ഫെയർവൽ പ്രൊപോസൽ

Author : കാലം സാക്ഷി

” എടോ തനിക്ക് എന്നെ അത്രക്കിഷ്ടമാണോ? ” എന്റെ സഘല ധൈര്യവും സംഭരിച്ച് എന്റെ ഇഷ്ടം ഞാൻ തുറന്ന് പറഞ്ഞപ്പോൾ അവളുടെ പ്രതികരണം അതായിരുന്നു. അവളുടെ സ്ഥായിയായ നർമത്തിൽ കലർന്ന പുഞ്ചിരിയോടെ അവളെങ്ങനെ ചോദിച്ചപ്പോൾ എനിക്ക് പെട്ടന്ന് ഉത്തരം കിട്ടിയില്ല.

” അത്… അതങ്ങനെ അളക്കാനൊന്നും പറ്റില്ല! എനിക്ക് തന്റെ കൂടെയിരിക്കാനും, കൂടെ നടക്കാനും, തന്നോട് തമാശകൾ പറയാനും തന്റെ തമാശകൾ കേട്ട് ചിരിക്കാനുംമൊക്കെ ഒത്തിരി ഇഷ്ടമാണ്. താൻ അകന്നിരിക്കുമ്പോൾ മനസ്സിന് എന്തെന്നില്ലാത്ത ആവലാതിയാണ്.” അവളുടെ ചോദ്യത്തിന് മുന്നിൽ ആദ്യമൊന്ന് പതറിയെങ്കിലും എന്റെ മറുപടി ഹൃദയത്തിൽ നിന്നുള്ളതായിരുന്നു.

” പിന്നെന്താ താനിത് മുമ്പ് പറയാത്തത് ” അവളുടെ ആ ചോദ്യത്തിനും അകമ്പടി ചുണ്ടിലെ മന്ദാഹാസമായിരുന്നു.

” എനിക്കറിയില്ലെടോ ഞാൻ തന്നെ എപ്പോഴാണ് ഇഷ്ടപ്പെട്ടു തുടങ്ങിയതെന്ന്, ആദ്യം താനെനിക്കൊരു നല്ല ഫ്രിണ്ടായിരുന്നു! പക്ഷെ കൂടുതലടുത്തപ്പോൾ താൻ എനിക്ക് അതിൽ കൂടുതൽ എന്തോ ആണെന്നൊരു തോന്നൽ. തന്റെ ചില നേരത്തെ പ്രവർത്തികളിൽ തനിക്കും എന്നോട് അങ്ങനെ ഒരിതുള്ളത് പോലെ തോന്നിയിട്ടുണ്ട്. പക്ഷെ ഇപ്പോൾ എന്നന്നേക്കുമായി നമ്മൾ പിരിയുകയാണ് എന്നോർക്കുമ്പോൾ എനിക്ക് കഴിയില്ലെടോ തന്നെ നഷ്ടപ്പെടുത്താൻ. ” എന്റെ മറുപടി കേട്ടപ്പോൾ അല്പം ദേഷ്യത്തോടെ എന്നെ നോക്കുന്ന അവളെ കണ്ടപ്പോൾ എന്റെ കയ്യും, കാലും അനിയന്ത്രിതമായി വിറക്കാൻ തുടങ്ങി.

” ഞാനെപ്പഴാടോ തന്നോട് പ്രേമമാണെന്ന് പറഞ്ഞത്” അവളുടെ ആ ചോദ്യത്തിന് മുന്നിൽ ഞാൻ നിന്ന് വിയർത്തു.

” അത് പിന്നെ താനങ്ങനെ പറഞ്ഞു എന്നല്ല. തന്റെ പ്രവർത്തികളിൽ തോന്നി എന്നാണ് ഞാൻ പറഞ്ഞത് ”

” അത് ഞാൻ കുറച്ചു ഫ്രിണ്ട്‌ലിയായി പെരുമാറിയതല്ലേ? ” അവളുടെ ആ മറുപടി വീണ്ടുമെന്നിൽ ഭയം നിറച്ചു.

” അപ്പോൾ അന്ന് ഞാൻ ഫോൺ വെച്ചിട്ട് പുറത്ത് പോയപ്പോൾ താൻ വിളിച്ചിട്ട് കിട്ടിയില്ല എന്ന് പറഞ്ഞ് 32 മിസ്സ്കോളും 87 മെസ്സേജും അയച്ചതോ? ”

” അത് പിന്നെ അത്യാവശ്യ കാര്യം പറയാൻ വിളിച്ചിട്ട് എടുക്കാത്തത് കൊണ്ടല്ലേ? ” അവൾ ഞായം പറഞ്ഞു.

” പിന്നെ അമ്പലത്തിൽ പോയിട്ട് തിരിച്ചെത്തി എന്ന് പറയുന്നതല്ലേ അത്യാവശ്യകാര്യം ” ഞാനത് പറഞ്ഞപ്പോൾ അവളുടെ ചുണ്ടിലെവിടെയോ നാണം കലർന്നൊരു ചിരി മിന്നി മറഞ്ഞോ?

” അത് പോട്ടെ ഒരു ദിവസം കോളേജിൽ നിന്ന് ഞാൻ നേരത്തെ പോയപ്പോൾ തന്നോട് പറഞ്ഞില്ല എന്ന് പറഞ്ഞ്, രണ്ട് ദിവസം എന്നോട് മിണ്ടാതെ നടന്നതോ? ഞാൻ എത്ര കഷ്ടപ്പെട്ടിട്ടാണ് പിന്നെ താനെന്നോട് മിണ്ടിയത്. ” ഞാനെന്റെ അടുത്ത ആയുധം പ്രയോഗിച്ചു.