രണ്ടാം ജന്മം 2 [അജി] 166

ഞാൻ അവിടെ കിടന്ന് ഓരോന്ന് ആലോചിച്ച് ഉറങ്ങി പോയി. രാവിലെ അനുവാണ് എന്നെ വിളിച്ചുണർത്തിയത്. അവൾ അപ്പോൾ പോവാനായി വസ്ത്രം മാറി നിൽക്കുന്നു.

 

“വേഗം കുളിച്ച് റെഡി ആയി വാ… നമ്മുക്ക് വേഗം തന്നെ പോണം. എനിക്ക് എന്റെ കിച്ചുവേട്ടനെ എത്രയും വേഗം കണ്ടെത്തണം…”

 

ഞാൻ വേഗം കുളിച്ച് റെഡി ആയി വന്നു. ഇപ്പോൾ കിരണിനെ കണ്ടത്തേണ്ടത് അനുവിന്റെ മാത്രം കാര്യമല്ല. എന്റെയും കൂടിയാണ്. എനിക്ക് എന്നിലേക്ക് തന്നെ മടങ്ങി പോവണം.

 

കുളിച്ച് വന്ന എനിക്ക് രാവിലത്തെ ഭക്ഷണം അവൾ എടുത്ത് തന്നു. ഞാൻ അത്‌ കഴിക്കുമ്പോളേക്കും അനു പോന്നുവിനെ ഒരുക്കി ഇരുത്തിയിരുന്നു.അവളെയും കൊണ്ട് പോവുന്നുണ്ട് എന്ന് തോന്നുന്നു. അല്ലാതെ കൊച്ചിനെ ഇവിടെ ഒറ്റക്കിരുത്തി പോവാൻ പറ്റില്ലല്ലോ.

 

ഇന്നലത്തെ പോലെ അല്ല ഇന്ന് അനു. എന്നോട് അങ്ങനെ ഒന്നും മിണ്ടുന്നില്ല. ഞാൻ എന്തോ വലിയ ദ്രോഹം അവളോട് ചെയ്താ പോലെയാണ്. സത്യത്തിൽ ഞാൻ അതിന് മാത്രം ഒന്നും ചെയ്തിട്ടില്ല.

 

ഞാൻ അനുവിനെയും പൊന്നുവിനെയും കൂട്ടി എന്റെ വീട്ടിലേക്ക് നടന്നു. ഗേറ്റ് കടന്ന് വീട്ടിലേക്ക് നടക്കുമ്പോൾ സന്തോഷവും പേടിയും എനിക്ക് ഉണ്ടായിരുന്നു. വീട്ടുകാരെ വീണ്ടും കാണാൻ പറ്റുന്നതിന്റെ സന്തോഷം.കിരണിനെ കാണാൻ പറ്റുവോ?അഥവാ ഇനി കണ്ടാൽ ഞങ്ങൾക്ക് പരസ്പരം എങ്ങനെ മാറാൻ കഴിയുമോ? കഴിയുമെങ്കിൽ അത്‌ എങ്ങനെ? ആലോചിക്കുമ്പോൾ ടെൻഷൻ ആവുന്നു.

 

“വാ ഇതാ എന്റെ വീട്….”

 

ഞാൻ അനുവിനെ കൂട്ടികൊണ്ട് പോയി വീടിന്റെ ബെൽ അടിച്ചു. അനു ചുറ്റും നോക്കുന്നുണ്ടായിരുന്നു. പൊന്നു നല്ല സന്തോഷത്തിലായിരുന്നു. പുതിയ സ്ഥലം കണ്ടെതിന്റെയാണ് എന്ന് തോന്നുന്നു.

 

ബെൽ അടിച്ച് ഞങ്ങൾ ആരെങ്കിലും വരുന്നത് നോക്കിയിരുന്നു. വീടിന്റെ വാതിൽ തുറന്ന് അച്ഛൻ വന്നു.അച്ഛൻ സാധാരണ ഈ സമയത്ത് ഇവിടെ ഉണ്ടാവാറില്ല. ജോലിക്ക് പോവാറുള്ളതാണ്. ഇന്ന് എന്ത് പറ്റിയാവോ…?

 

“ആരാ… മനസ്സിലായില്ല….?”

 

ഞങ്ങളെ മുൻപ് കണ്ടിട്ടില്ലാത്തതിഞ്ഞാൽ അച്ഛൻ ഞങ്ങളോട് ചോദിച്ചു.എനിക്ക് അച്ഛനെ കണ്ടപ്പോൾ സന്തോഷമായി. അച്ഛാ എന്ന് വിളിക്കണം എന്നുണ്ട്. പക്ഷേ അതിന് സാധിക്കില്ലല്ലോ… ഞാൻ അവിടെ അച്ഛനെ നോക്കി നിന്ന് പോയി.

 

“ആരാ… ഒന്നും പറഞ്ഞില്ല….”

 

ഞാൻ ഉത്തരം പറയാതെ ആയപ്പോൾ അച്ഛൻ വീണ്ടും എന്നോട് ചോദിച്ചു. അനു എന്റെ കൈയിൽ തട്ടി. പറയാൻ ആംഗ്യം കാട്ടി.