ഒന്നും ഉരിയാടാതെ 22 [നൗഫു] 4706

കാറിൽ വെച്ച് സംസാരിച്ചതോ…നാജി കുറച്ചു ദിവസങ്ങൾക് മുമ്പ് ജാബിറിനോട് വഴിയിൽ വെച്ച് സംസാരിച്ചു നിന്നത് മനസിൽ ഓർത്തു കൊണ്ട് ബാവുവിനെ ഒന്ന് നോക്കി..

അപ്പൊ കല്യാണം മുടക്കിയത് ബാവു തന്നെയാണോ… അവിടെ തങ്ങൾ സംസാരിച്ചു നിന്നത് അവനല്ലാതെ മറ്റാരും കണ്ടിട്ടുമുണ്ടാവില്ല…

അവരുടെ സംസാരം പതിയെ ആയിരുന്നുവെങ്കിലും ഞാൻ ചെറുതായി കേൾക്കുന്നുണ്ട്.. നാജിയുടെ മുഖത്തു ഒരുപാട് ടെൻഷൻ കാണുന്നുണ്ട്.. ഞാൻ അതെല്ലാം ഒരു ചെറു പുഞ്ചിരിയാലേ ഇടയ്ക്കിടെ നോക്കി ഇരുന്നു… അവൾ എന്നെയാണ് സംശയിക്കുന്നത് എന്ന് ഓർക്കാതെ..

“എടാ.. എന്നിട്ട്…നിങ്ങൾ പോയവർ പറഞ്ഞില്ലേ അവരോട് അതൊന്നും സത്യമല്ലെന്നും ഞാൻ എന്റെ കെട്ടിയോന്റെ വീട്ടിൽ ആണെന്നും..”

“അതൊക്കെ പറഞ്ഞു നോക്കി.. പക്ഷെ അവരുടെ കയ്യിൽ തെളിവുണ്ടെന്നും.. ഇങ്ങനെ നടക്കുന്നവന്റെ കൂടെ എന്ത് വിശ്വസിച്ചിട്ടാണ് ഞങ്ങളുടെ മോളെ വിടുകയെന്നും ചോദിച്ചു അവർ ഞങ്ങളുടെ വായ അടപ്പിച്ചു…”

“എന്നിട്ടോ..”

നാജി ബാക്കി അറിയാൻ ഉള്ള ആകാംഷയോടെ ഷഫീഖിനോട് ചോദിച്ചു…

“എന്നിട്ട് എന്താവാൻ.. ജാബിർ അങ്ങോട്ടും ഇങ്ങോട്ടും പരക്കം പാഞ്ഞു നടക്കുന്നുണ്ട്.. നിങ്ങൾ വളരെ അടുത്ത നല്ല കൂട്ടുകാരാണെന്നു എനിക്കും നമ്മുടെ കൂട്ടുകാർക്കും എല്ലാം അറിയാം.. പക്ഷെ…”