“ഉമ്മാ…… ഉമ്മാ……”

“എന്താ ശാനൂ…….ഉമ്മ കെടക്കുവാ നീ അങ്ങോട്ട് ചെല്ല് ” ഞാൻ വിളിക്കുന്നത് കേട്ട് ഇത്താത്ത വന്നു പറഞ്ഞു.

ഞാൻ ഉമ്മയുടെ മുറിയിലേക്ക് നടന്നു

” എന്താ മോനെ…. നീ ഇതുവരെ കടയിൽ പോയില്ലേ….”

” ഇല്ലുമ്മാ … ഞാൻ ദേ പോകാൻ ഇറങ്ങുവായിരുന്നു . കാല് വേദന എങ്ങനുണ്ട് ഇപ്പൊ.. മരുന്ന് തീരാർ ആയോ”

“വേദന അങ്ങനെ തന്നെ ഒരു കുറവും ഇല്ല , മരുന്ന് ഉണ്ട് തീർന്നിട്ടില്ല ”

ഉപ്പ മരിച്ച അന്ന് ഒന്ന് വീണതാണ് , ഏഴ് വർഷമായി ഉമ്മ ഇങ്ങനെ നട്ടെല്ലിന് അകൽച്ച ഉണ്ടായി കാല് ഒടിഞ്ഞു… അന്ന് മുതൽ നടക്കാൻ ഒക്കെ ബുദ്ധിമുട്ടാണ്..
പോരാത്തതിന് കൊറേ രോഗവും

” അങ്ങനെ ആണെങ്കിൽ നാളെ വൈകിട്ട് നമ്മുക്ക് ആശുപത്രിയിൽ പോകാം…. ഇത്താതാ അവിടെ ഒന്ന് വിളിച്ച് ഉമ്മാടെ പേര് എഴുതി ഇടീക്ക് ”

“മോനെ നാളെ ഉപ്പാടെ ആണ്ടല്ലെ , അതിൻ്റെ കാര്യങ്ങൾ …”

” അത് ഞാൻ ഏർപ്പാട് ആക്കിയിട്ടുണ്ട് ഉമ്മ, രാവിലെ ഉസ്താദ് വരും. ഉച്ചക്ക് അവിടെ കൊടുക്കാൻ ചോറിൻ്റെ കാര്യം അബുനോട് പറഞ്ഞിട്ടുണ്ട്.”

” എന്നാ ശരി മോൻ കടയിലോട്ട് ചെല്ല്.”

നാളെ ഉപ്പ മരിച്ചിട്ട് ഏഴ് വർഷമായി , എല്ലാവർഷവും ഇവിടെ അടുത്തുള്ള ഒരു അഗതി മന്ദിരത്തിൽ ഈ ദിവസം ഉച്ച ഭക്ഷണം കൊടുക്കും അതിൻ്റെ കാര്യമാണ് ഉമ്മ ചോദിച്ചത്. ഇറങ്ങുന്നതിനു മുമ്പ് ഉമ്മാടേ മരുന്ന് നോക്കിയിട്ട് കുറവുള്ളത് WhatsApp ചെയ്യാൻ ഇത്താത്തയോട് പറയാനും മറന്നില്ല.

ഞാൻ വീട്ടിൽ നിന്നും ഇറങ്ങി എൻ്റെ ഉറ്റ ചെങ്ങായി കണ്ണൻ്റെ വീട്ടിലേക്ക് വണ്ടി വിട്ടു.
അടുത്ത് തന്നെ ആണ്… രാഷ്ട്രീയ പ്രസ്ഥാനത്തിൽ ഞങ്ങൾ എതിരാണ് എങ്കിലും അത് ആ സമയത്ത് മാത്രം.

ഞാൻ ചെല്ലുമ്പോൾ അമ്മ ഉമ്മറത്ത് തന്നെ ഇരിപ്പുണ്ട് ….

” അമ്മേ ..”

“ ആഹാ ശാനുവോ …. വാ മോനേ ..”

“ അവൻ എന്തേ അമ്മേ “

“ ഏതാണ്ട് മീറ്റിങ് എന്നും പറഞ്ഞു പോയിട്ട് ഇന്നലെ പാതിരാത്രിയാ വന്നു കേറിയത് എണീറ്റിട്ടില്ല നീ ചെന്നു വിളിക്ക് , ഞാൻ രണ്ടിനും ചായ എടുതോണ്ട് വരാം “

എന്ന് പറഞ്ഞ് അമ്മ അകത്തേക്ക് കേറി , ഞാൻ അവന്റെ മുറിയിലേക്കും

“ ഡാ …കണ്ണാ…ഡാ..”