The Creature [ശിവശങ്കരൻ] 124

ആ കറുത്ത രൂപം റെഡ്ഢിയെ വലിച്ചിഴച്ച് കുറച്ചുദൂരം കാട്ടിലൂടെ കൊണ്ടു പോയി… വെപ്രാളത്തിൽ കയ്യിൽ നിന്നും തെറിച്ചുപോയ തോക്കും കണ്ടെത്തി ഹരി അടുത്തേക്ക് എത്തുമ്പോഴേക്കും റെഡ്ഢിയുടെ ജീവനറ്റ ശരീരം വികൃതമായിപ്പോയിരുന്നു… അറ്റുപോയ കൈകളും കാലുകളും അവിടെ ചിതറിക്കിടന്നിരുന്നു… മുഖത്തിന്‌ ഒരുഭാഗം ഇല്ലായിരുന്നു… അതിലും ഭീകരമായ കാഴ്ച പാതിമാംസം ഇല്ലാതിരുന്ന വയറിന്റെ ഭാഗത്തു നിന്നും ആന്തരാവയവങ്ങൾ കാണാമായിരുന്നു…

ഒരു പോലീസുകാരനായിട്ട് കൂടി ആ കാഴ്ച അധികം കണ്ടു നിൽക്കാനാകാതെ ആ ഭീകരജീവിക്ക് വേണ്ടി ഹരി തിരച്ചിൽ ആരംഭിച്ചു.

കുറച്ചു ദൂരെയായി എന്തോ ഓടിമറയുന്നത് കണ്ട ഹരി, വെള്ളിത്തിരകൾ നിറച്ച റിവോൾവറുമായി സൂക്ഷിച്ച കാലടികളോടെ ആ രൂപത്തെ പിന്തുടരാൻ ശ്രമിച്ചു… നടന്നു നടന്നു അവൻ എത്തിച്ചേർന്നത്, ആ വന്നതിന്റെ ഒത്തനടുവിൽ ഉയർന്നു നിൽക്കുന്ന ഒരു പാറക്കൂട്ടത്തിന് മുകളിലായിരുന്നു. ആ പാറക്കൂട്ടം അവസാനിക്കുന്നിടത്ത് ചെങ്കുത്തായ, കുത്തനെയുള്ള താഴ്ചയായിരുന്നു…

അവിടെ ആരുമില്ലെന്നു കണ്ടു തിരിഞ്ഞ ഹരി ആ പറക്കൂട്ടത്തിലേക്ക് താൻ കയറി വന്ന വഴിയിൽ, തന്നെത്തന്നെ തുറിച്ചുനോക്കി നിൽക്കുന്ന ആ ഭീകരസത്വത്തെ കണ്ടു അൽപനേരം മരവിച്ചു നിന്നു…

തൊട്ടടുത്ത നിമിഷം ആ ജീവി തന്റെ നേരെ ഉയർന്നു ചാടുന്നത് കണ്ടപ്പോഴാണ് അവനു സ്വബോധം വീണ്ടുകിട്ടിയത്…

മിന്നൽവേഗത്തിൽ തന്റെ കയ്യിലിരുന്ന റിവോൾവർ നീട്ടിപ്പിടിച്ചു ആ സത്വത്തിന്റെ ഹൃദയഭാഗത്തു തിരയൊഴിയും വരെ നിറയൊഴിച്ചു ഹരി. ചാട്ടത്തിന്റെ വേഗതയിൽ ആ ഭീകരനായ കൂറ്റൻ ചെന്നായ അവന്റെ മേലെ തന്നെ വന്നു പതിച്ചു എന്നാൽ ഒരാക്രമണത്തിനൊന്നും പറ്റാതെ അവശനായിരുന്നു അത്. വെള്ളിബുള്ളറ്റുകൾ ആ ഭീകരശരീരത്തിൽ പ്രവർത്തിച്ചു തുടങ്ങിയതിന്റെ ഫലമായി അതിന്റെ പൈശാചികശക്തികൾ അതിനോടകം നഷ്ടമായിരുന്നു…

കൂറ്റൻ ചെന്നായുടെ ശരീരം വിട്ട്, സാമുവൽ മനുഷ്യരൂപത്തിലേക്ക് തിരിച്ചുവന്നപ്പോൾ, അത്രനേരം ആ ശരീരത്തിനടിയിൽപ്പെട്ടു ശ്വസിക്കാൻ വിഷമിച്ച ഹരി, സാമുവലിന്റെ ചേതനയറ്റ മനുഷ്യശരീരം തന്റെ മേൽനിന്നും ബലം പ്രയോഗിച്ചു താഴെക്കിട്ട് ശക്തിയായി ശ്വാസം വലിച്ചു… കൈകളും കാലുകളും വരഞ്ഞും കമ്പുകൾ കുത്തിക്കീറിയും വ്രണപ്പെട്ടിരുന്നു. കുറച്ചു നേരം അവൻ സാമുവലിന്റെ ശരീരം നോക്കി നിന്നു, ആ ശരീരം തോളിലേറ്റി, അവനാ കാടിറങ്ങി.

************************

പിറ്റേന്ന്, പോലീസ് കോൺഫറെൻസിൽ പ്രസന്റ് ചെയ്ത വീഡിയോയും ബാക്കി തെളിവുകളും അനുസരിച്ചു, വർഷങ്ങളായി നീണ്ട കൊലപാതകങ്ങൾ ചെയ്തത് വേയർവൂൾഫ് ആയി മാറിയ സാമുവൽ ഡോമനിക് ആയിരുന്നു എന്ന് സ്ഥിരീകരിക്കപ്പെട്ടു. എന്നാൽ ആ ഭീകരമായ അവസ്ഥയിലും കൃത്യനിർവഹണത്തെക്കുറിച്ചും നീതിനിർവഹണത്തെക്കുറിച്ചും അത്ഭുതാവഹമായ നിഷ്ഠ വച്ചുപുലർത്തിയ സാമുവൽ, തീർച്ചയായും ആദരവർഹിക്കുന്നു എന്നും ആ യോഗം വിലയിരുത്തി.