മാന്ത്രികലോകം 7
Author – Cyril

[Previous part]

 

സാഷ

 

പെട്ടന്ന് ഫ്രെന്നിന്റെ ശബ്ദം അവിടമാകെ മുഴങ്ങി കേട്ടു—,

“ഇനി നമുക്ക് ഇതിലേക്ക് ചാടാം…”

അതുകേട്ട് എല്ലാവരുടെയും കണ്ണുകൾ പുറത്തേക്ക് ഭയാനകമായി തള്ളി… ആരെല്ലാമൊ എന്റെ പിന്നില്‍ ബോധംകെട്ടു വീണു.

പലരും തിരിഞ്ഞു നോക്കാതെ ഓടാന്‍ തയാറാക്കും പോലെ നാലഞ്ചടി പിന്നോട്ട് വെക്കുന്നതും ഞാൻ അറിഞ്ഞു.

ഒരു നിമിഷം ഞാൻ പോലും ശങ്കിച്ചു നിന്നു.

റാലേൻ താടിക്ക് കൈയും കൊടുത്തുകൊണ്ട് നില്‍ക്കുന്നത് ഞാൻ കണ്ടു.

അപ്പോഴാണ് ഉച്ചത്തിലുള്ള രണ്ട് മൃഗങ്ങളുടെ ഓരിയിടൽ അന്തരീക്ഷത്തെ തുളച്ചു ഞങ്ങളുടെ കര്‍ണപടങ്ങളിൽ പതിച്ചത്….

ഞങ്ങൾ എല്ലാവരെയും വിറപ്പിച്ചു കൊണ്ട് രണ്ട് ഭയാനകമായ രൂപങ്ങള്‍ ഞങ്ങൾക്ക് പിന്നില്‍ നിന്നും ഞങ്ങൾക്ക് നേരെ പാഞ്ഞടുക്കുന്നത് കണ്ടു.

ഭീതി ഉളവാക്കുന്ന ഒരു കാഴ്ച ആയിരുന്നു. ഒട്ടുമിക്ക ആളുകളും ഭയന്ന് സ്തംഭിച്ചു നിന്നു പോയി.

ആ മൃഗങ്ങളുടെ പാഞ്ഞുള്ള വരവു കണ്ടെനിക്കും ഭയം തോന്നിയെങ്കിലും അത് ആരെയും ആക്രമിക്കില്ല എന്ന വിശ്വസം എനിക്കുണ്ടായിരുന്നു.

നാലരയടി ഉയരവും, അഞ്ചര അടി നീളവും – ഒരിക്കലും കെട്ടടങ്ങാത്ത, എപ്പോഴും ചെറിയ തോതില്‍ പുക വമിക്കുന്ന തീക്കനല്‍ ശരീരവും – എരിയുന്ന കനല്‍ പോലത്തെ രണ്ട് കണ്ണുകളും – അസ്ത്രമുന പോലത്തെ വാലിന്റെ അറ്റവും – നാല്‌ കാലും, മൂര്‍ച്ചയുള്ള കഠാര പോലത്തെ അറുപതോളം പല്ലുകളും ഉള്ള മൃഗങ്ങള്‍ ആയിരുന്നു അവ….

ആ മൃഗങ്ങളെ കാണുന്ന മാത്രയില്‍ തന്നെ ഹൃദയം സ്തംഭിച്ചു പോകുന്ന അവസ്ഥ ആയിരുന്നു എല്ലാവർക്കും…

“അഗ്നി ചെന്നായ്ക്കള്‍…!!” ഭയം കലര്‍ന്ന സ്വരത്തില്‍ സുല്‍ത്താന്‍ മെല്ലെ പറഞ്ഞു.

രണ്ട് ചെന്നായ്ക്കളുടെ ലക്ഷ്യവും ഫ്രെൻ ആയിരുന്നു….

ഫ്രെൻ നേരത്തെ ഞങ്ങളോട് പറഞ്ഞ കാര്യം വെച്ചു നോക്കുമ്പോള്‍ ഇത് അഗ്നിയും ഉജ്ജ്വലയും ആണെന്ന് മനസ്സിലായി.

ഫ്രെന്നിന്റെ നേര്‍ക്ക് പാഞ്ഞടുത്ത അഗ്നിയും ഉജ്ജ്വലയും അവന്റെ തൊട്ടു മുന്നില്‍ വന്ന് നിന്നു…. തീക്കനല്‍ കണ്ണുകൾ കൊണ്ട് അവ അവനെ നോക്കി…

ഉജ്ജ്വല യുടെ നോട്ടം പെട്ടന്ന് മാന്ത്രിക മുഖ്യന്‍റെ മുഖത്തേക്കായി.. അത് അയാളെ സൂക്ഷിച്ചു നോക്കുന്നുണ്ടായിരുന്നു…. എന്നിട്ട് അതിന്റെ അറുപതു കഠാര പല്ലുകളും കാണിച്ചു അത് മുരണ്ടു….

ഉടനെ ഫ്രെന്നിന്റെ അടുത്ത് നിന്നിരുന്ന റാലേനും ലാവേഷും തിടുക്കത്തിൽ അവന്റെ അടുത്ത് നിന്നു ഒരു വശത്തേക്ക് നീങ്ങി നിന്ന് ആ ചെന്നായ്ക്കളെ മിഴിച്ചു നോക്കി.