ദേവസൂര്യ [Sreyas] 178

അത് പണം ആയിരുന്നു.

 

അവൾ അതിന് ശേഷം ഈ കാലയളവിൽ പലപ്പോഴും അവനോട് പറയാതെ പറഞ്ഞിരുന്നു തന്റെ ഇഷ്ടം. അതറിഞ്ഞിട്ടും അവൻ അറിയാത്തത് പോലെ നടിച്ചു.

 

അവളുടെ ഹൃദയം ഇപ്പോൾ തുടിക്കുന്നത് അവനെ കാണാൻ ആണ്.

 

 

 

വൈകുന്നേരം 3.30 ന് സ്കൂൾ വിട്ടപ്പോൾ തന്നെ അവൻ ബാഗും എടുത്ത് പുറത്തേക്കിറങ്ങി. സ്വല്പം വേഗത്തിൽ തന്നെ ആരെയും കാത്തു നിൽക്കാതെ വീട്ടിലേക്ക് നടന്നു. സത്യത്തിൽ അവന് ആരെയും കാത്തുനിൽക്കാൻ സമയമില്ലായിരുന്നു. വീട്ടിൽ നൂറുകൂട്ടം പണി ഇനിയുമുണ്ട്.

 

അവന് പുറകിലായി തന്നെ അവളും നടന്നു. അവൾക്ക് പുറകിലായി കുറച്ച് ആൺ കുട്ടികളുടെ കൂട്ടം തന്നെ ഉണ്ടായിരുന്നു.

 

അവൻ അറിയുന്നുണ്ടായിരുന്നു അവൾ തന്റെ പുറകിൽ ഉണ്ടെന്നുള്ളത്. പക്ഷെ തിരിഞ്ഞു നോക്കാൻ കൂട്ടക്കാതെ അവൻ വേഗം കൂട്ടികൊണ്ട് നടന്നു.

 

കുറച്ചു സമയത്തെ നടത്തതിന് ശേഷം അവൻ വീട്ടിലെത്തി.

 

ഒറ്റനില ഓടിട്ട വീട്. ഒരു മുപ്പത് സെന്റ് വസ്തുവിന്റെ നടുവിലാണ് ആ വീടുള്ളത്. റോഡിൽ നിന്ന് വീട്ടിലേക്ക് ഒരു ഓട്ടോ പോവാൻ വലുപ്പത്തിൽ വഴി ഉണ്ട്. വഴിയുടെ രണ്ട് വശവും പൂ ചെടികൾ ഉണ്ട്.

 

അമ്മയുടെ ശബ്ദം പുറത്തുനിന്നും ഉച്ചത്തിൽ കേൾക്കാം.

 

അവൻ വീട്ടിൽ എത്തിയപ്പോൾ അമ്മയുടെ അടുത്ത് ഏകദേശം അമ്പതിനോട് അടുത്ത് പ്രായമുള്ള ഐശ്വര്യം തോന്നിക്കുന്ന ഒരു സ്ത്രീ യെ കണ്ടു. അമ്മയോട് എന്തോ കാര്യമായ സംസാരത്തിൽ ആണ്.

 

പെട്ടന്ന് അവൻ വന്നത് അറിഞ്ഞിട്ടാണെന്ന് തോന്നുന്നു ആ സ്ത്രീ പൂമുഖത്തേക്ക് നോക്കി. അവന് ആളെ മനസ്സായില്ലെങ്കിലും മുഖത്ത് ചെറുതായി ഒരു ചിരി വരുത്തികൊണ്ട് അകത്തേക്ക് കയറി..

 

“ഇതാണോ മകൻ…..”

ആ സ്ത്രീ വാത്സല്യത്തോടെ അവനെ നോക്കി ചോദിച്ചു.

 

“അതെ…..

അല്ലാ……ചേച്ചിക്ക് പോകേണ്ട സമയമായില്ലേ….വന്നിട്ട് കുറെ നേരമായില്ലേ …… ഞാനിങ്ങനെയാ…..സംസാരിക്കാൻ ഒരാളെ കിട്ടിയാൽ പിന്നെ സമയം വരെ മറന്നുപോകും…..”

 

“മോനേ കൂടെ കണ്ടിട്ട് പോവാമെന്ന് വെച്ചതാ…. എന്തായാലും ഞാൻ ഇറങ്ങട്ടെ കുറെ സമയം ആയി വന്നിട്ട്….അവിടെ പണിയൊക്കെ കഴിഞ്ഞോ ആവോ…..ഇനി വരുമ്പോൾ കയറാം…. എന്നാൽ ഞാൻ ഇറങ്ങട്ടെ…..”

 

“ഇനി വരുമ്പോൾ വാ….”