മാന്ത്രികലോകം 16 [Cyril] 2193

അതും ഇരുപത് അതിശക്തരായ ദൈവങ്ങളാണ് ഞങ്ങളെ ചുറ്റി വളഞ്ഞ് നിന്നത്.

ഇപ്പോഴുള്ള ഞങ്ങളുടെ ശക്തി ക്ഷയിച്ച അവസ്ഥയില്‍ ഞങ്ങൾക്ക് ഒന്നും ചെയ്യാൻ കഴിയുമായിരുന്നില്ല.

ഈ അവസ്ഥയില്‍ മറ്റുള്ള ആയുധങ്ങളിൽ നിന്നും ആത്മാവിനെ സ്വീകരിച്ചാല്‍ ഒരു സെക്കന്റ് കൊണ്ട് അത് ഞങ്ങളെ ആയിരിക്കും നിയന്ത്രിക്കുക.

“നിങ്ങളുടെ ശക്തി ഇപ്പോൾ ക്ഷയിച്ച നിലയില്‍ ആണെന്ന് എനിക്കറിയാം…” മലാഹി അട്ടഹസിച്ച് ചിരിച്ചു.

ഞങ്ങൾ അവനെ തുറിച്ചുനോക്കി.

“നിങ്ങളെ ഞാൻ നിയന്ത്രിച്ച് എന്റെ അടിമകളാക്കി മാറ്റി, നിങ്ങളെ കൊണ്ടുതന്നെ മനുഷ്യരെയും മാന്ത്രികരേയും ഞാൻ നശിപ്പിക്കും. നിങ്ങളെ ഉപയോഗിച്ച് ഞാൻ നിങ്ങളുടെ ശിബിരത്തെ നശിപ്പിക്കും, യക്ഷർക്കും ഫെയറികൾക്കും എതിരായി നിങ്ങളെ ഞാൻ പ്രയോഗിക്കും….” മലാഹി ഭ്രാന്തനെ പോലെ ചിരിച്ചു.

ഞങ്ങളുടെ മനസില്‍ അവനോടുള്ള ദേഷ്യവും വെറുപ്പും വര്‍ധിച്ചു… ഒപ്പം ഭയവും.

“അവരുടെ ആത്മാവിനെ ബന്ധിക്കു, അവരുടെ ഹൃദയത്തിൽ നിർമാർജ്ജന കവചത്തെ സൃഷ്ടിക്കു… എന്നിട്ട് നമ്മുടെ മാന്ത്രിക തടവില്‍ അവരെ തളയ്ക്കുക. എന്റെ സൗകര്യം പോലെ അവരെ ഞാൻ പിന്നേ കണ്ടോളാം….” ഞങ്ങളെ വളഞ്ഞ് നിന്ന ദൈവങ്ങളെ നോക്കി മലാഹി ഗര്‍ജ്ജിച്ചു.

എന്നാൽ അത്രവേഗം കീഴടങ്ങാൻ ഞങ്ങൾ തയ്യാറായില്ല. പക്ഷേ ഇരുപത് ദൈവങ്ങളെ ആക്രമിച്ച് വിജയം നേടാനും കഴിയില്ലെന്ന് ഞങ്ങൾക്കറിയാം.

അതുകൊണ്ട്‌ ഞങ്ങൾ പത്തുപേരും മിന്നല്‍ വേഗത്തിൽ അഞ്ച് ദൈവങ്ങളെ ആക്രമിച്ചു-:

എന്റെയും ദനീറിന്റെയും വാളുകൾ ഒരു ദൈവത്തിന്റെ ഹൃദയത്തെയും — അഖില്‍ ഹെമീറയുടെ വാളുകൾ മറ്റൊരു ദൈവത്തിന്റെ ഹൃദയത്തിലേക്കും തറച്ചു കയറി….,

സിദ്ധാര്‍ത്ഥ്….ഫ്രേയയുടെ കഠാരകൾ മൂന്നാമത്തെ ദൈവത്തിന്റെ ഹൃദയത്തെ തുളച്ച അതേസമയം, സാഷ….ഫ്രേയയുടെ അസ്ത്രങ്ങൾ നാലാമത്തെ ദൈവത്തിന്റെ ഹൃദയത്തിൽ തറച്ചു നിന്നു…,

അവസാനം അമ്മുവിന്റെ കഠാരയും ഈഫിയയുടെ അസ്ത്രവും അഞ്ചാമത്തെ ദൈവത്തിന്റെ ഹൃദയത്തിലേക്ക് തറച്ചിരങ്ങി.

ഇത്രയും ചെയ്യാൻ, കണ്ണുചിമ്മി തുറക്കുന്നതിന്റെ പത്തിലൊന്ന് സമയം പോലും ഞങ്ങൾക്ക് വേണ്ടിവന്നില്ല.

ഒരു സെക്കന്റ് നേരത്തേക്ക് മലാഹിയും ദൈവങ്ങളും സ്തംഭിച്ച് നിന്നു.

പക്ഷേ ശേഷിച്ച പതിനഞ്ച് ദൈവങ്ങളും പെട്ടന്ന് തന്നെ ഞങ്ങളില്‍ നിന്നും അകന്നുമാറി ഒന്നിച്ച് കൂടിനിന്ന ശേഷം അവര്‍ക്ക് ചുറ്റിലും ഒരു മാന്ത്രിക സംരക്ഷണ വലയം സൃഷ്ടിച്ചു.

ഞങ്ങളാൽ ആക്രമിക്കപ്പെട്ട ദൈവങ്ങളുടെ മനസ്, ആത്മാവ്, ഹൃദയത്തിൽ നിന്നെല്ലാം സകല ശക്തിയും വലിച്ചെടുത്തു കൊണ്ട്‌ ഞങ്ങളുടെ ആയുധങ്ങൾ അപ്രത്യക്ഷമായി.