പിച്ചിച്ചീന്തിയെടുത്ത പ്രണയകഥകൾ(പാർട്ട്‌ 2 )[Vickey wick] 103

തിരിയും കെടുത്തി ഗ്ലാസും ഒതുക്കി വെച്ച് കുപ്പിയും കാട്ടിൽ എറിഞ്ഞു ഞങ്ങൾ കാറിൽ നിന്നിറങ്ങി. പാമ്പനും നായകനും മാത്രമാണ് ഇത്തവണ പോയത്. അവനെ പെരമോളിൽ കേറ്റി വിട്ടിട്ടു പാമ്പനും കേറി പിന്നാലെ കയർ അഴിക്കാൻ. നായകൻ തുറന്നിരുന്ന ഓടിന്റെ വിടവിലൂടെ താഴേക്കു ഇറങ്ങി. പാമ്പൻ പെരമോളിൽ കൂടി നിരങ്ങി പകുതി എത്തിയതേ ഉള്ളു. ഉടനെ ഒരു ബഹളം.

“കള്ളൻ… കള്ളൻ… അച്ചായാ… “

പാമ്പന് എന്താ നടക്കുന്നതെന്നു ഒരു പിടിയും കിട്ടിയില്ല. നായകനും. ഒരു കാര്യം മാത്രം അവൻ ഞെട്ടലോടെ മനസിലാക്കി അവൻ നിക്കുന്നത് അവന്റെ മുറിയിൽ അല്ല. അപ്പച്ചനും അമ്മച്ചിയും കിടന്നുറങ്ങുന്ന മുറിയിൽ ആണ്. പ്രശ്നം എന്താന്നു മനസിലായില്ലെങ്കിലും എന്തോ പ്രശ്നമുണ്ടെന്നു പിടി കിട്ടിയ പാമ്പൻ പാമ്പിനെക്കാളും വേഗത്തിൽ പേരമോളിൽ നിന്നും ഇഴഞ്ഞിറങ്ങി.

“കള്ള നായിന്റെ മോനെ നീ പാതിരാത്രിക്ക് കള്ളും വലിച്ചു കേറ്റി അപ്പന്റെ മുറിയിൽ മോഷ്ടിക്കാൻ കേറിയേക്കുന്നോ… “

ഓടുന്ന വഴി പാമ്പൻ അവ്യക്തമായി ഈ ഡയലോഗും കേട്ടു. അവൻ പറമ്പിൽ വന്നെങ്കിലും നിന്നില്ല. ഓടിക്കോട എന്നും പറഞ്ഞു പറമ്പ് വഴി ഓടിപ്പോകുന്നത് ആണ് കണ്ടത്. കാര്യം പിടികിട്ടിയില്ലേലും പ്രശ്നം ഗുരുതരം ആണെന്ന് ഞങ്ങൾക്കും കത്തി. ഞാൻ എന്റെ ജീവിതത്തിൽ അന്നേവരെ അത്രേം വേഗം അത്രേം ദൂരം ഓടിട്ട് ഇല്ല. പ്രശ്നമെന്താന്ന് പോലും അറിയില്ലല്ലോ. വേഗം റൂമിൽ കേറി പുതച്ചു മൂടി കിടന്നു. ഒരു രണ്ടു മിനിറ്റ് കഴിഞ്ഞു കാണും, അപ്പച്ചൻ വന്ന് ഡോർ തുറന്നു നോക്കി. കുറച്ചു അങ്ങനെ നോക്കിട്ട് പുള്ളി പോയി. എനിക്ക് ആകെ അങ്കലാപ്പായി. ഞാൻ അപ്പച്ചൻ പോയി കഴിഞ്ഞപ്പോ ലാൻഡ് ഫോണീന്നു പാമ്പനെ വിളിച്ചു. അവനു ഒരു ചെറിയ മൊബൈൽ ഉണ്ടാരുന്നു.

“ഡാ, എന്താ സംഭവം? അപ്പച്ചൻ ദാണ്ടേ വന്നു നോക്കിട്ടും പോയി? എന്നാടാ ഉണ്ടായേ?”

“ഒന്നും പറയണ്ട ഡോണേ, വാർഡനും ഇപ്പൊ വന്ന് ചെക്ക് ചെയ്തിട്ട് പോയി. ഡാ, അവനെ വീട്ടിൽ പിടിച്ചെടാ. എന്താ എങ്ങനാന്ന് അറില്ല, അവൻ തൂങ്ങി ചെന്ന് ഇറങ്ങിത് അപ്പന്റെ മുറിയിലേക്കാ. അവന്റെ അപ്പൻ നമ്മുടെയെല്ലാം വീട്ടിലേക്കും ഹോസ്റ്റലിലേക്കും വിളിച്ചു കാണും. നാളെ നമ്മളെയെല്ലാം പോക്കും. ഒറപ്പാ.”