ജാനകി.25 (Last Part) [Ibrahim] 243

അനിയും ദേവിയും ഹോസ്പിറ്റലിൽ ഉണ്ടായിരുന്നു പ്രസവം കഴിഞ്ഞപ്പോൾ ആണ് തിരിച്ചു പോയത്..

ശ്രീ യും അനിലും വിദേശത്ത് ഉള്ള ബിസിനെസ്സ് ഒക്കെ നോക്കി നടത്തുന്നു. അവൻ കൊണ്ട് നടന്ന കാർ അവന് തന്നെ കൊടുത്തു…

ഒരു ആൺകുട്ടിക്ക് ആണ് ഞാൻ ജന്മം നൽകിയത് .
പെൺകുട്ടി ആയിരുന്നു എല്ലാവർക്കും ആഗ്രഹം.

മുടി കെട്ടി കണ്ണെഴുതി ഒരുക്കി കൊണ്ട് നടക്കാൻ..

പക്ഷെ മോൻ ജനിച്ചപ്പോൾ എല്ലാവരുടെയും ലോകം അവനിൽ ഒതുങ്ങി..

ജീവൻ ആയിരുന്നു അവൻ.

അവന്റെ ഓരോ വളർച്ചയും അത്രയും ആസ്വദിക്കുകയായിരുന്നു എല്ലാവരും..

ആരോമൽ എന്ന് അമ്മയാണ് പേര് വിളിച്ചത്..

കണ്ണാനായിരുന്നു എല്ലാവർക്കും..

കണ്ണന് ഒരു വയസ്സ് കഴിഞ്ഞപ്പോൾ തന്നെ അടുത്ത ആളുടെ വരവറിയിച്ചു കൊണ്ട് ഞാൻ തല ചുറ്റി വീണു..

ചെറിയ ചമ്മൽ ഉണ്ടായിരുന്നുവെങ്കിലും ആദ്യത്തെതിലും ഗംഭീരം ആയിരുന്നു ഹോസ്പിറ്റലിൽ പോയി വന്നിട്ടുള്ള വരവേൽപ്. കാരണം മറ്റൊന്നുമല്ല ദേവിയും ഗർഭിണി ആയിരുന്നു..

എനിക്കും ദേവിക്കും എട്ടു മാസം തികഞ്ഞപ്പോൾ ആയിരുന്നു നീലുവിന്റെ കല്യാണം..

രണ്ടു മാസം കൊണ്ട് ഉണ്ടായതാണ്…

അമ്മയൊക്കെ പറഞ്ഞതാണ് ഇപ്പൊ കല്യാണം വേണ്ട ആറു മാസത്തേക്ക് നീട്ടാൻ പക്ഷെ അവർക്ക് പെട്ടെന്ന് കല്യാണം വേണമെന്ന്..

അവസാനത്തെ കല്യാണം ആണെന്ന് പറഞ്ഞു കൊണ്ട് ഈ കല്യാണവും വളരെ വലുതായിട്ടായിരുന്നു നടത്താൻ തീരുമാനിച്ചത്…

ശ്രീ യും അനിലും വന്നപ്പോൾ ആണ് അതിലും രസം….

ഏകദേശം ഞങ്ങളുടെ അത്രക്ക് തന്നെ വയറുമായിട്ടാണ് അവൾ വന്നത്. അവൾ ഞങ്ങൾക്ക് സർപ്രൈസ് തരാൻ ആണുപോലും ഇതുവരെ പറയാതെ നിന്നത്. എനിക്ക് പക്ഷെ ചെറുതായിട്ട് സംശയം തോന്നിയിരുന്നു..

കല്യാണത്തിന് വന്നവരൊക്കെ ഞങ്ങളെ ആക്കി നോക്കുകയായിരുന്നു..

ഇതെങ്ങനെ മൂന്നാൾക്കും ഒരുപോലെ എന്നതായിരുന്നു പലരുടെയും സംശയം…

അമ്മക്കും ആദിയേട്ടനും ആണ് കണ്ണ് പറ്റുമോ എന്നുള്ള പേടി. അനിക്ക് അച്ചന് ഒന്നും ആ പേടി ഇല്ലായിരുന്നു. അനിയാണ് ഞങ്ങൾ മൂന്നാൾക്കും ഉടുക്കാൻ ഒരുപോലെയുള്ള സാരി വാങ്ങി തന്നത്..