപയോഗിച്ച് കഴുകി കളഞ്ഞാൽ പോലും ലുമിനോൾ ഉപയോഗിച്ച് അവിടെ രക്തം ഉണ്ടായിരുന്നു എന്ന് കണ്ടെത്താൻ സാധിക്കും.

ലൂമിനോൾ രക്തം ഉണ്ടായിരുന്ന ഒരു പ്രതലത്തിലേക്ക് സ്പ്രേ ചെയ്താൽ അതിലെ കെമിക്കൽ ഘടകങ്ങൾ രക്തത്തിലെ ഹീമോഗ്ലോബിൻ അല്ലെങ്കിൽ അയേണുമായി കൂടിച്ചേർന്ന് നീല നിറത്തിൽ പ്രകാശിക്കും. സാധാരണ നമ്മൾ ഉപയോഗിക്കുന്ന ബ്ലീച്ച് പൗഡറുകൾ ഉപയോഗിച്ച് പത്ത് തവണ കഴുകിയാൽ പോലും ലൂമിനോൾ ഉപയോഗിച്ച് രക്തത്തിൻ്റെ സാനിദ്ധ്യം കണ്ടെത്താം.

എന്നാല് ലൂമിനോൾ ടെസ്റ്റിൻ്റെ പൂർണ ഫലം അറിയാനും കെമിക്കൽ ജ്വലിക്കുന്നത് കാണാനും പൂർണമായും ഇരുട്ട് അത്യാവശ്യമാണ്. അതിനാൽ രാത്രി ആകുന്നത് വരെ ഉദ്യോഗസ്ഥർ കാത്തിരുന്നു.

ആദ്യമായി അന്വേഷണ ഉദ്യോഗസ്ഥർ ലൂമിനോൾ സ്പ്രേ ചെയ്തത് ബെഡ്റൂമിൽ ആണ്. ആദ്യം അവർ നഗ്ന നേത്രങ്ങൾ കൊണ്ട് കാണുന്ന വിധത്തിൽ റൂമിൻ്റെ ഉൾഭാഗം മുഴുവൻ ഫോട്ടോ എടുത്തു. തുടർന്ന് ലൂമിനോൾ സ്പ്രേ ചെയ്ത് വീണ്ടും ഫോട്ടോ എടുത്തു. ടെസ്റ്റിൻ്റെ റിസൽറ്റ് ഏവരെയും നടുക്കുന്നത് ആയിരുന്നു.

ലൂമിനോൾ രക്തവുമായി കൂടിച്ചേർന്ന് ഉണ്ടായ പ്രകാശത്തിൽ യഥാർത്ഥത്തിൽ തൻ്റെ തൊട്ടടുത്ത് നിൽക്കുന്ന ആളെ പോലും ആ ഇരുട്ടിൽ തനിക്ക് കാണാൻ സാധിച്ചു എന്നാണ് ലീഡ് ഡിറ്റക്ടീവ് അഭിമുഖത്തിൽ പറഞ്ഞത്. അത്രത്തോളം രക്തം അവിടെ ഉണ്ടായിരുന്നു.

ഭയാനകമായ ഒരു കഥയാണ് ലൂമിനോൾ ടെസ്റ്റ് അന്വേഷണ ഉദ്യോഗസ്ഥരോട് പറഞ്ഞത്. നിലത്തും സീലിങ്ങിലും ചുവരിലും വാതിലിലും എല്ലാം രക്തം ചിതറി കിടന്നിരുന്നു. ആ മുറിക്കുള്ളിൽ ഒരു ബ്ലഡ് ബാത്ത് നടന്നിട്ടുണ്ട് എന്ന് പോലും തങ്ങൾക്ക് തോന്നി എന്നാണ് അന്വേഷണ ഉദ്യോഗസ്ഥർ പറഞ്ഞത്.

രക്തം കാണപ്പെട്ട ഭാഗങ്ങൾ രക്ത തുള്ളികളുടെ വലുപ്പം അവയുടെ ഘടന, ദിശ എന്നിവയെല്ലാം അന്വേഷണ ഉദ്യോഗസ്ഥർക്ക് കൂടുതൽ തെളിവുകൾ നൽകി. ആരോ ഒരാൾ മാരകമായ ഒരു ആയുധം കൊണ്ട് ഏറ്റ അടിയിൽ ആ മുറിയിൽ കിടന്ന് മരിച്ചിട്ടുണ്ട് എന്നവർക്ക് ബോധ്യമായി.

ഒരു വ്യക്തിയുടെ കയ്യിൽ ഒരു ആയുധം പിടിക്കുകയും അത് രക്തത്തിൽ മുങ്ങി ഇരിക്കുകയും ആണെങ്കിൽ ആ ആയുധം വീശുന്ന ദിശയിൽ രക്ത തുള്ളികൾ കാണപ്പെടും. ഈ കേസിൽ സീലിങ്ങിന് മുകളിൽ കാണപ്പെട്ട രക്തത്തുള്ളികൾ നീളമുള്ള ഒരു ആയുധം ഉപയോഗിച്ച് കൈ കൊണ്ട് വീശി അടിച്ചത് മൂലം ഉണ്ടായത് ആണെന്ന് കണ്ടെത്തി.

ഉദ്യോഗസ്ഥർ ലൂമിനോൾ വീടിൻ്റെ മറ്റ് ഭാഗത്തും പടിക്കെട്ടിലും മുറ്റത്തും സ്പ്രേ ചെയ്ത് നോക്കി. ബെഡ്റൂമിൽ നിന്ന് അടുക്കളയിലേക്ക് രക്ത തുള്ളികൾ പോകുന്നുണ്ട്. അടുക്കളയിൽ നിന്ന് യൂട്ടിലിറ്റി റൂമിൻ്റെ വാതിലിനു നടുവിൽ അവർ രക്തത്തിൻ്റെ സാനിദ്ധ്യം കണ്ടെത്തി. തുടർന്ന് അവിടെ വച്ച് ബോഡി നിലത്ത് വച്ചതവാം എന്നും ഉദ്യോഗസ്ഥർ അനുമാനിച്ചു. തുടർന്ന് പടിക്കെട്ടിലൂടെ മുറ്റത്തേക്ക് വലിച്ചു കൊണ്ടുപോയ രീതിയിൽ രക്ത പാടുകൾ കണ്ടെത്തി. അക്ഷരാർത്ഥത്തിൽ ഞെട്ടിക്കുന്ന വിവരങ്ങൾ ആയിരുന്നു ഉദ്യോഗസ്ഥർ അന്നെ ദിവസം രാത്രി കണ്ടെത്തിയത്.