മാന്ത്രികലോകം 16 [Cyril] 2193

അവസാനം അവരുടെ പരിണാമം പൂര്‍ത്തിയായതും ഫ്രെൻ അവരുടെ മനസില്‍ സംസാരിച്ചു.

‘നിങ്ങളുടെ ജീവനുള്ള ആയുധങ്ങളുടെ ജീവ ഊര്‍ജ്ജത്തെ നിങ്ങളുടെ ആത്മാവില്‍ ലയിപ്പിച്ച് നിങ്ങളുടെ സ്വന്തം അംശമായി നിങ്ങൾ സ്വീകരിക്കണം. എന്നിട്ട് ആ ആയുധങ്ങളുടെ ആത്മാവിനെ നിങ്ങളുടെ ആത്മാവില്‍ ബന്ധിപ്പിക്കാൻ നിങ്ങൾ എന്നെ അനുവദിക്കണം…’

‘അത് എന്തിനാണ്, ഫ്രെൻ…?’ സംശയത്തോടെ സാഷ ചോദിച്ചു.

‘അങ്ങനെ ചെയ്യുന്നത് മൂലം നിങ്ങളുടെ മനസും ആത്മാവും ഹൃദയവും ഒന്നായി പ്രവർത്തിച്ച് വളരെ ശ്രേഷ്ഠമായ ഒരു ഊര്‍ജ്ജത്തെ സൃഷ്ടിക്കും. ആ ഊര്‍ജ്ജത്തിൽ നിന്നും സമത്വം… നിയന്ത്രണം എന്ന രണ്ട് ഊര്‍ജ്ജം ജനിക്കുകയും, ആയുധത്തിന്റെ ആത്മാവും നിങ്ങളുടെ ആത്മാവും തമ്മില്‍ ഒരു സമത്വ ബന്ധത്തെ സൃഷ്ടിക്കുകയും ചെയ്യും.

പക്ഷേ അതിന്‌ ശേഷം ആ നിയന്ത്രണ ഊര്‍ജ്ജത്തെ നിങ്ങളുടെ ആത്മാവ്, ഹൃദയം, പിന്നെ മനസ്സിലും സ്വീകരിച്ച് നിങ്ങൾ ആയുധത്തിന്റെ ആത്മാവില്‍ നിയന്ത്രണ ബന്ധനം സൃഷ്ടിക്കണം. അതിന്‌ ശേഷം നിങ്ങളില്‍ മറ്റൊരു പരിണാമം സംഭവിക്കും.

ആ പരിണാമം, നിങ്ങളെ നിങ്ങളുടെ ആയുധത്തിന്‍റെ ആത്മാവിനെ പൂര്‍ണമായി നിയന്ത്രിക്കാൻ പ്രാപ്തരാക്കും. പിന്നീട് ഒരിക്കലും ആ ആത്മാവിന് നിങ്ങളുടെ നിയന്ത്രണത്തിൽ നിന്നും വഴുതി പോകാൻ കഴിയില്ല. നിങ്ങൾ നയിക്കുന്നത് പോലെ മാത്രം അത് പ്രവർത്തിക്കും.’

‘സത്യം തന്നെയാണോ നി പറയുന്നത്, ഫ്രെൻ..’ ജാസർ ഉത്സാഹത്തോടെ ചോദിച്ചു.

‘സത്യം തന്നെയാണ്, ജാസർ…’

‘അപ്പോ ഞങ്ങൾ പത്ത് ആത്മാക്കളെയും ഒന്നായി മാറ്റി അതിന്റെ ശക്തിയെ ഉപയോഗിച്ചാൽ പോലും ഞങ്ങള്‍ക്ക് അതിന്റെ മേല്‍ പൂര്‍ണ നിയന്ത്രണം ഉണ്ടാകും എന്നാണോ നി പറയുന്നത്, ഫ്രെൻ…?’ സുല്‍ത്താന്‍ ആവേശത്തോടെ ചോദിച്ചു.

‘നിങ്ങൾ സാധാരണ ചെയ്യുന്നത് പോലെ, നിങ്ങളുടെ ആത്മാവുകള്‍ തമ്മില്‍ ലയിപ്പിക്കേണ്ട ആവശ്യമില്ല…. അതുപോലെ നിങ്ങളുടെ ആയുധങ്ങളുടെ ആത്മാവുകളെ തമ്മില്‍ ഒന്നാക്കി മാറ്റേണ്ട കാര്യവുമില്ല…’ ഫ്രെൻ പറഞ്ഞു.

‘എന്തുകൊണ്ട്‌…?!’ സിദ്ധാര്‍ത്ഥ് ആശ്ചര്യത്തോടെ ചോദിച്ചു.

‘നിങ്ങൾ പത്ത് പേരുടെ ആത്മാവുകള്‍ തമ്മില്‍ നേരത്തെ തന്നെ ആത്മീയബന്ധത്തെ സൃഷ്ടിച്ചിരിക്കുന്നത് കൊണ്ട് നിങ്ങള്‍ ഓരോരുത്തര്‍ക്കും ഞങ്ങളുടെ ഇഷ്ടം പോലെ ഒന്നോ…രണ്ടോ.. അഞ്ചോ ആത്മാവുകളിൽ നിന്നോ, അല്ലെങ്കിൽ എല്ലാ പത്ത് ആത്മാക്കളിൽ നിന്ന് വേണമെങ്കിലും അതിന്റെ ശക്തിയെ സ്വീകരിച്ച് പ്രവർത്തിക്കാൻ കഴിയും.’

‘അപ്പോ ഞങ്ങളുടെ ആയുധങ്ങൾ…?’ ഹെമീറ ചോദിച്ചു.

‘നിങ്ങളുടെ ആത്മശക്തിയും… പിന്നേ നിങ്ങൾ സ്വീകരിച്ച ആത്മാവിന്റെ ശക്തിയും ഉപയോഗിച്ച് ഏത് തരം ആയുധത്തെ വേണമെങ്കിലും നിങ്ങള്‍ക്ക് സൃഷ്ടിക്കാന്‍ കഴിയും. അതെല്ലാ ആയുധങ്ങളും ദൈവഘാതകവാളിന് തുല്യമായ ആയുധങ്ങൾ ആയിരിക്കും എന്നറിയുക.’

‘ഞങ്ങൾ സൃഷ്ടിക്കുന്ന ആയുധങ്ങൾ എല്ലാം ദൈവഘാതകവാൾ പോലെ ശക്തിയുള്ള ആയുധങ്ങൾ ആയിരിക്കും എന്നോ…?!’ അഖില്‍ ആശ്ചര്യത്തോടെ ചോദിച്ചു.

‘നേരാണ് അഖില്‍..’ ഫ്രെൻ പറഞ്ഞു.