ചെകുത്താന്‍ വനം 6 [Cyril] 2265

“അത് ഈ ലോകത്തിന്റെ ചന്ദ്രൻ ആണോ….” ഭാനു മുകളില്‍ നോക്കി ചോദിച്ചു.

“അതാണ് മന്ത്ര ഭക്ഷിനികളേ നിയന്ത്രിക്കുന്ന ശക്തി…. ആ ശക്തിയെയാണ് അതിന്റെ പൂര്‍വ്വ സ്ഥിതിക്ക് നാം കൊണ്ട് വരേണ്ടത്. മെറോഹ്റിയസ് വ്യാളി ലോകത്ത് വന്ന് കഴിഞ്ഞു. ഇനിയും സംസാരിച്ച് സമയം കളയാന്‍ നമുക്ക് കഴിയില്ല.”

അത്രയും പറഞ്ഞിട്ട് ഞാൻ ആ ചന്ദ്ര ഗോളത്തെ എന്റെ മനഃശക്തി കൊണ്ട്‌ പൊതിഞ്ഞു — ഞാൻ ഞെട്ടി. കാരണം…. ആ ഗോളത്തിൽ ഉന്നത ശക്തിയുടെ അംശം ഉണ്ടായിരുന്നു. ഉടനെ ആ ചന്ദ്ര ഗോളം എന്റെ ശക്തിയെ അതിന്റെ ഉള്ളിലേക്ക് വലിച്ച് എടുക്കാന്‍ ശ്രമിച്ചു.

അതിന്റെ ശക്തി ഭയാനകമായിരുന്നു. ഞാൻ സൂക്ഷിച്ചില്ലെങ്കില്‍ എന്നില്‍ ഉള്ള ഉന്നത ശക്തിയെ പോലും അത് വലിച്ചെടുക്കും എന്നതിൽ യാതൊരു സംശയവും ഇല്ലായിരുന്നു.

“നേരത്തെയുള്ള എന്റെ അനുമാനം തെറ്റായിരുന്നു…..” വാണിയേയും ഭാനുവിനെയും ഞാൻ അറിയിച്ചു. “ഞാൻ നേരത്തെ പറഞ്ഞത് പോലെ നമ്മൾ മൂന്ന് പേരുടെയും ശക്തിയെ വെവ്വേറെ സാഹചര്യത്തിൽ അല്ല ആ ചന്ദ്ര ഗോളത്തിൽ പ്രയോഗിക്കേണ്ടത്….” ഞാൻ പറഞ്ഞു.

“വേറെ എങ്ങനെയാണ് പ്രയോഗിക്കേണ്ടത്?” അവർ രണ്ട് പേരും ഒരേ സ്വരത്തില്‍ ചോദിച്ചു.

“നമ്മൾ മൂന്ന് പേരുടെ ശക്തിയും ഒന്നിച്ച് ഇണക്ക്കുമ്പോൾ ഉണ്ടാകുന്ന ആ ശക്തിയെ കൊണ്ട്‌ വേണം ഈ ചന്ദ്ര ഗോളത്തെ മാറ്റേണ്ടത്.” ഞാൻ പറഞ്ഞു.

“സമയം വിലപ്പെട്ടതാണെന്ന് അറിയാം…. പക്ഷേ ഒരു സംശയം ഞാൻ ചോദിക്കട്ടെ….?” അത് പറയുമ്പോൾ വാണിയുടെ മുഖത്ത് ശങ്ക ഉണ്ടായിരുന്നു.

എന്റെ അക്ഷമ അടക്കി കൊണ്ട്‌ ഞാൻ തലയാട്ടി സമ്മതം പറഞ്ഞു.

“നമ്മുടെ എല്ലാ ശക്തികളും ഒരേ ശക്തിയായ ഉന്നത ശക്തിയില്‍ നിന്നും ഉത്ഭവിച്ചതാണ്…. അങ്ങനെയിരിക്കെ നമുടെ എല്ലാ ശക്തികളും ഒരേ ശക്തി തന്നെയല്ലേ… അപ്പോ പിന്നെ ഒരേ ശക്തിയായ നമ്മുടെ മൂന്ന് പേരുടെ ശക്തിയെ എന്തിനാണ് കൂട്ടി ഇണക്കുന്നത്…. ഒരേ ശക്തിയെ കൂട്ടി ഇണക്ക്കുമ്പോൾ എന്ത് കൊണ്ട്‌ അതിന്‌ മാറ്റം സംഭവിക്കുന്നു….?”

ഞാൻ ചിരിച്ചു. ന്യായമായ ചോദ്യം തന്നെ.

“ഉന്നത ശക്തിയിൽ നിന്നുമാണ് നമ്മൾ എല്ലാവരെയും ആ ശക്തി സൃഷ്ടിച്ചത് എങ്കിലും ഓരോ വര്‍ഗ്ഗത്തിന്റെ ശക്തിയുടെ ഗുണവും വെത്യസ്ത്തമായാണ് സൃഷ്ടിക്കപ്പെട്ടത്. ഉദാഹരണത്തിന് — ചെകുത്താന്‍മാര്‍ക്ക് നശീകരണ ശക്തിയാണ് ലഭിച്ചിരിക്കുന്നത്. അവരുടെ ശരീരവും ജീവ ജ്യോതിയുടെ പ്രാപ്തിയും അനുസരിച്ച് ആ നശീകരണ ശക്തി മാത്രമേ ഉയരുകയുള്ളു. മാലാഖമാര്‍ക്കും ദാർശനികൾക്കും മറ്റുള്ള ശക്തിയെ അമര്‍ച്ച ചെയ്യാനും, മറ്റുള്ള ശക്തിയെ സുഖപ്പെടുത്താൻ… ഭേദമാക്കാനുള്ള ശക്തിയാണ് ലഭിച്ചിരിക്കുന്നത്. നിങ്ങളുടെ ജീവ ജ്യോതിയുടെ പ്രാപ്തി അനുസരിച്ച് ആ ശക്തി മാത്രം ഉയർന്ന് കൊണ്ടെ പോകും.”

“പക്ഷെ നിങ്ങള്‍ക്ക് എല്ലാ തരം ശക്തിയേയും സ്വയം പ്രയോഗിക്കാനുള്ള കഴിവ് ഉന്നത ശക്തി പ്രദാനം ചെയ്തിരിക്കുന്നു….. അപ്പോ പിന്നെ ഞങ്ങളുടെ സഹായം ഇല്ലെങ്കില്‍ പോലും നിങ്ങള്‍ക്ക് ആ ചന്ദ്ര ഗോളത്തെ പൂർവ സ്ഥിതിയിലേക്ക് മാറ്റാൻ കഴിയില്ലേ…?” വാണി ചോദിച്ചു.

“എനിക്ക് മറ്റുള്ള ശക്തിയെ സുഖപ്പെടുത്താൻ കഴിയും, വാണി…. പക്ഷേ ഇന്ന് ഈ നിമിഷം എനിക്ക് അത് ചെയ്യാൻ കഴിയില്ല. എനിക്ക് ആ അനുഭവം ഇല്ല എന്നത് തന്നെയാണ് അതിന്‌ കാരണം. ഇന്ന് ജനിച്ച കുഞ്ഞ് എഴുനേറ്റ് നടക്കാൻ ശ്രമിക്കുന്നത് പോലെയായിരിക്കും എന്റെ അവസ്ഥ. അത് ഗുണത്തേക്കാളേറെ ദോഷം മാത്രമേ ചെയ്യുകയുള്ളു.