*പ്രണയമഴ…?* 3 398

ഒരു കപ്പിൽ ചായ പകർന്ന് പാത്രം അടച്ച് വെച്ച് അവൾ മുറിയിലേക്ക് തന്നെ ചെന്നു… ജനലോരം ചേർന്ന് നിന്ന് ചായ മുത്തി കുടിച്ചു… മനസ്സിൽ പലപല ചിന്തകളും മിന്നിമറഞ്ഞു…

“എന്തിനായിരിക്കും അശ്വിൻ തന്നെ കല്യാണം കഴിച്ചത്… കോളേജിൽ പഠിക്കുമ്പോൾ അർജുന്റെ കൂടെ കണ്ടിട്ടുണ്ടെങ്കിലും കൂടുതൽ ശ്രദ്ധിച്ചിരുന്നില്ല… അല്ലെങ്കിലും അർജുൻ എന്ന വ്യക്തിക്ക് മുന്നിൽ വേറെ ഒരാളും തന്റെ മുന്നിൽ കണ്ടിരുന്നില്ല എന്ന് വേണം പറയാൻ… വെളുത്ത് ജിം ബോഡിയും കട്ടതാടിയും ഏതൊരു പെണ്ണിന്റെ ഇഷ്ട്ടം പോലെ ബുള്ളറ്റിൽ ഹീറോയെ പോലെ വന്നിറങ്ങുന്ന അർജുനോട് തനിക്ക് ആരാധന ആയിരുന്നു…

വെറുതെ ഒരു രസത്തിന് ആളെ ഒന്ന് നോക്കി തുടങ്ങി…ഒരിക്കൽ പ്രതീക്ഷിക്കാതെ തന്നോട് വന്ന് ഇഷ്ട്ടാണെന്ന് വന്ന് പറഞ്ഞപ്പോൾ അത്ഭുതം ആയിരുന്നു…!! സന്തോഷം ആയിരുന്നു…!! ഒട്ടും ആലോചിക്കാതെ തിരിച്ചും ഇഷ്ട്ടം അറിയിച്ചപ്പോൾ എന്തോ ലോകം വെട്ടിപ്പിടിച്ച സന്തോഷം ആയിരുന്നു…

പിന്നീട് അങ്ങോട്ടുള്ള ദിവസങ്ങൾ പ്രണയം മാത്രം പെയ്തിറങ്ങുന്ന ഋതുക്കൾ ആയിരുന്നു… എല്ലാത്തിനും തന്റെ കൂടെ നിന്ന് തന്നെ സന്തോഷിപ്പിക്കാൻ മാത്രം നോക്കുന്ന അർജുനോട് ദിനംപ്രതി ഇഷ്ട്ടം കൂടുകയല്ലാതെ ഒരു തരി പോലും കുറഞ്ഞിരുന്നില്ല… അങ്ങനെ ബി എസ് സി കഴിഞ്ഞ് താൻ ഇറങ്ങിയതും അർജുനും പിജി കംപ്ലീറ്റ് ചെയ്ത് ഒരു ഓഫീസിൽ ജോലിക്ക് കയറിയിരുന്നു…

ഇനിയും വൈകിപ്പിക്കണ്ട ഇത് തന്നെയാണ് നല്ല അവസരം എന്ന് പറഞ്ഞ് അർജുൻ തന്നെയാണ് അവന്റെ വീട്ടുകാരെ കൂട്ടി വീട്ടിലേക്ക് വന്നത്… നല്ല സ്നേഹമുള്ള അച്ഛനും അമ്മയും… എന്നാൽ എന്ത് കൊണ്ടോ അച്ഛന് ഒട്ടും താല്പര്യം ഉണ്ടായിരുന്നില്ല ഈ ആലോചനയോട്… താൻ പട്ടിണി കിടക്കുന്നത് കാണാൻ കഴിയാതെയാണ് അച്ഛൻ സമ്മതിച്ചത്…. തനിക്ക് ഉറപ്പായിരുന്നു ഈ ലോകത്ത് ഞാൻ ഏറ്റവും സുരക്ഷിതവും സന്തോഷവതിയും ആയിരിക്കുക അർജുന്റെ പക്കൽ ആവും എന്ന്…

എല്ലാം തകിടം മറിഞ്ഞത് കല്യാണം കഴിഞ്ഞ് രണ്ട് ദിവസം കൊണ്ടായിരുന്നു… തന്റെ തീരുമാനം തെറ്റാണെന്ന് ബലം പ്രയോഗിച്ച് തന്നിലെ പെണ്ണിനെ കീഴ്പ്പെടുത്താൻ ശ്രമിക്കുന്ന അർജുനെ തടഞ്ഞപ്പോൾ അവന്റെ ബലിഷ്ടമായ കൈകൾ മേനിയിൽ മുറിവ് തീർത്തപ്പോൾ ആണ്…!! ഇന്ന് വരെ താൻ അറിയാതെ പോയ സത്യവും അന്ന് തനിക്ക് മുന്നിൽ വെളിപ്പെട്ടപ്പോൾ നടുങ്ങി പോയിരുന്നു… തന്റെ പ്രാണൻ എന്ന് നിനച്ചവൻ കള്ളിനും കഞ്ചാവിനും സ്ത്രീക്കും അടിമയാണെന്ന് അറിഞ്ഞപ്പോൾ താനെന്ന ഭാര്യ അലറി കരഞ്ഞ് പോയിരുന്നു…