പിച്ചിച്ചീന്തിയെടുത്ത പ്രണയകഥകൾ(പാർട്ട്‌ 2 )[Vickey wick] 103

മുറിയടിച്ചു വാരുന്നതിനിടയിലുള്ള അമ്മയുടെ ആ കമെന്റ് ആണ് എന്നെ എഴുന്നേൽക്കാൻ പ്രേരിപ്പിച്ചത്. ശനിയാഴ്ച എന്തേലും ഒക്കെ പ്ലാനിങ് ഉണ്ടാകും ഞങ്ങൾക്ക്. ക്രിക്കറ്റ്‌ കളിയോ, വേറെ എന്തേലും കളിയോ, ചുമ്മാ കറങ്ങി നടപ്പോ, വർത്താനം പറഞ്ഞിരുപ്പോ അങ്ങനെ എന്തുമാകാം. ഞാൻ വേഗം പല്ലുതേപ്പും ചായകുടിയും ഒക്കെ കഴിഞ്ഞ് സ്ഥിരം സ്ഥലത്തേക്ക് തിരിച്ചു. ജോൺസൻ ചേട്ടന്റെ കട. അവിടെ വേറെ ഒരിടത്തും കിട്ടാത്ത അത്രേം വെറൈറ്റി മൊട്ടായികൾ കിട്ടുമാരുന്നു. പുളിമോട്ടായി ഞങ്ങളുടെ ഒരു സ്പെഷ്യൽ ഐറ്റം ആരുന്നു. വേറെ കടേലെ പോലെ അല്ല. ജോൺസൻ ചേട്ടന്റെ കടയിലെ പുളിമുട്ടായിക്ക് പുളിയും ചെറിയ എരുവും ചെറിയ മധുരവും ഉണ്ടായിരുന്നു. ഈ ഇഞ്ചിക്കറിയുടെ വേറെ ഒരു മോഡൽ എന്ന് വേണേൽ പറയാം. ഞങ്ങൾ അവിടെ എത്തിയതും റിനുവും ഗാങ്ങും എത്തിയതും ഒരുമിച്ച് ആയിരുന്നു.

“എന്താ മക്കളെ വേണ്ടത്?”

ജോൺസൻ ചേട്ടൻ ചോദിച്ചു.

“ചേട്ടാ പുളിമുട്ടായി. “

വൈഷ്ണ ചാടിക്കേറി പറഞ്ഞു.

പുളിമുട്ടായി ആണേൽ ആകെ കുറച്ചേ ഉള്ളു. ഞങ്ങൾ രണ്ടു ഗ്യാങിനും എന്താണേലും തികയില്ല. ആകെ പ്രശ്നമായി. ചേട്ടനും ആകെ ധർമസങ്കടത്തിൽ ആയി.

“ഞങ്ങളാ ആദ്യം വന്നത്. ഞങ്ങൾ എടുതിട്ട് ബാക്കി ഉണ്ടേൽ നിങ്ങൾ കൊണ്ടൊക്കോ.”