നിഴലായ് അരികെ – 19 [ ചെമ്പരത്തി ] 698

കുറച്ചുനേരം അവിടെ നിന്ന് ഫോട്ടോ എടുത്തിട്ട് അവൾ ഉയർന്ന ഒരു പാറയിലേക്ക് കയറി ക്യാമറ കാർത്തികയിൽ കൊടുത്തേച്ച് അവൾ നന്ദന അടുത്തേക്ക് വിളിച്ചു…..

അവന്റെ വിരൽത്തുമ്പിൽ പിടിച്ചുകൊണ്ട് അവൾ പാറയിലേക്ക് കയറി

തെന്നിത്തെറിക്കുന്ന പാറക്ക് താഴെ അഗാതമായ കൊല്ലി ആണ് നിറയെ പാറക്കെട്ടുകളും….വീണാൽ ചിതറിയ ശരീരം അല്ലാതെ മറ്റൊന്നും കിട്ടില്ല….. കുറച്ചു മാറി നിന്ന ഗർഡുകൾ  താഴെ ഇറങ്ങാൻ വിളിച്ചു പറയുന്നുണ്ടായിരുന്നു എങ്കിലും വെള്ളച്ചാട്ടത്തിന്റെ അലർച്ചക്കിടയിൽ അതു അവരുടെ കാതിൽ എത്തിയില്ല…..

നന്ദന്റെ കൈവിരലിൽ മുറുകെ പിടിച്ചു അവനു കൂടി കയറിനില്ക്കാൻ വേണ്ടി അവൾ ഒന്ന് കൂടി ഒതുങ്ങിയെങ്കിലും അൽപ്പം ഉയരമുള്ള ചെരുപ്പിൽ നിന്നും കാൽ വഴുതിയവൾ സർവത്തിനെയും ക്കൊണ്ട് പോകാൻ വെമ്പി ഒഴുകുന്ന വെള്ളത്തിലേക്കു വീണു….

നന്ദന്റെ വിരൽത്തുമ്പിൽ മുറുകെ പിടിച്ചിരുന്നു എങ്കിലും, അതൊന്നും അപ്രതീക്ഷിതമായ ആ വീഴ്ചയെ മറികടക്കാൻ കഴിയുന്നതായിരുന്നില്ല……

അവൾ നിന്ന ആ പാറയിലേക്ക് കിടന്നുകൊണ്ട് അവളെ കയ്യെത്തി പിടിക്കാൻ നന്ദൻ ശ്രമിച്ചുവെങ്കിലും, വഴുക്കൽ നിറഞ്ഞ പാറയിൽ പിടിച്ചിരുന്ന അവളുടെ കൈകൾ തെന്നിപ്പോയി….

മരണത്തിലേക്കു പോകുമ്പോഴും അവളുടെ കണ്ണുകൾ നന്ദന്റെ മുഖത്തു തറഞ്ഞു നിന്നിരുന്നു…..

തന്റെ സർവ്വവും ആയിരുന്നവൾ, തന്റെ വിരൽത്തുമ്പ് പിടിച്ചു വളർന്നു വന്നവൾ, ഒടുവിൽ അത്രയേറെ ആഗ്രഹിച്ചു തന്റെ വിരൽത്തുമ്പ് പിടിച്ചു തന്റെ ജീവിതത്തിലേക്കു കയറി വന്നവൾ………