വസന്തം പോയതറിയാതെ -19(climax)

ക്ഷമിക്കുക, ഈ പാർട്ട് മുഴുവൻ എഴുതിക്കഴിഞ്ഞു എഡിറ്റ് ചെയ്യാൻ ശ്രമിച്ചപ്പോൾ ഡിലീറ്റ് ആയി പോയി. വീണ്ടും എഴുതി വന്നപ്പോൾ ദിവസങ്ങൾ പോയത് അറിഞ്ഞില്ല. ഇനി കഥയിലേക്ക് കടക്കാം

ഏതായാലും അവിടെ വരെ ഒന്ന് പോവുക തന്നെ എന്താണ് അവന്മാരുടെ പ്ലാൻ എന്ന് അറിയണമല്ലോ……

( കളക്ടർ ഗൗരിയിലൂടെ )
ഞാനെന്തേ ഇങ്ങനെ, ആ കാൽക്കൽ വീണു മാപ്പിരക്കുന്നതിന് പകരം വാശിയോടെ മുന്നോട്ട് പോകുന്നു. അദ്ദേഹമാണെങ്കിൽ എന്നെ കൂടുതൽ ചൊടിപ്പിക്കാൻ ശ്രമിക്കുന്നതുപോലെ, ആ ഫോട്ടോയുടെ കാര്യങ്ങൾ എല്ലാം തുറന്നു പറയണമെന്നുണ്ട് പക്ഷേ, അതിനുള്ള സാഹചര്യം ഒത്തു വരുന്നില്ല. ഇങ്ങനെ ഒരു സാഹചര്യത്തിൽ ഞങ്ങൾ രണ്ടുപേരും മാത്രമുള്ളത് ഒറ്റപ്പെടലിന് തുല്യമായതുകൊണ്ട് ഞാൻ, മോളെ വിളിച്ച് അമ്മയെ തിരിച്ചുകൊണ്ടു വരുന്ന കാര്യം പറഞ്ഞപ്പോൾ ‘ അങ്ങോട്ടും ഇങ്ങോട്ടും പറയാനുള്ളതൊക്കെ പറഞ്ഞു തീർത്തു നിങ്ങളുടെ ഹണിമൂൺ ട്രിപ്പ് ഒക്കെ കഴിഞ്ഞിട്ട് സാവധാനം അമ്മമ്മയെ കൊണ്ടുപോയാൽ മതി ‘ എന്നു പറഞ്ഞു. ഞങ്ങൾ രണ്ടും രണ്ടായി നിൽക്കുന്ന ആൾക്കാർ എവിടെ ഹണിമൂൺ പോകാൻ അത്, മോളോട് എങ്ങനെ പറയാൻ. അദ്ദേഹത്തിന്റെ അടുത്ത് ചെന്ന് സംസാരിക്കാം എന്ന് കരുതുമ്പോൾ മുൻപ് ചെയ്തതിന്റെ ചളിപ്പും കുറ്റബോധവും എന്നെ വേട്ടയാടുന്നു. ഇതിനൊക്കെയുള്ള ഒരു പോംവഴി ഞങ്ങളെ രണ്ടുപേരെയും വിളിച്ചിരുത്തി സംസാരിച്ചു തീർക്കാൻ പറ്റിയ ഒരു മീഡിയേറ്റർ ആണ് വേണ്ടത്. മോള് മുൻകൈയെടുത്താലും തീരാവുന്നതേയുള്ളൂ, ഇതെങ്ങനെ മോളോട് പറയും.ഇതിനിടയിൽ ഒരു ദിവസം ഷിബു എന്നെ വിളിച്ച് ഭീഷണിപ്പെടുത്തി, ഷോപ്പിംഗ് കോംപ്ലക്സിന്റെ ഡോക്യുമെന്റുമായി അവൻ പറയുന്ന സ്ഥലത്ത് ചെന്നില്ല എങ്കിൽ അവന്റെ കയ്യിൽ ഇനിയും ഫോട്ടോകൾ ഉണ്ടെന്നും അത് അദ്ദേഹത്തിന് അയച്ചുകൊടുക്കും എന്നും പറഞ്ഞുകൊണ്ടുള്ള ഭീഷണി. അവൻ പറഞ്ഞിട്ടാണ് രതീഷ് എന്നെ പ്രൊപ്പോസൽ ചെയ്തതെന്നും അവന് എന്നിൽ ആഗ്രഹമുണ്ടെന്നും, അന്ന് എന്റെ ഫ്രണ്ട് വന്നില്ലായിരുന്നുവെങ്കിൽ അവർ എന്നെ നശിപ്പിക്കും ആയിരുന്നു എന്നും പറഞ്ഞു.