ജാനകി.25 (Last Part) [Ibrahim] 243

താലി കെട്ടൊക്കെ കഴിഞ്ഞു ഫോട്ടോ എടുക്കുമ്പോൾ ആണ് അവളുടെ ഭർത്താവിനോട്‌ അനി പറയുന്നത് കേട്ടു എന്നാലും എന്റെ അളിയാ ഇങ്ങനെ ഒരു പറ്റു പറ്റിയല്ലോ എന്ന്…

ദേ ഇപ്പോൾ തന്നെ എന്റെ സ്വഭാവം അവരൊക്കെ അറിയേണ്ട വിചാരിച്ചാണ് ഞാൻ മിണ്ടാതെ നിൽക്കുന്നത്. അതെന്റെ ബലഹീനത ആയിട്ട് കാണേണ്ട കെട്ടോ എന്ന് പറഞ്ഞു നീലു…

അവളെ അവിടെ കൊണ്ട് പോയി ആക്കി കഴിഞ്ഞപ്പോൾ അനി കരഞ്ഞു കുളമാക്കി…

നീലു കരഞ്ഞുവെങ്കിലും അനിയുടെ കരച്ചിൽ കണ്ടിട്ട് അവൾ ആർത്തു ചിരിച്ചു..

കണ്ണീരിലും അവളുടെ ചിരി കാണാൻ നല്ല ഭംഗി ആയിരുന്നു..

നിഷാന്ത് ആയിരുന്നു അവളുടെ വരൻ.

കൂടെ പഠിച്ചതാണ്. ആലോചനയുമായി വന്നപ്പോൾ തന്നെ അനി അവനോട്‌ ചോദിച്ചതാണ് സപ്പ്ളി കൊണ്ട് കൊട്ടാരം കെട്ടാൻ ആണോ അനിയാ ഈ മുതലിനെ തന്നെ അങ്ങോട്ട് കെട്ടി എടുക്കുന്നതെന്ന്..

അന്നവളുടെ മുഖം കാണേണ്ടത് ആയിരുന്നു…

ബാക്കി ഉള്ളവനെ അവരുടെ മുന്നിൽ എങ്ങാനും നാണം കെടുത്തിയാൽ കൊല്ലുമെന്ന് പറഞ്ഞു അവൾ…

അതുകൊണ്ടാണ് അവളെ മാറ്റി നിർത്തി കൊട്ടാരത്തിലേക്ക് ഇടക്ക് ഞങ്ങളെ ഒക്കെ ക്ഷണിക്കണേ ഡീ എന്ന് പറഞ്ഞു.

ഇറങ്ങാൻ നേരം എല്ലാവരും കരഞ്ഞു.

ആദിയേട്ടൻ സങ്കടം പിടിച്ചു വെച്ചു. പിന്നെ ആളെ കാണുന്നില്ലായിരുന്നു. കുറച്ചു കഴിഞ്ഞു നോക്കിയപ്പോൾ മാറി നിന്ന് കരയുന്ന ഏട്ടനെ ആണ് കണ്ടത്. അച്ചനും അമ്മയും വരാഞ്ഞത് കൊണ്ട് അവിടെ കഴിഞ്ഞു അവരുടെ കണ്ണുനീർ. എന്നാലും കഴിയില്ല വീട് ഉറങ്ങിയ പോലെയാവും അവള് പോയി കഴിഞ്ഞ്…

രാത്രി ആർക്കും ഒരു ഉഷാർ ഇല്ലായിരുന്നു..

ഭക്ഷണം കൊണ്ട് വെച്ച് എല്ലാവരും മുഖത്തോട് മുഖം നോക്കി ഇരിപ്പാണ്..

ഇങ്ങനെ ഇരുന്നാൽ മതിയോ എനിക്ക് വിശക്കുന്നു പറഞ്ഞു ഞാൻ തന്നെയാണ് എല്ലാവർക്കും വിളമ്പിയത്.

ചിക്കൻ ഫ്രൈ വിളമ്പാൻ നോക്കിയപ്പോൾ അനി വേണ്ട എന്ന് കൈ കൊണ്ട് കാണിച്ചു..

അവനെ നോക്കിയപ്പോൾ കണ്ണ് നിറഞ്ഞു തോന്നുന്നു. തല കുമ്പിട്ടാണ് ഇരിക്കുന്നത്. അവനാവും ഏറ്റവും കൂടുതൽ വിഷമിക്കുക എന്ന് എല്ലാവർക്കും അറിയാം..

എനിക്കാണേൽ അത് കൂടെ കണ്ടപ്പോൾ ഉള്ള വിശപ്പും കൂടെ അങ്ങ് പോയിക്കിട്ടി..

പൊതുവെ ആരെങ്കിലും കരഞ്ഞാൽ ഞാനും കരയും..

പെട്ടെന്നാണ് ഒരു വണ്ടി മുറ്റത്തു വന്നു നിന്നത്.