മാന്ത്രികലോകം 16 [Cyril] 2193

‘അപ്പോ എന്റെ ധ്വംസന-കഠാര.., അതിന്‌ എന്ത് സംഭവിക്കും…?’ അമ്മു ആശങ്കയോടെ ചോദിച്ചു.

‘അതിന്‌ ഒന്നും സംഭവിക്കില്ല, അതും അതിന്റെ യഥാര്‍ത്ഥ ആത്മാവും പഴയത് പോലെ തന്നെ നിലനില്‍ക്കും.’ ഫ്രെൻ അങ്ങനെ പറഞ്ഞതും അമ്മു ആശ്വസിച്ചു.

‘ശെരിക്കും ഈ ധ്വംസന-കഠാരയെ ഹിഷേനി എന്തിനാണ് എനിക്ക് വേണ്ടി സൃഷ്ടിച്ചത്, ഫ്രെൻ…?’ അമ്മു ചോദിച്ചു.

‘യഥാര്‍ത്ഥത്തില്‍, രണ്ടായിരം വർഷങ്ങൾക്ക് മുന്‍പ്, ഹിഷേനിയെ സ്വാധീനിച്ച് നിയന്ത്രിച്ച് അവരിലൂടെ ധ്വംസന-കഠാരയെ സൃഷ്ടിച്ചത് ഞാനാണ്, അമ്മു…’

‘എന്തു….?!!’

ഫ്രെന്നിന്റെ വെളിപ്പെടുത്തല്‍ അവന്റെ പത്ത് സുഹൃത്തുക്കളെയും ശെരിക്കും ഞെട്ടിച്ചു.

‘എന്തിന്….?’ അപ്പോഴും ഞെട്ടല്‍ മാറാതെ അമ്മു എങ്ങനെയോ ചോദിച്ചു.

‘എന്തിന്‌ ഞാൻ അങ്ങനെ ചെയ്തുവെന്ന് ഇപ്പോൾ ഞാൻ ഓര്‍ക്കുന്നില്ല…’ ഫ്രെൻ കള്ളം പറഞ്ഞു.

അവന്‍ പറഞ്ഞത് കള്ളം ആണെന്ന് അവന്റെ സുഹൃത്തുക്കള്‍ക്കും തോന്നി.

‘നമുക്ക് ഈ പ്രയോജനമില്ലാത്ത ചർച്ച ഒഴിവാക്കി കാര്യത്തിലേക്ക് കടക്കാം….’ ഫ്രെൻ തിടുക്കം കൂട്ടി. ‘ഞാൻ പിന്നെയും നിങ്ങളോട് അനുവാദം ചോദിക്കുന്നു…’

കുറച്ച് നേരത്തേക്ക് ദൈവ യോദ്ധാക്കൾ ആലോചിച്ച് നിന്നു. ഫ്രെൻ ക്ഷമയോടെ കാത്തിരുന്നു.

‘ഞങ്ങള്‍ക്കും സമ്മതമാണ്.’ പത്തുപേരും ഒറ്റ സ്വരത്തില്‍ പറഞ്ഞു.
*************

ഒഷേദ്രസ്

അഞ്ച് ദിവസം…., ഇനി വെറും അഞ്ച് ദിവസം കഴിഞ്ഞാൽ പ്രകൃതി ശക്തികളും നിഗൂഢ ശക്തികളും എന്റെ സ്വന്തം ശക്തിയായി പരിണമിക്കും.

അതിന്‌ ശേഷം ഞാൻ…!

പെട്ടന്ന് എന്റെ ഉള്ളം ക്രോധത്താൽ നിറഞ്ഞു.

‘ഫ്രെൻഷർ……’ എന്റെ മനസ് വെറുപ്പോടെ ആ നാമത്തെ ചിത്രവധം ചെയ്തു.

എന്റെ കോപം അടങ്ങുന്നില്ല…

ആത്മാവിലെ നോവ് ശമിക്കുന്നില്ല….

ഭ്രാന്ത് പിടിച്ച് എന്റെ ആത്മാവ് അലറി —,

‘ഫ്രെൻഷർ…..! നിന്റെ അന്തകന്‍ ഞാൻ തന്നെയാണ്‌…’

അപ്പോഴും എന്റെ ക്രോധം അടങ്ങിയില്ല.

എന്റെ അനുയായികളായിരുന്ന ഫെയറികളിൽ നിന്റെ മരണ മുദ്ര പതിച്ച് കൊല്ലിച്ചു…!