ചെകുത്താന്‍ വനം 6

Author : Cyril

[ Previous Part ]

“അപ്പോ നാലായിരം വര്‍ഷം റോബി എവിടെ ആയിരുന്നു?” വാണി ചോദിച്ചു.

ആരണ്യ എന്റെ കണ്ണില്‍ നോക്കി. എന്നിട്ട് വാണിയേയും ഭാനുവിനെയും നോക്കി പുഞ്ചിരിച്ച ശേഷം അമ്മ എന്റെ കണ്ണില്‍ തറപ്പിച്ച് നോക്കി.

“നാലായിരം വർഷങ്ങൾ നി രണ്ട് ലോകത്തിന്റെ മധ്യത്തിലായിരുന്നു. ഉന്നത ശക്തിയുടെ കരങ്ങളിൽ ആയിരുന്നു നി. ശിശു തന്റെ അമ്മയുടെ ഗര്‍ഭപാത്രത്തില്‍ കിടന്നത് പോലെ, നാലായിരം വര്‍ഷക്കാലം നി ഉന്നത ശക്തിയുടെ ഗര്‍ഭപാത്രത്തില്‍ കഴിഞ്ഞു എന്ന് വേണം പറയാൻ. അത്രയും കാലം ഉന്നത ശക്തി നിനക്ക് അതിന്റെ ശുദ്ധമായ ശക്തി പകര്‍ന്ന് തന്ന ശേഷമാണ് ക്രൗശത്രൻറ്റെ തോട്ടത്തിലേക്ക് നിന്നെ ആ ശക്തി തള്ളിയത്.” എന്റെ അമ്മ പറഞ്ഞു.

അതുകേട്ട് ഞാൻ വാപൊളിച്ച് നിന്നു. വാണി ഞെട്ടി പ്രതിമ കണക്കെ നിന്നു. ഭാനു അവന്റെ എല്ലാ പല്ലും കാണിച്ച് ഇളിച്ചു.

“നമുക്ക് നമ്മുടെ വസതിയില്‍ പോകാം. അവിടെ വെച്ച് മതി ഇനിയുള്ള ചർച്ച.” ആരണ്യ എന്റെ കൈയിൽ പിടിച്ചുകൊണ്ട് പറഞ്ഞു.

ബാറ്ററി ഇട്ട ബൊമ്മ കണക്കെ തലയാട്ടാൻ മാത്രമാണ് എനിക്ക് കഴിഞ്ഞത്. ഞങ്ങൾ നടന്ന് മൈതാനത്തിന്‍റെ അതിർത്തിയിൽ വന്നതും ആരണ്യ പെട്ടന്ന് നിന്നിട്ട് എന്റെ മുഖത്ത് നോക്കി.

കുറച്ച് മുന്നേ രണ്ടുപേര്‍ ഈ വഴിക്ക് ഓടി മറഞ്ഞത് ഞാൻ കണ്ടതാണ്. അതുകൊണ്ട്‌ എന്റെ മുന്നില്‍ മാന്ത്രിക കവാടം ഉണ്ടെന്ന് അറിയാമായിരുന്നു. മുന്നില്‍ ഉള്ള ആ മാന്ത്രിക കവാടത്തിന്‍റെ ശക്തി എന്റെ മനസ്സിനെ സ്പര്‍ശിച്ചു.

“ഇപ്പോൾ നമുക്ക് മുന്നില്‍ ഉള്ള ഈ കവാടവും…. മുകളില്‍ ആ വൃക്ഷത്തിൽ ഉള്ളത് പോലത്തെ മാന്ത്രിക കവാടമാണോ?” എന്റെ അമ്മയോട് ഞാൻ ചോദിച്ചു.

കുറച്ച് നേരം ആരണ്യ എന്റെ കണ്ണില്‍ നോക്കി നിന്നു.

“എന്നെ ‘അമ്മ’ എന്ന് വിളിക്കാൻ നിനക്ക് കഴിയുന്നില്ല, അല്ലേ റോബി?” വിഷമം മറച്ച് കൊണ്ട്‌ ആരണ്യ പുഞ്ചിരിയോടെ ചോദിച്ചു.

ആ ചോദ്യം കേട്ട് ഞാൻ ഞെട്ടി. കാരണം, അതുതന്നെയായിരുന്നു സത്യവും. അവരെ അമ്മയെന്ന് വിളിക്കാൻ പലവട്ടം ഞാൻ ശ്രമിച്ചെങ്കിലും എന്റെ മനസ്സിലുള്ള ആ വാക്ക് എന്റെ കണ്ഠം വിട്ട് പുറത്ത്‌ വന്നില്ല. ആ വാക്ക് പ്രയോഗിക്കാൻ ഏതോ ഒരു ബുദ്ധിമുട്ട്‌ പോലെ എനിക്ക് തോന്നി….

അവര്‍ക്ക് മറുപടി കൊടുക്കാതെ കുറ്റബോധത്തോടെ ഞാൻ തറയില്‍ നോക്കി.