കട്ടൻ

Author :Bibin Adwaitham

“ടീ….. ”

“കട്ടൻ ചായ വേണാരിക്കുംല്ലേ.”. അടുക്കളപ്പുറത്തു നിന്നു അവൾ ഉറക്കെ വിളിച്ചു ചോദിച്ചു..

“ആഹ് ഒന്നു കിട്ടിയാ കൊള്ളാർന്നു ..”

“ആ ഒന്നു കിട്ടാത്തേന്റെ കൊറവുണ്ട് ഈ മനുഷ്യന്.. പണിക്ക് പൊയ്ക്കോണ്ടിർന്നപ്പോ കാലത്ത് ഒരെണ്ണം മതിയാർന്നു.. ഇതിപ്പോ 5 നേരം ആയിട്ടുണ്ട്.. എന്നാണാവോ ഈ ലോക്ക് ഡൗൺ ഒന്ന് തീരണത്.. ”
ദേഷ്യം മുഴുവൻ പാത്രത്തിൽ തീർത്തു കൊണ്ടാ പെണ്ണിന്റെ പരാതി പറച്ചിൽ.. അവള്ടെ കൂടെ തന്നെ പാത്രങ്ങളും കലപില കൂട്ടുന്നുണ്ട്..

“ഹാ ഇങ്ങനെ ഉമ്മറത്തിരുന്നു വിളിച്ചു കൂവുമ്പോൾ എടുത്ത് കൊടുക്കാൻ നിക്കണോണ്ടല്ലേ… അനുഭവിച്ചോ..നീയെന്ന്യാ അവനു വളം വെച്ച് കൊടുക്കണത്..” അമ്മയുടെ ശകാരവർഷം തുടങ്ങി.. അവളോട് പിണക്കം ഒന്നും ഉണ്ടായിട്ടല്ല.. ഇതും എനിക്കു കേൾക്കാൻ വേണ്ടി മാത്രമാണ്..

“ആ ആടിന് ഇത്തിരി ഇല ഒടിച്ചു കൊടുക്കാനോ, കൊറച്ചു കാടി വെള്ളം കൊടുക്കാനോ, ഒരു ചക്ക വെട്ടി ഇടാനോ പറഞ്ഞാൽ ങ്ങേഹേ അവൻ കേട്ടഭാവം നടിക്കില്ല.. ഇതൊക്കെ ചെയ്യാൻ ഒന്നെങ്കി നിന്റെ കൈ എത്തണം, അല്ലെങ്കിൽ എന്റെ.. നേരത്തിന് തിന്നാനും കുടിക്കാനും ഒക്കെ കൊടുക്കണതാ ഇവന്റെ ഒക്കെ പ്രശ്നം.. ഇനി മുതൽ പണി എടുക്കാണ്ടെ പച്ച വെള്ളം കൊടുക്കണ്ട പറഞ്ഞത് കേട്ടല്ലോ..”

ബെസ്റ്റ്.. അവള് ഇപ്പോ തലകുലുക്കി സമ്മതിച്ചിട്ടിണ്ടാകും.. ഇനീപ്പോ ഇതിനും കൂടെ മുഖം വീർപ്പിക്കണതും ഞാൻ കാണണല്ലോ..

കട്ടൻ കാപ്പി കൊണ്ടു വന്ന് വെച്ച് നീട്ടിയപ്പോൾ ഒന്നേ മുഖത്തേക്ക് നോക്കിയുള്ളൂ മുഖം ഒരു കൊട്ടക്കുണ്ട്.. കൈയിലേക്ക് വെച്ച് തന്ന് അപ്പൊ തന്നെ തിരിഞ്ഞു ചവിട്ടി തുള്ളി പോയിട്ടുണ്ട് പെണ്ണ്..

പെണ്ണുങ്ങൾക്ക് ഇങ്ങനെ മോന്ത വീർപ്പിച്ചു കാണിച്ചാൽ മതിയല്ലോ.. പാവം ആണുങ്ങൾടെ അവസ്ഥ വല്ലതും അറിയണോ.. ഒരു തുള്ളി കട്ടൻ കിട്ടാതെ കൈയും കാലും വിറക്കുന്നതിന് ഒരു ശമനം ഉണ്ടാകാനാ ഇങ്ങനെ മൂന്നും നാലും സുലൈമാനി ആകാത്താക്കുന്നതെന്ന്..