ജാനകി.25 (Last Part) [Ibrahim] 243

 

കുട്ടികൾ ആണ് ഇപ്പോൾ താരങ്ങൾ..

ഒരു വയസ്സ് കഴിഞ്ഞു എല്ലവർക്കും അതുകൊണ്ട് തന്നെ നല്ല കുറുമ്പാണ്..

മൂന്നാളും ഒരുമിച്ചു വേണം എന്നതാണ് അച്ഛന്റെ ഇപ്പോൾ ഉള്ള ഏറ്റവും വലിയ ആഗ്രഹം..

പക്ഷെ ആര് വന്നാലും പാത്തു അവളുടെ അച്ചച്ചന്റെ മടിയിൽ നിന്ന് മാറുന്ന പ്രശ്നമെ ഇല്ല.

അല്ലെങ്കിൽ ആദിയേട്ടനെ കണ്ടാൽ അവൾ ആദിഏട്ടന്റെ മടിയിൽ ആണ്. പക്ഷെ നച്ചു വും പാറുവും ഉണ്ടെങ്കിൽ അവൾക്ക് പേടി ആണ്.. തന്റെ സ്ഥാനം അവർ തട്ടി എടുക്കോ എന്ന്…

കണ്ണൻ വലിയ ഗമയിൽ നടക്കും എല്ലവരും ഉണ്ടെങ്കിൽ. അവരുടെ ഒക്കെ വല്യേട്ടൻ ആയിട്ട്..

പാത്തു വിന്റെ അടുത്ത് പക്ഷെ അവന്റെ വല്യേട്ടൻ കളി നടക്കില്ല..

അവന്റെ നീളം ഉള്ള മുടി ആണ് അവളുടെ നോട്ടം അത് പിടിച്ചു വലിച്ചു അവൻ കരയുന്നത് നോക്കി ചിരിക്കുകയാണ് പെണ്ണ് ചെയ്യുക.അത് കാണുമ്പോൾ എല്ലവരും പറയും കണ്ണന്റെ സ്വഭാവം എന്റേത് പോലെയാണ് അതുകൊണ്ട് അവൻ തിരിച്ചു ഉപദ്രവിക്കില്ല എന്ന്.

പെണ്ണ് പക്ഷെ നീലു വിനെ പോലെയാണ് എപ്പോഴും ആരെയെങ്കിലും ഒക്കെ ഉപദ്രവിക്കണം…

എന്റെ മൂക്കുത്തിയിൽ ആണ് അവളുടെ നോട്ടം
റിംഗ് പിടിച്ചു വലിക്കും എപ്പോഴും അത് കാണുമ്പോൾ അമ്മ പറയും ഇത് നീലു തന്നെ എന്ന്…

 

ദേവി മാസത്തിൽ പകുതിയും അവളുടെ വീട്ടിൽ ആയിരിക്കും..
ബാക്കി ദിവസം ഇവിടെ ആണെങ്കിലും ഇടക്കിടെ അവളുടെ അച്ഛനും അമ്മയും വരും. വേറെ ഒന്നും കൊണ്ടല്ല അവർക്ക് കുഞ്ഞിനെ പിരിഞ്ഞിരിക്കാൻ പറ്റാഞ്ഞിട്ടാവും.

 

അച്ഛൻ ഇപ്പോൾ ഓഫീസിൽ പോക്ക് ഒക്കെ നിർത്തിയ മട്ടാണ്..

മോൾ രാവിലെ തന്നെ എഴുന്നേറ്റു വന്നാൽ അച്ഛന്റെ മടിയിൽ ആയിരിക്കും. അവളെ മാറ്റി നിർത്തി ഓഫീസിൽ പോകാനുള്ള മടി കൊണ്ട് തത്കാലം നിങ്ങൾ ഒക്കെ നോക്ക് പറഞ്ഞു വീട്ടിൽ കുഞ്ഞിനേയും നോക്കി ഇരിപ്പാണ്..

 

ഇന്ന് ശ്രീ യും ദേവിയും വരുന്നുണ്ട്. അമ്മയും ഞാനും കൂടി കുറച്ചു ഐറ്റംസ് ഒക്കെ ഉണ്ടാക്കുന്ന തിരക്കിലാണ്. വേഗം തന്നെ എല്ലാം ചെയ്തു തീർക്കാൻ ഉണ്ട് അല്ലെങ്കിൽ അവരു വന്നാൽ നല്ലോണം സംസാരിക്കാൻ പോലും സമയം കിട്ടില്ല. ശ്രീ നാളെ തിരിച്ചു പോകും ദേവി കുറച്ചു ദിവസം ഇവിടെ ഉണ്ടാവും…

പിന്നെ നീലു വരുന്നുണ്ട് അതാണ് പ്രധാനം. അവൾ ഗർഭിണി ആണ്.

പാത്തു വിനെ കണ്ടപ്പോൾ തൊട്ട് അവളെ പോലുള്ള ഒരു മോളെ വേണമെന്ന് പറഞ്ഞു നടപ്പായിരുന്നു. പാറുവും നച്ചുവും വന്നപ്പോൾ മൂന്നു കുട്ടികൾ ഒരുമിച്ചു ഉണ്ടായാൽ നല്ലതാവും എന്നായി. ഒരു കുട്ടിയെ എങ്കിലും നീ നന്നായി നോക്കിയാൽ മതിയായിരുന്നു എന്നാണ് അനി പറഞ്ഞത്..

ഒരു വർഷം ആകാനായിട്ടും കുട്ടികൾ ആവാത്തത്തിൽ അവൾക്ക് വിഷമം ഉണ്ടായിരുന്നു..

ഇങ്ങോട്ട് ഉള്ള വരവ് പോലും കുറച്ചു.

പക്ഷെ ഗർഭിണി ആണെന്ന് അറിഞ്ഞപ്പോൾ ആദ്യം വന്നത് ഇങ്ങോട്ടായിരുന്നു.

ആദ്യം ചെയ്തത് പാത്തുവിനെ എടുത്തു കെട്ടിപ്പിടിച്ചു ഉമ്മ വെക്കുകയായിരുന്നു..

അച്ഛന്റെ കയ്യിന്ന് അവളെ തട്ടിപ്പറിച്ചു എടുത്ത പോലെ ആയപ്പോൾ അവൾ കാറി പൊളിച്ചു. പിന്നെ കുറെ ചോക്ലേറ്റ് ഒക്കെ കൊടുത്തു വശത്താക്കി നീലു.

ചോക്ലേറ്റ് കണ്ടപ്പോൾ അച്ഛനെയും വേണ്ട ആദി ഏട്ടനെയും വേണ്ട..

തിന്നാൻ ഉള്ളത് കണ്ടപ്പോൾ അവൾ ഇതുവരെ നോക്കിയവരെ ഒക്കെ മറന്നത് കണ്ടില്ലേ അപ്പോൾ ഇത് നീലു തന്നെ എന്നാണ് അനിയുടെ കമന്റ്‌..