പിച്ചിച്ചീന്തിയെടുത്ത പ്രണയകഥകൾ(പാർട്ട്‌ 2 )[Vickey wick] 103

“അളിയാ ഞാൻ ഒരു രസംകൊല്ലിയാണെന്ന് കരുതരുത്… എപ്പഴും എപ്പഴും കഥാനായകൻ ന്നു പറയുന്നുണ്ടല്ലോ. ഈ കഥാനായകന് പേരില്ലേ?

വിഷ്ണു ഇടയ്ക്കു കയറി വീണ്ടും ഒരു ചോദ്യം കൂടി എടുത്തിട്ടു.

“ഡാ, ഞാൻ ഇങ്ങനെ പേര് പറയാതെ പറയാൻ എന്തേലും ഒരു കാരണം ഇല്ലാതിരിക്കുവോ? അത് ലാസ്റ്റ് പറയാം. ഇപ്പൊ നീ കഥ കേക്ക്.”

“അഹ്, ഓക്കേ… എന്തേലും കാരണം ഉണ്ടായ മതി… തൽക്കാലം ഞാൻ എന്നെ തന്നെ അവിടെ സങ്കൽപ്പിച്ചോളാം.”

ഡോൺ വീണ്ടും ആ രസചരട് മുറിഞ്ഞതിന്റെ ഒരു നിരാശയോടെ ബാക്കി പറയാൻ തുടങ്ങി.

“അത് നീ എന്നേലും കാണിക്ക്, ഓ… എവിടെവരെയായെന്നും മറന്നു പോയി, കോപ്പ്… ആ… അങ്ങനെ ഞങ്ങൾ നമ്മുടെ ഹീറോയെ ഇറക്കുവാൻ ഉള്ള കലാപരിപാടികൾ ആരംഭിച്ചു. അവന്റെ വീട് ഓടിട്ടത് ആയിരുന്നു. മാത്രമല്ല തൊട്ട് അടുത്ത് അതിന്റെ മേൽക്കൂരവരെ ഉള്ള ഒരു മാടും ഉണ്ടായിരുന്നു. ആ മാടിൽ നിന്നും സിമ്പിൾ ആയി മേൽക്കൂരമേലേക്ക് ഇറങ്ങാം. ഞങ്ങൾ ഈ കാര്യത്തിന് മാത്രമായി ഒരു കയർ സൂക്ഷിച്ചിട്ട് ഉണ്ടായിരുന്നു. പാമ്പൻ ആയിരുന്നു കൂട്ടത്തിൽ സ്വൽപ്പം അഭ്യാസി. അതുകൊണ്ട് സ്ഥിരം ഹീറോയെ പുറത്തെത്തിക്കാൻ മച്ചിൽ കയറുന്നതും അവനായിരുന്നു. പാമ്പൻ കയറുമായി ഓടിൻപുറത്തേക്ക് കയറും. എന്നിട്ട് പതുക്കെ അവന്റെ റൂമിനു മുകളിൽ എത്തി ഓടുമാറ്റി കയർ കഴുക്കോലിൽ കെട്ടി താഴേക്കു ഇടും. അവൻ ഒരു തരത്തിൽ വലിഞ്ഞു കയറി പുറത്തെത്തും. അന്നൊക്കെ ചെറുപ്പമായത്കൊണ്ട് ഒരു പേടിയും തോന്നിയില്ല. ഇന്നിപ്പോ ഓർക്കുമ്പോ… എങ്ങാനും ഒന്ന് തെന്നിയാൽ…ആ… അത് പോട്ടെ. അങ്ങനെ അവനെയും പുറതെത്തിച്ച് രണ്ടാളും മാട്ടപ്പുറത്തേക്ക് കയറി പറ്റും.