മാന്ത്രികലോകം 16 [Cyril] 2193

എന്നാൽ ഉടൻ തന്നെ പുഞ്ചിരി മാറി അവന്‍ ഞങ്ങളെ ഗൌരവത്തോടെ നോക്കി തലയാട്ടി.

“ഞങ്ങൾ എന്താണ് ചെയ്യേണ്ടത്, ഫ്രെൻ…?” സാഷ ചോദിച്ചു.

“നിങ്ങളുടെ മനസ്സിലും ആത്മാവിലും ഹൃദയത്തിലും എല്ലാം ഞാനോ എന്റെ ശക്തിയോ പ്രവർത്തിക്കാൻ ശ്രമിക്കുമ്പോള്‍ എനിക്ക് എതിരായി പ്രതികരിക്കാതെ സഹകരിക്കുക. മറ്റൊന്നും നിങ്ങൾ ചെയ്യേണ്ട കാര്യമില്ല, സാഷ….” അവന്‍ പുഞ്ചിരിച്ചു.

“നിനക്ക് എതിരായി ഇതുവരെ ഞങ്ങൾ പ്രവർത്തിച്ചിട്ടില്ല, ഫ്രെൻ. പക്ഷേ ഞങ്ങൾക്ക് എതിരായി നീയാണ് നിന്റെ മനസ്സിനെ കൊട്ടിയടച്ചിരിക്കുന്നത്.” സാഷ കുറ്റപ്പെടുത്തി.

“ഒരുപാട്‌ കാര്യങ്ങൾ നി ഞങ്ങളില്‍ നിന്നും മറയ്ക്കുന്നു, അതിനെക്കുറിച്ച് സംസാരിക്കാന്‍ നിന്നെ ഞങ്ങൾ മനസ്സ് കൊണ്ട്‌ തിരഞ്ഞാലും… നി മനപ്പൂര്‍വ്വം ഒറ്റപ്പെട്ട് ഞങ്ങളില്‍ നിന്നെല്ലാം അകന്നു നില്‍ക്കുന്നു.” ദനീറും കുറ്റപ്പെടുത്തി.

“ഇപ്പോഴും ഒരുപാട്‌ രഹസ്യങ്ങള്‍ നി ഞങ്ങളില്‍ നിന്നും സൂക്ഷിക്കുന്നു, ഞങ്ങളോട് പോലും നി തുറക്കാന്‍ ആഗ്രഹിക്കാത്ത രഹസ്യങ്ങള്‍. അപ്പോ പിന്നെ സംശയവും അവ്വിശ്വാസവും മാത്രമല്ലേ നമുക്കിടയിൽ ഉണ്ടാകുകയുള്ളു…” എന്റെ വക ഞാനും പറഞ്ഞു.

“തല്‍കാലം നമുക്ക് ഇക്കാര്യം ചർച്ച ചെയ്ത്‌ സമയം കളയണ്ട…”

അത്രയും അവന്‍ നിസ്സാരമായി പറഞ്ഞിട്ട് കണ്ണുമടച്ച് നിന്നു.

അവനോട് ഇനി തര്‍ക്കിക്കാന്‍ കഴിയില്ലെന്ന് ഞങ്ങൾ എല്ലാവർക്കും അറിയാം.

അതുകൊണ്ട്‌ ഞങ്ങൾ പിന്നേ വായ തുറന്നില്ല.
***********

ഫ്രൻഷെർ

അവസാനം ഞാൻ നല്‍കുന്ന ശക്തികളെ സ്വീകരിക്കാന്‍ അവർ തയ്യാറായതും എനിക്ക് സന്തോഷം തോന്നി.

‘ഞങ്ങളെ അവര്‍ക്ക് നൽകാൻ കാരണം, പ്രപഞ്ചത്തിന്റെ നന്മയെ മാത്രം കരുതിയാണോ ഫ്രെൻ..? അതോ തിന്മയെ നി സ്വീകരിച്ചാല്‍ ഞങ്ങൾ നിനക്ക് എതിരായി പ്രവർത്തിക്കും എന്ന ചിന്ത കാരണമാണോ…?’ എന്റെ വാള്‍ എന്റെ മനസില്‍ ദേഷ്യത്തോടെ ചോദിച്ചു.

‘നിന്റെ വായ്ത്തല മാത്രമല്ല, നിന്റെ വാക്കുകളും മൂര്‍ച്ചയേറിയതാണ്…’ എന്റെ വാളിനോട് ഞാൻ പറഞ്ഞു.

‘എന്റെ ചോദ്യത്തിന്‌ നി ഉത്തരം പറഞ്ഞില്ല…’ ഘാതകവാൾ അതേ ദേഷ്യത്തില്‍ തന്നെ പറഞ്ഞതും ഞാൻ ചിരിച്ചു.

“ഇതില്‍ ചിരിക്കാന്‍ എന്തിരിക്കുന്നു, ഫ്രെൻ..?” ക്ഷണകാന്തി കുറ്റപ്പെടുത്തും പോലെ ചോദിച്ചു.

‘പ്രകൃതി ശക്തികളും നിഗൂഢ ശക്തികളും ശെരിക്കും ചിന്തിക്കാത്തതിന്റെ ഫലമാണ് അവർ ഒഷേദ്രസിന്റെ അംശമായി മാറാൻ കാരണം. അവരെപ്പോലെ തന്നെയാണ് നിങ്ങളും ചിന്തിക്കുന്നില്ല. പ്രകൃതി നിങ്ങളെ സൃഷ്ടിച്ചത് കൊണ്ടാണോ നിങ്ങള്‍ക്കും ചിന്തിക്കാനുള്ള ശേഷി ഇല്ലാത്തത്…?’ ഞാൻ ചോദിച്ചു.

‘ഇപ്പോൾ നി ഞങ്ങളെ പരിഹസിക്കാനും തുടങ്ങിയിരിക്കുന്നു, ഫ്രെൻ..’ ക്ഷണകാന്തി പിന്നെയും കുറ്റപ്പെടുത്തി.

‘നിങ്ങൾ എന്നേക്കാളും ശക്തരല്ല…’ ഞാൻ പറഞ്ഞു.