മാന്ത്രികലോകം 16 [Cyril] 2190

പക്ഷേ എന്റെ ശബ്ദം ഫെയറി ലോകമാകെ പ്രതിധ്വനിച്ചത് പോലെ തോന്നി.

ഉടനെ ഫ്രെൻ ഉറക്കെ ചിരിച്ചു. അവന്റെ ചിരി അട്ടഹാസമായി മാറി. അവന്റെ കണ്ണുകൾ കറുത്തിരുണ്ട ശേഷം കറുത്ത രത്നങ്ങള്‍ പോലെ തിളങ്ങി. അവന്റെ കൃഷ്ണമണികളുടെ സ്ഥാനത്ത് പെട്ടന്ന് രണ്ട് സ്വര്‍ണ്ണ നാളങ്ങള്‍ പ്രത്യക്ഷപ്പെട്ടു. അതിൽ നിന്നും വ്യാപിച്ച ഒരു അദൃശ്യമായ ഊര്‍ജ്ജം എന്റെ മേല്‍ പതിച്ചതും കഠിനമായ പൊള്ളലേറ്റ പോലെ തോന്നി.

പെട്ടന്ന് ഞാൻ രണ്ട്..മൂന്ന്‌ അടി പിന്നോട്ട് വെച്ചു പോയി.

“എനിക്ക് എതിരായി തിരിയുന്ന എല്ലാവരും എന്റെ ശത്രുക്കൾ ആണെന്ന് ഞാൻ പ്രഖ്യാപിക്കുന്നു, ഷൈദ്രസ്തൈന്യ. എന്റെ ശത്രുക്കളുടെ പട്ടികയില്‍ നിങ്ങൾ ഫെയറി വര്‍ഗ്ഗം പെട്ടുപോകാതെ സൂക്ഷിക്കുക.” ഫ്രെൻ ചിരി നിർത്തി മെല്ലെ പറഞ്ഞെങ്കിലും, അവന്റെ ശബ്ദം പ്രപഞ്ചമാകെ മുഴങ്ങിയത് പോലെയാണ് ഞങ്ങൾക്ക് അനുഭവപ്പെട്ടത്.

സ്തംഭിച്ചു നില്‍ക്കുന്ന ഞങ്ങൾ മൂന്ന് പേരേയും അവന്റെ മനസില്‍ പതിക്കും പോലെ നോക്കിയ ശേഷം അവന്‍ അപ്രത്യക്ഷനായി.

“അവന്‍ നന്മയ്ക്ക് എതിരായി തിരിയുമോ, രാജ്ഞി…?” ഹവേല്യ സംശയത്തോടെ ചോദിച്ചു.

“അവന്റെ ആത്മാവില്‍ അവ്യവസ്ഥ-ശക്തിയുടെ സ്വാധീനം ഉള്ളത് വരെ നമുക്ക് ഒന്നും പ്രവചിക്കാൻ കഴിയില്ല, ഹവേല്യ…”

“പക്ഷേ അവന്‍ സൃഷ്ടിക്കപ്പെട്ട നിമിഷം തൊട്ട് ഇന്നുവരെ അവന്‍ നന്മയ്ക്ക് എതിരായി പ്രവർത്തിച്ചില്ല, അമ്മാ. അവന്‍ ഇപ്പോൾ പോലും നന്മയെ കരുതിയാണ് പ്രവര്‍ത്തിച്ചത്. പിന്നെ എന്തിനാണ് അവനെ വിശ്വസിക്കാൻ നിങ്ങൾ മടിക്കുന്നത്..?” ഹഷിസ്ത്ര ദേഷ്യത്തില്‍ ചോദിച്ചു.

“അവ്യവസ്ഥ-ശക്തി അവനെ സൃഷ്ടിച്ച ആ സെക്കന്റില്‍ തന്നെ പ്രകൃതിയും, നിഗൂഢ ശക്തികളും, പിന്നെ നമ്മൾ അറിയുന്നതും അറിയാത്തതുമായ ശക്തികള്‍ വരെ ആയിരക്കണക്കിന് നിയന്ത്രണ ബന്ധനങ്ങളെ അവനില്‍ സൃഷ്ടിച്ചിരുന്നു. ഒരുപക്ഷേ അതിന്റെ സ്വാധീനം കൊണ്ടാണ് അവന്‍ നന്മയുടെ പക്ഷത്ത് നില്‍ക്കുന്നു എന്ന സാധ്യതയെ നിനക്ക് തള്ളിക്കളയാനാവുമോ, ഹഷിസ്ത്ര…?” ഞാൻ ചോദിച്ചു.

ഹഷിസ്ത്രയും ഹവേല്യയും ഒരുപോലെ ഞെട്ടിയത് ഞാൻ കണ്ടു.

“പക്ഷേ അത്ര നിയന്ത്രണ ബന്ധനങ്ങൾ അവനില്‍ ഉണ്ടായിട്ട് പോലും അവന്‍ എന്തെല്ലാം ചെയ്തുവെന്ന് നിങ്ങള്‍ക്കും അറിയാം. വേറെയും എന്തെല്ലാം അവന്‍ ചെയ്തിട്ടുണ്ട് എന്നതിനെ നമ്മൾ അറിയുന്നുമില്ല. ഇപ്പോൾ അവന്റെ എല്ലാ ബന്ധങ്ങളെയും അവന്‍ തകർത്ത് കൊണ്ടിരിക്കുന്നു. അവസാനം ബന്ധനങ്ങള്‍ എല്ലാം തകര്‍ന്ന ശേഷം അവന്‍ നന്മയുടെ പക്ഷത്ത് തന്നെ നില്‍ക്കുമെന്ന് നിനക്ക് ഉറപ്പിച്ച് പറയാൻ കഴിയുമോ, ഹഷിസ്ത്ര…?”

ഹഷിസ്ത്രയും ഹവേല്യയും പേടിയോടെ ഇല്ലെന്ന് തലയാട്ടി.

“അവന്‍ നന്മയ്ക്ക് എതിരായി തിരിഞ്ഞാൽ ഫ്രെന്നിനെ നമുക്ക് എന്തെങ്കിലും ചെയ്യാൻ കഴിയുമോ…?” ഹഷിസ്ത്ര ചോദിച്ചു.

“നമുക്കും സംഹാരി ശക്തി ഉണ്ട്… ഒരുപക്ഷേ എന്തെങ്കിലും ചെയ്യാൻ കഴിഞ്ഞേക്കും…” ഹവേല്യ പറഞ്ഞു.

അതുകേട്ട് ഞാൻ ചിരിച്ചു. ഉടനെ അവർ രണ്ട് പേരും എന്നെ സംശയത്തോടെ നോക്കി.

“എന്നെ സൃഷ്ടിക്കുന്ന സമയം രണ്ടാമതായി സംഹാരിയുടെ കവചത്തെ അവന് തുളയ്ക്കാൻ കഴിഞ്ഞു എന്നവൻ പറഞ്ഞു. പക്ഷേ അന്നേരം ഫ്രെൻ അവന് വേണ്ടിയും സംഹാരിയുടെ ഊര്‍ജ്ജത്തെ സ്വീകരിച്ചില്ല എന്ന് നിങ്ങൾ വിശ്വസിക്കുന്നുവോ…?” ഞാൻ ചോദിച്ചു.

എന്റെ ചോദ്യം കേട്ട് നാല് വിടര്‍ന്ന കണ്ണുകൾ എന്നെ നോക്കി.

“അതുകൂടാതെ പരിണാമ സമയങ്ങളില്‍ അവന് സംഹാരിയുടെ കവചത്തെ തുളയ്ക്കാൻ കഴിഞ്ഞില്ല എന്നല്ല അവന്‍ പറഞ്ഞത്, അതിനെ തുളയ്ക്കാൻ സാധ്യമല്ലെന്ന് അവന്‍ തോന്നി എന്നാണ് അവന്‍ പറഞ്ഞത്. അതുകൊണ്ട്‌ നമുക്ക് ഒന്നും തീര്‍ത്തു പറയാൻ കഴിയില്ല. അവന്റെ വാക്കുകള്‍ എല്ലാം എന്റെ മനസിനെ കുഴപ്പിക്കുന്ന തരത്തിലാണ്, ഹഷിസ്ത്ര.” എന്റെ മനസ്സിലുള്ളത് ഞാൻ തുറന്നു പറഞ്ഞു.