ഒരു ബാംഗ്ലൂർ വാരാന്ത്യം 5 [Santhosh Nair] 1056

എന്നെ കണ്ടയുടനെ കച്ചേരിക്കു ഇന്റർവെൽ പ്രഖ്യാപിച്ചു. കവിളിൽ നിന്നും കൈ എടുത്തപ്പോൾ അമ്മാവന്റെ കവിളിൽ അമ്മയുടെ ആധാർ രേഖകൾ പതിഞ്ഞു കിടക്കുന്നതു എല്ലാവര്ക്കും കാണാൻ പറ്റി. അമ്മയ്ക്കതു കണ്ടു സങ്കടം കൂടി. ഓടിപ്പോയി അമ്മാവനെ കെട്ടിപ്പിടിച്ചു ഉമ്മവെച്ചു കരയാൻ തുടങ്ങി. നമ്മൾ ഇതെത്ര കണ്ടിരിക്കുന്നുവെന്ന ഭാവത്തിൽ ഞാനും അച്ഛനും കൊച്ചച്ഛനും കുളിക്കാൻ പോയി. യാത്ര കഴിഞ്ഞു വന്നതല്ലേ, ഫ്രഷ് ആയില്ലെങ്കിൽ ഒന്നും കഴിക്കാൻ പറ്റില്ല. വിശപ്പ് തുടങ്ങി. ശ്രീയോടും പോയി കുളിക്കാൻ പറഞ്ഞു. അവളും കുളിക്കാൻ പോയി. അച്ഛന്റെയും കൊച്ചച്ഛന്റേയും മുഖത്ത് കള്ളച്ചിരി ഞാൻ കണ്ടില്ലെന്നു നടിച്ചു. ഞാൻ ഇവളെ തട്ടിക്കൊണ്ടു പോയി കല്യാണം കഴിച്ചു വന്ന പ്രതീതിയിലാണവർ. പാവം പാവം ഞാൻ. How decent fellow am I? Country people.

പെട്ടെന്ന് കുളത്തിൽപ്പോയി മുങ്ങിക്കുളിച്ചു വന്നു. ഡ്രസ്സ് മാറി ടീ ഷർട്ടും വെള്ള മുണ്ടും ഉടുത്തു. അച്ഛനും കൊച്ചച്ചനും കാവി വേഷ്ടിയാക്കിയോ – സ്വാമി കുക്കുടനും സ്വാമി കുട്ടുസനും എന്നാണു മനസ്സിൽ തോന്നിയത്. പിന്നെ പഹൽവാന്മാരുടെ (Pahalwan originally derived from Persian = Wrestler) കക്ഷത്തിൽ കയറേണ്ടല്ലോ എന്ന ബോധം കൊണ്ട് ഉള്ളിൽ എണീറ്റുവന്ന ജഗതിച്ചേട്ടനെ അടക്കി വെച്ചു. ഹാളിൽ നോക്കിയപ്പോൾ ചേച്ചിയും അനിയനും കെട്ടിപ്പിടിച്ചു പയ്യാരം പറയുന്നുണ്ട്. അടി നിർത്തി നല്ല കുട്ടികളായി, “സ്നേഹമാണഖില സാരമൂഴിയിൽ” എന്ന് ഇവരാണെഴുതിയതെന്നു തോന്നിപ്പോകും ആ മുഖ ഭാവങ്ങൾ കണ്ടാൽ.

ഞാൻ കയറിച്ചെന്നു അമ്മാവന്റെ കാലിൽ തൊട്ടു വണങ്ങി, അമ്മാവൻ എന്നെ കെട്ടിപ്പിടിച്ചു നിറുകയിൽ ചുംബിച്ചു. അപ്പോഴേക്കും ശ്രീ കുളിച്ചു വസ്ത്രം മാറി പാർട്ടിയെയും താത്താവെയും കൂട്ടിക്കൊണ്ടു വന്നിരുന്നു. ഞാൻ അവർക്കു മുൻപിൽ സാഷ്ടാംഗ നമസ്കാരം ചെയ്തു അനുഗ്രഹം വാങ്ങി. താത്താ അക്ഷതം ഇട്ടു അനുഗ്രഹിച്ചു, പാട്ടി എന്റെ നെറ്റിയിൽ ഭസ്മം വെച്ച് തന്നു. എല്ലാവര്ക്കും സന്തോഷമായി എന്ന് തോന്നുന്നു.

ചലോ ഊണുമുറി. “എനക്ക് റൊമ്പ പസിക്കിറതു പാട്ടി” എന്നു ഞാൻ പറഞ്ഞയുടനെ എല്ലാവരും കൂടി ഭക്ഷണം കഴിക്കാനായി പോയി. കുത്തരിച്ചോറും വെണ്ടക്കാ മുരിങ്ങക്കായ മത്തങ്ങാ ഒക്കെ ഇട്ട എന്റെ ഫേവ് സാമ്പാറും കാളനും അവിയലും ബീൻസ് മെഴുക്കുപുരട്ടിയും ചീരത്തോരനും പാവയ്ക്കാ കൊണ്ടാട്ടവും നാടൻ പപ്പടവും ചേർത്ത് സമ പോളിങ്. സാധാരണയായി ഭക്ഷണം അവളരെ കുറച്ചു മാത്രം കഴിക്കുന്ന അച്ഛനും അമ്മയും കൊച്ചച്ഛനും പോലും സമ പോളിങ്. ഞാനും ശ്രീയും ആരാദ്യം പാത്രം കാലിയാകും എന്ന തീവ്ര മത്സരത്തിൽ. അഞ്ചുപ്രാവശ്യം സാമ്പാർ വാങ്ങി. പിന്നെ പാട്ടി ജോലിക്കു ഹെൽപ് ചെയ്യാൻ നിൽക്കുന്ന ചേച്ചിയോട് പറഞ്ഞു ചെറിയ ഒരു ചേരുവത്തിൽ സാമ്പാർ കൊണ്ട് എന്റെ മുന്നിൽ വെച്ചു (ഇവന് സാമ്പാറിൽ ആരോ കൈവിഷം കൊടുത്തോ എന്ന സംശയം ഒരേ സമയത്തു എല്ലാ വായിൽനിന്നും വന്നു) ഐ ആം നോട് അഷെയിംടു. ഡോണ്ട് കളിയാക്കിഫയിങ് – ഞാൻ സ്ട്രിക്ട് ആയിട്ട് പറഞ്ഞത് കേട്ട് എല്ലാവരും ചിരിച്ചു. ചോറ് തീർന്നതിനാൽ ബാക്കിവന്ന സാമ്പാറിൽ അല്പം പുളിശ്ശേരിയും ചേർത്ത് കുടിച്ചു എന്റെ തീവ്ര സാമ്പാർ പ്രേമം എല്ലാരേയും ഒന്നുകൂടി കാണിച്ചു കൊടുത്തു. (എന്റെ ദുശീലം ഈ കൂടിയാണ് – സാമ്പാർ മിച്ചം വരുന്നത് അടിയനു സഹിക്കാനാവില്ല. കുടിച്ചു തീർക്കും.) എല്ലാരും ചിരിയടക്കി. ഐ ആം നോ പ്രോബ്ലം, ഹല്ല പിന്നെ.

അതാ വരുന്നു അടപ്രഥമൻ. പാൽ പായസവും ഉണ്ട്. ഓരോ ഗ്ലാസ് ചൂടോടെ കുടിച്ചു. “പാട്ടി, ഇപ്പോൾ വയ്യ, വൈകിട്ട് നോക്കാം” എന്ന് പറഞ്ഞു. പാട്ടി എല്ലാവര്ക്കും മോര് കൊടുത്തു. കഴിച്ചു തീർത്തിട്ട് എണീക്കാൻ ക്രയിൻ വേണമെന്ന് പറഞ്ഞ എന്നെ അച്ഛനും കൊച്ചച്ഛനും ചേർന്ന് തൂക്കി എടുത്തു. “നന്ദി പള്ളം നിവാസി കാർന്നോന്മാരെ” എന്ന് നന്ദി രേഖപ്പെടുത്തി.

ഞങ്ങൾ കഴിച്ചു തീർന്നപ്പോഴേക്കും അമ്മയും കുളിച്ചു വസ്ത്രം മാറി വന്നു, അമ്മാവനും അമ്മയും ശ്രീയും പാട്ടിയും താത്താവും ചേർന്ന് ഭക്ഷണം കഴിക്കാൻ ഇരുന്നു. കൊച്ചച്ഛൻ പോയി സഹായിക്കുന്നത് കണ്ടു. പ്ളീസ് ഡോണ്ട് ഡിസ്റ്റർബ് ബോർഡ് തൂക്കി ഹാളിലെ സോഫയിൽ ഞാനും അച്ഛനും ചെരിഞ്ഞു. എന്തോ ഒച്ച കേട്ട് പതിനഞ്ചു മിനുട്ടു കഴിഞ്ഞു കണ്ണ് തുറന്നു നോക്കുമ്പോൾ ശ്രീ അമ്മയുടെ മടിയിൽ തല വെച്ച് കിടക്കുന്നു. അമ്മ സ്നേഹപൂർവ്വം അവളുടെ തലയിൽ തലോടുന്നുണ്ട്. പാട്ടിയും താത്താവും ഓരോ കസേരയിൽ ഇരിക്കുന്നു. അമ്മയും അമ്മാവനും ഒട്ടി ഇരുന്നാണ് സംസാരിക്കുന്നതു – (കുറച്ചു മുമ്പത്തെ പടക്കം പൊട്ടലും ജലധാരയും ഇവർക്കിടയിലാണ് നടന്നതെന്ന് ഭഗവാൻ പോലും മറന്നു കാണും). അച്ഛനും കൊച്ചച്ഛനും പാച്ചുവും കോവാലനും പോലെ അങ്ങോട്ടും ഇങ്ങോട്ടും പുറം ചാരി ഇരിപ്പുണ്ട്. എന്തോ സീരിയസ് ടോപ്പിക്ക് ആണ് സംസാരിക്കുന്നതെന്ന് മനസ്സിലായി.

എന്നെപറ്റിയാണ് സംസാരം. ഞാൻ എങ്ങനുണ്ട്, ഉഴപ്പനാണോ, വീടൊക്കെ കൊള്ളാമോ, ഓഫീസെങ്ങനുണ്ട് എന്നൊക്കെ ശ്രീയോട് മൈ ഡിയർ പിതാശ്രീ കുത്തിക്കുത്തി ചോദിക്കുന്നു. അവൾ എന്നെ പറ്റി ഗുഡും, വെരിഗുഡും, വെരി വെരി ഗുഡും ആയ അഭിപ്രായങ്ങൾ പറയുന്നു. അവളുടെ ജോലിയെപ്പറ്റിയും എന്തൊക്കെയോ ചോദിച്ചു, അവൾ കാര്യങ്ങൾ എല്ലാം പറഞ്ഞു.