ചിലങ്ക [ദേവദേവൻ] 90

എന്തായാലും അവളെയും അമ്മയെയും ഒരുമിച്ച് സ്വപ്നത്തിൽ കണ്ട സന്തോഷത്തിലായിരുന്നു ഞാൻ . ഉറക്കമെണീറ്റു അമ്മക്ക് ഒരുമ്മയും കൊടുത്ത് ഞാൻ ജോലിക്ക് പോയി .
പിന്നെയും ദിനങ്ങൾ കഴിഞ്ഞു .

ക്ഷേത്രത്തിൽ വെച്ച് കാണുമെങ്കിലും ഒന്നും പറയാനാകാതെ ഞാൻ വീർപ്പുമുട്ടി .

പെങ്ങള് കുട്ടിക്ക് നല്ലൊരു ആലോചന വന്നപ്പോഴാണ് അവൾക്ക് കല്യാണപ്രായം ആയെന്നുള്ളത് ഞാൻ തിരിച്ചറിയുന്നത് . എന്റെ വിരലിൽ തൂങ്ങി നടന്ന പെണ്ണാണ് .

പിന്നെ അതിനു വേണ്ടിയുള്ള നെട്ടോട്ടത്തിൽ ആയിരുന്നു . രാപ്പകൽ ഇല്ലാതെ ഓടി നടന്നു .

” പയ്യന്റെ വീട്ടിൽ നിന്നും ഒന്നും ചോദിച്ചില്ലെങ്കിലും നമ്മൾ അറിഞ്ഞു എന്തേലും ചെയ്യണ്ടേ മോനെ “

വകയിൽ ഉള്ളൊരു അമ്മാവന്റെ അഭിപ്രായം ആണ് .
ചത്തോ ഉണ്ടോന്ന് പോലും അന്വേഷിക്കാത്ത ആളുകൾ  .
എന്നാലും പറഞ്ഞതിൽ കാര്യമുണ്ട് .

സ്ത്രീയാണ് ധനം . അതൊരു അലങ്കാര വാക്യമായി മാത്രം പറയാം .അല്ലെങ്കിൽ ആ വാക്ക് മനസ്സിൽ ആവാഹിച്ച നട്ടെല്ലുള്ളവൻ ആയിരിക്കണം . അല്ലാത്ത പക്ഷം
ധനം വേണ്ടിടത്ത് അത് തന്നെ വേണം .

ഒരുപാടൊന്നും കൊടുക്കാനില്ലെങ്കിലും എന്നെക്കൊണ്ട് ആവുന്നത് ഞാൻ പയ്യന്റെ വീട്ടുകാർക്ക് വാക്കുനല്കി .

കല്യാണം കഴിഞ്ഞു അവൾ പടിയിറങ്ങുമ്പോൾ നെഞ്ച് പിടഞ്ഞു പോയി . ഇന്നലെ വരെ അവളൊരു പൊട്ടി പെണ്ണായിരുന്നു .
“ഏട്ടാ ” എന്നും വിളിച്ചു പുറകെ നടക്കും .
എത്ര പെട്ടെന്നാണ് ഒരു യുവതിയിലേക്കുള്ള അവളുടെ മാറ്റം . സാരിയുടുത്തു ആദ്യമായി കാണുകയാണ് ഞാനവളെ .
പാട്ടുപാവാടയിട്ടു പാവാട തുമ്പ് പിടിച്ചു വട്ടം കറങ്ങുന്ന ഒരു തൊട്ടാവാടിയെ ഓർത്തു അറിയാതെ ചിരിച്ചു പോയി .
കല്യാണപ്പയ്യനോട് ഒന്നേ പറഞ്ഞുള്ളു
“എന്റെ പെങ്ങളെ നോക്കിക്കോണേ അളിയാ “ന്ന്.