വീട് പറഞ്ഞ കഥ

Author :Elsa2244

1992 ലെ വേനൽ ചൂട് നിറഞ്ഞ ഒരു രാത്രിയിൽ, അയൽക്കാർ തങ്ങൾ സ്ഥിരമായി കേൾക്കാറുള്ള വഴക്ക് അന്നും കംബാനോ ദമ്പതികളുടെ വീട്ടിൽ നിന്ന് കേട്ടു.

ക്രിസ്റ്റഫർ കംബാനോ പറയുന്നത് പ്രകാരം, അവർ വഴക്കിട്ട് അൽപ നേരം കഴിഞ്ഞപ്പോൾ തന്നെ തൻ്റെ ഭാര്യ ദേഷ്യം തണുപ്പിക്കാൻ വേണ്ടി വീട് വിട്ട് പുറത്തേക്ക് പോയി. പക്ഷേ അദ്ദേഹത്തിൻ്റെ ഭാര്യ കാരെൻ കംബാനോയെ അതിനു ശേഷം പിന്നീട് ആരും കണ്ടിട്ടില്ല.

??????????

തൻ്റെ നാല്പത്തി മൂന്നാമത്തെ പിറന്നാളിന് കേവലം രണ്ടാഴ്ച മാത്രം ബാക്കി നിൽക്കെ ആണ് കാരെൻ കംബാനോ അപ്രത്യക്ഷയായത്. ന്യൂയോർക്കിൽ ഉള്ള തൻ്റെ മൂന്ന് മക്കളെയും കണ്ടതിനു ശേഷം അവള് ഒക്ക്ലഹോമ സിറ്റിയിലേക്ക് മടങ്ങി വന്നിട്ട് അൽപ ദിവസമേ ആയിട്ടുള്ളൂ.

തൻ്റെ മൂന്നാമത്തെ ഭർത്താവായ ക്രിസ്റ്റഫർ കാംബാനോയും ഒത്തായിരുന്നു അവള് താമസിച്ചിരുന്നത്.

1987 ഡിസംബറിൽ ആണ് ക്രിസ്റ്റഫറും കാരെനും വിവാഹിതരാവുന്നത്. കൂട്ടുകാരും ബന്ധുക്കളും അവരുടേത് ഒരു അസാധാരണ ബന്ധം ആയാണ് കണ്ടിരുന്നത്. കാരണം കാരെന് ക്രിസ്റ്റഫറിനേക്കാൾ പതിനഞ്ച് വയസ്സ് കൂടുതൽ പ്രായം ഉണ്ടായിരുന്നു കൂടാതെ ഇത് അവളുടെ മൂന്നാമത്തെ വിവാഹം ആയിരുന്നു. ക്രിസ്റ്റഫറിൻ്റെ ആദ്യത്തേതും.

കാരെൻ്റെ ഉറ്റ സുഹൃത്ത് ആയിരുന്നു ക്രിസ്റ്റഫറിൻ്റെ അമ്മ. അതുവഴിയാണ് ഇരുവരും പരിചയത്തിൽ ആയത്. നിർമ്മാണ മേഖലയിൽ ജോലി ചെയ്തിരുന്ന ആളായിരുന്നു ക്രിസ് എന്ന ക്രിസ്റ്റഫർ. ചില പെറ്റി മോഷണ കേസുകളിൽ ജയിൽ ശിക്ഷ അനുഭവിച്ച ആളുകൂടി ആയിരുന്നു ക്രിസ്.

കുടുംബത്തിലേക്ക് പ്രധാന വരുമാനം കൊണ്ടുവന്നത് കാരെൻ ആയിരുന്നു. ടൗണിലെ ഒരു ക്രെഡിറ്റ് അഡ്ജസ്റ്റ്മെൻ്റ് കമ്പനിയിൽ ബിൽ കളക്ടർ ആയി ജോലി ചെയ്യുകയായിരുന്നു അവള്.

1992 ജൂലായ് 1ന് പതിവ് പോലെ ഒരു വഴക്ക് അന്നും അവരുടെ വീട്ടിൽ നടന്നു. പക്ഷേ ഇത്തവണ വഴക്കിന് കാരണം ക്രിസ്സിൻ്റെ അമിതമായ മയക്കുമരുന്ന് ഉപയോഗം ആയിരുന്നു. അയൽപക്കത്തെ വീടുകളിൽ പോലും കേൾക്കാൻ മാത്രം ഉച്ചത്തിൽ ആയിരുന്നു ഇരുവരുടെയും സംസാരം.

ക്രിസ് പറഞ്ഞത് പ്രകാരം വഴക്കിനു ശേഷം കാരെൻ രണ്ട് മൂന്ന് ബ്ലോക്ക് അപ്പുറത്തുള്ള ഒരു കടയിൽ ചില സാധനങ്ങൾ വാങ്ങിക്കാൻ വേണ്ടി പോയി എന്നാണ്. പുറകെ തന്നെ ക്രിസ് കാറിൽ ഒരു ലോക്കൽ ബാറിലേക്ക് പോവുകയും അർദ്ധ രാത്രി വരെ അവിടെ ചിലവഴിക്കും ചെയ്തു.