ചില ബാംഗ്ലൂർ നായ വിശേഷങ്ങൾ – ബൂ-ബൂ [Santhosh Nair] 956

ഇത് ശ്രദ്ധിച്ച ചേട്ടൻ പറഞ്ഞു “മക്കളെ ഒരു അബദ്ധം പറ്റിപ്പോയി. വാ, കാണിച്ചു തരാം”.

ചേട്ടന്റെ കൂടെ പുറകു വശത്തേക്കു പോയ ഞങ്ങൾ ഹൃദയം പിളർക്കുന്ന ആ കാഴ്ച കണ്ടു. അണ്ണാച്ചി വിളമ്പി വെച്ച എന്തൊക്കെയോ വേവിച്ച ഇറച്ചിക്കഷണങ്ങൾ വെട്ടി വെട്ടി അടിക്കുന്ന ബൂ-ബൂ.

ഹൃദയം തകർന്ന അജി നിലത്തേക്കിരുന്നുപോയി. അവൻ കരഞ്ഞു പോയി. എന്റെയും സ്ഥിതി മോശമായിരുന്നില്ല.

ചേട്ടൻ തുടർന്നു “നിങ്ങൾ പോയതിന്റെ അടുത്ത ചൊവ്വാഴ്ച അവൾക്കു സുഖമില്ലാതെ ഹോസ്പിറ്റലിൽ ആയിരുന്നു. ചൊവ്വായും ബുധനും പട്ടികളെ നോക്കിയത് അണ്ണാച്ചിയാണ്. അയാൾ അറിയാതെ നോൺ വെജ് കൊടുത്തു. ഇപ്പോൾ ബൂ-ബൂ നോൺ ഇല്ലാതെ ഒന്നുംകഴിക്കുന്നില്ല. മാത്രവുമല്ല, Friday ഒരു കൂട്ടർ വന്നിരുന്നു, അവരുടെ പെൺ ലാബ് നായക്ക് ഹീറ്റ് ആണ്, ബ്രീഡിങ് ചെയ്യണം എന്ന് പറഞ്ഞു കൊണ്ട്. അണ്ണാച്ചി അവനെ ഉപയോഗപ്പെടുത്തി. അവർ രണ്ടായിരം രൂപ തന്നു. ഇത് നിങ്ങൾ എടുത്തോളൂ”

അതും കൂടി കേട്ടപ്പോൾ ഞങ്ങൾക്ക് മതിയായി. രണ്ടായിരം നേടിത്തന്നെങ്കിലും ഞങ്ങളുടെ വീട്ടിൽ ഇനി താമസിക്കാൻ യോഗ്യത നഷ്ടപ്പെട്ട ബുബുവിന്റെ മേലുള്ള കണക്കു കൂട്ടലുകൾ എല്ലാം ക്ലോസ് ചെയ്തു ഞങ്ങൾ ഇറങ്ങി. ഞങ്ങളുടെ ബൂ-ബൂവിന്റെ ബ്രഹ്മചാരിയും സസ്യഭുക്കുമായിരുന്ന ബൂ-ബൂവിന്റെ ഭാവി നശിപ്പിച്ച അണ്ണാച്ചിയോടു ഒരിക്കലും ക്ഷമിക്കരുത് എന്ന് കണക്കുകൂട്ടിത്തന്നെ. ആ പൈസ ഞങ്ങൾ വാങ്ങിയില്ല,കേട്ടോ. ബൂ-ബൂവിന്റെ ഭാവിയിലേക്ക് അത് അതാകട്ടെ എന്ന് ചേട്ടന് തന്നെ തിരികെ കൊടുത്തു.

പിന്നീട് ഞാൻ ബുബുവിനെ കണ്ടിട്ടില്ല. അജി ഇടയ്ക്കിടയ്ക്ക് പോയി കാണുമായിരുന്നു.
ഞാൻ കുറച്ചു ദിവസങ്ങൾക്കുള്ളിൽ ചില ജോലി സംബന്ധമായ കാരണങ്ങളാൽ ഡൽഹിയിലും മറ്റും പോയിരുന്നു. തിരികെ വരുമ്പോഴേക്കും ചേട്ടനുമായുള്ള കോൺടാക്ട് പോയി. കാരണം അദ്ദേഹം ട്രാൻസ്ഫർ ആയി തന്റെ പട്ടികളും കുട്ടികളും ഭാര്യയും അണ്ണാച്ചിയും ഒക്കെയുമായി കൊച്ചിക്കു പോയി.

അജി അതിനു ശേഷം ദുബായിൽ പോയി.
ബൂ-ബൂ ഇപ്പോൾ ജീവനോടെ ഉണ്ടോ ആവോ. കാണില്ല. മർ ഗയ ഹോഗാ.
എങ്കിലും ഇടയ്ക്കിടയ്ക്ക് ഓർക്കാറുണ്ട്.