നന്ദന 8 [Rivana] 148

പക്ഷെ അവർ ഇറങ്ങാൻ പറഞ്ഞപ്പോൾ ഞാൻ ചെറു മടിയോട് പുറത്തേക്ക് ഇറങ്ങി.

കാറിൽ നിന്നും പുറത്തിറങ്ങി ഞാൻ വീടും പരിസരവും ഒക്കെ ഒന്ന് വീക്ഷിച്ചു. അത്യാവശ്യം സൗകര്യം ഒക്കെയുള്ള ഒരു വീടായിരുന്നു അത്.വീടിനോട് ചേർന്ന് ഗാർഡനും കാര്യങ്ങളും ഒക്കെയുണ്ട്. അവിടെ എല്ലാം ഒന്ന് കണ്ണോടിച്ചതിന് ശേഷം നേരെ ഞാൻ കോലായിലേക്ക് നോക്കി.

അവിടെ വീടിന്റെ ഉമ്മറത്ത് തന്നെ നിറ പുഞ്ചിരിയോടെ തന്നെ വീക്ഷിക്കുന്ന ഉമ്മയെ ഞാൻ കണ്ടു.

ഞാൻ നോക്കുന്നത് കണ്ടതും ഉമ്മ സന്തോഷത്തോടെ എന്റെ അരികിലേക്കു വന്നു.

“ മോളെ സുഖാണോ നിനക്ക്,,, എത്ര കാലായി മോളെ ഒന്ന് കണ്ടിട്ട് “ എന്നെ ഒരു കൈ കൊണ്ട് ചേർത്ത് പിടിച്ച് മറു കൈ കൊണ്ട് കവിളിൽ തലോടി കൊണ്ട് പറഞ്ഞു.

“ ആ സുഖാണ് ഉമ്മാ,, “ ഞാനും പുഞ്ചിരി തൂകികൊണ്ട് പറഞ്ഞു.

“ വാ മോളെ നമുക്ക് അകത്തേക്ക് കയറാം എന്നിട്ടാവാം ബാക്കി സംസാരം ഒക്കെ “ എന്നെ വിളിച്ചു കൊണ്ട് മുന്നോട്ട് നടന്നു.

“ ഉമ്മ എന്റെ ബാഗും സാധനങ്ങൾ ഒക്കെ കാറിലാണ് “

“ അതൊക്കെ ഉപ്പ എടുത്ത് കൊണ്ടുവന്നോളും “ ഉമ്മ ഉപ്പയെ നോക്കികൊണ്ട് പറഞ്ഞു.

“ നിങ്ങൾ എല്ലാരും കൂടെ ഇപ്പൊ എന്നെ ഒരു വേലക്കാരൻ ആക്കിയോ “ ഉപ്പ സ്വൽപം ഞെട്ടൽ അഭിനയിച്ചു കൊണ്ട് പറഞ്ഞു.

“ നിന്ന് വർത്താനം പറയാതെ ആ സാധനങ്ങളും എടുത്ത് ഉള്ളിലേക്ക് വാ മനുഷ്യ,,, എനിക് എന്റെ കൊച്ചിനോട് ഒരുപാട് കാര്യങ്ങൾ ചോദിച്ചറിയാൻ ഉള്ളതാണ് “ ഉമ്മ ഉപ്പയുടെ വാക്കുകൾക് മറുപടി കൊടുത്തിട്ട് എന്നേം കൂട്ടി മുന്നോട്ട് നടന്നു.

ഞാൻ ഉമ്മയെ നോക്കിയപ്പോ കണ്ണ് അടച്ചു പല്ലും കാട്ടി ചിരിച്ചു ഒന്നുമില്ലെന്ന പോലെ കാണിച്ചു.

അത് കണ്ട ഞാൻ ഒന്ന് ചിരിച്ചു പുറകിലേക്ക് തിരിഞ്ഞു ഉപ്പയെ നോക്കി. അപ്പോളവിടെ റയ ഉപ്പയെ നോക്കി വായും പൊത്തി കളിയാക്കി ചിരിക്കുന്നത് ആണ് കണ്ടത്.

ഞാൻ പിന്നെ ഉമ്മയോടപ്പം ഉള്ളിലേക്ക് നടന്നു.

പണ്ട് ഞാൻ റംഷിയുടെ വീട്ടിലേക്ക് പോകുമ്പോഴൊക്കെയും ഒരമ്മയുടെ സ്നേഹവും വാത്സല്യവും ഒക്കെ ഉമ്മ എന്നോട് കാണിക്കുമായിരുന്നു.

ആരെയും പെട്ടന്ന് സ്നേഹിക്കാൻ മാത്രം അറിയുന്ന മനസ്സാണ് ഉമ്മയുടെ, അത് ഞാൻ ഒരുപാട് തവണ അനുഭവിച്ചറിഞ്ഞതാണ്. എന്നെ നേരെ കൊണ്ട് ഹാളിൽ ഉള്ള സോഫയിൽ ഇരുത്തി ഉമ്മയും എന്റെ കൂടെ ഇരുന്ന് ഓരോ കാര്യങ്ങളും എന്നോട് ചോദിച്ചറിയുകാണ് ഉമ്മ.

അന്ന് അവിടെന്ന് വീട് മാറി ഇങ്ങോട്ട് വന്ന അന്ന് മുതൽക്കുള്ള കാര്യങ്ങൾ ഒന്നുവിടാതെ ചോദിക്കുകയാണ്.

“ ഉമ്മ ഇന്നെന്ത കഴിക്കാൻ ഉണ്ടാക്കിയിട്ടുള്ളെ,,,അതൊന്ന് എടുത്ത് തരി,, എനിക് വിശന്നിട്ട് നിക്കാൻ പാടില്ല “ ഞങ്ങളുടെ അടുത്തേക്ക് വന്ന് കൊണ്ട് റയ വയറിൽ തടവി ചെറിയ കുട്ടികളെ പോലെ പറഞ്ഞു.

“ ഞാൻ നന്ദൂനോട് സംസാരിച്ചു ഇരിക്കുന്നത് കണ്ടൂടെ നിനക് കുറച്ചു കഴിയട്ടെ ഞൻ നിനക്കു എടുത്ത് തരാം,, അല്ലേൽ അടുക്കളയിൽ പോയി എടുത്ത് കഴിച്ചോ “ ഉമ്മ അവളെ ഒന്ന് തുറിച്ചു നോക്കികൊണ്ട് പറഞ്ഞു.

“ ഉമ്മാ ചേച്ചി ഇപ്പൊ എവിടേക്കും പോകുന്നില്ല,,, കുറച്ചു കഴിഞ്ഞു വേണേലും ചേച്ചിയോട് സംസാരിക്കാം “

“ ഡീ അവൾ കോളേജിൽ നിന്ന് വന്ന പാടല്ലേ റൂമിൽ പോയി ഒന്ന് കുളിച്ചു ഫ്രഷായിക്കോട്ടെ, എന്നിട്ട് ഭക്ഷണം കഴിച്ചിട്ട് ബാക്കി സംസാരിക്കാം നിനക്ക് “ ഉപ്പയും അത് പറഞ്ഞപ്പോ ഉമ്മ ശരി വച്ചുകൊണ്ട് എന്നെ റൂമിലേക്കു പറഞ്ഞു വിട്ടു.

ആ വീട്ടിൽ മൊത്തം അഞ്ചു റൂമാണ് ഉള്ളത്, അടിയിൽ രണ്ടെണ്ണം മുകളിൽ മൂന്നെണ്ണവും.താഴത്തെ ഒരു റൂമിലാണ് ഉമ്മയും ഉപ്പയും ഉപയോഗിക്കുന്നത്. മുകളിലെ രണ്ടു റൂമുകളിൽ ഒന്നിൽ റയയും ഒന്നിൽ റംഷിയും ബാക്കി രണ്ടു റൂമുകൾ വെറുതെ ഇട്ടിരിക്കുകയാണ്.