??സേതുബന്ധനം 2 ?? [M.N. കാർത്തികേയൻ] 372

“അപ്പൊ ടീച്ചർ പറയുന്നത് ഇവിടുത്തെ അധ്യാപകന്മാർ എന്ന് പറഞ്ഞു നടക്കുന്ന സാറന്മാർ ഒക്കെ വെറും കൊജ്ഞാണന്മാർ ആണെന്നാണോ?”

ക്ലാസ്സിന്റെ മൂലക്ക് നിന്ന് ഒരുത്തൻ ചോദിച്ച ചോദ്യത്തിന് എന്റെ കയ്യിൽ മറുപടി ഇല്ലായിരുന്നു. ഞാൻ ഇളിഭ്യതയോടെ ഒരു ചിരി ചിരിച്ചു. ശേഷം നാണം മറയ്ക്കാൻ ഒരു പ്രകടനവും നടത്തി.

“നീയൊക്കെ വന്നു കയറിയപ്പോൾ തന്നെ തറുതല പറഞ്ഞു തുടങ്ങിയോടാ. സാറന്മാരേ ബഹുമാനിക്കാൻ അറിയില്ലേ. വീട്ടിൽ കാണിക്കുന്നത് ഒന്നും ഇവിടെ വേണ്ട. ഇനി ഇമ്മാതിരി വർത്തമാനം പറയുന്നവൻ വീട്ടിൽ നിന്നും ആളെയും കൂട്ടി വരേണ്ടി വരും.”

നാണം മറയ്ക്കാൻ പറഞ്ഞത് ആണെങ്കിലും പിള്ളേർ ഒക്കെ ഒന്നു ഭയന്നിട്ടുണ്ട്. വേറെ ആരെങ്കിലും ഞാൻ ഫ്രണ്ട്ലി ആണെന്ന് പറഞ്ഞു കൊടുത്തത് കൊണ്ടാവും പിള്ളേർ ഇങ്ങനെ ധൈര്യമായി എന്നോട് തറുതല പറഞ്ഞത്. ഇപ്പോ എന്തായാലും ഇങ്ങനെ ഇരിക്കട്ടെ. പേടി നല്ലതാണ്.

സേതുവിനെ ഒന്നു നോക്കിയ ശേഷം ഞാൻ സ്റ്റാഫ് റൂമിലേക്ക് തിരിച്ചു പോയി. അവിടെ ചെന്ന ശേഷം ഞാൻ കാര്യങ്ങൾ പറഞ്ഞു.

“എന്റെ സാറേ ഫസ്റ്റ് ഇയർ പിള്ളേർ വരെ ചോദിച്ചു തുടങ്ങി. നിങ്ങടെ ഒക്കെ നട്ടെല്ലിന്റെ സ്ഥാനത്ത് വാഴപ്പിണ്ടി ആണോ എന്ന്” ഞാനൊന്ന് ചിരിച്ചു കൊണ്ട് രാജീവ് സാറിനോട് പറഞ്ഞു.

“ആ പറഞ്ഞവനെ ഇങ്ങു വിളിച്ചോണ്ട് വാ. അവനു കാണിച്ചു കൊടുക്കാം വാഴപ്പിണ്ടി ആണോ അല്ലെ എന്നൊക്കെ”

“സാറേ പിള്ളേരോട് കാണിച്ചിട്ട് കാര്യമില്ല. ഈ ആവേശം ഒക്കെ രാവിലെ കാണാഞ്ഞത് എന്താ എന്ന് അവർ ചോദിച്ചാൽ നമ്മളുടെ കയ്യിൽ പറയാൻ മറുപടി ഇല്ല”

“അതൊക്കെ ശെരി തന്നെ. അവന്മാർക്ക് അറിയില്ലല്ലോ കാര്യം എന്താണെന്ന്. എന്റെ ടീച്ചറെ പറയാൻ ഒക്കെ എളുപ്പം ആണ്. ഈ രാഹുലിനെ പേടിച്ചിട്ടല്ല. അവനെ വല്ലോം ചെയ്താലും അവന്റെ അപ്പൻ ഒന്നും പറയില്ല. പക്ഷെ ആ കുര്യാക്കോസ് മുതലാളിയുടെ മകൻ മാത്യൂ ആണ് പ്രശ്നം. അവനും അവന്റെ അപ്പനും ഈ സിറ്റിയിലെ ഗുണ്ടകളൊക്കെ ആയി നല്ല ബന്ധം ആണ്. അങ്ങേര് ആണെങ്കിൽ മോനെ ഓമനിച്ചു വഷളാക്കി വെച്ചിരിക്കുകയും ആണ്. വല്ലോം ചെയ്യാൻ നിന്നാൽ പിറ്റേന്ന് തല കാണില്ല. അവന്മാർ വെട്ടിക്കൊണ്ട് പോകും. എന്തിനാ വെറുതെ ഭാര്യയെയും മക്കളെയും വഴിയാധാരം ആക്കുന്നത്. ഈ പറയുന്ന നാറികൾക്ക് ബോധമില്ല എന്നു വെക്കാം. ടീച്ചർ എല്ലാം അറിഞ്ഞിട്ടും ഇതെങ്ങനെയാ പറയുന്നേ”

സർ പറഞ്ഞതും ശെരിയാണ്. ഞാൻ അതങ്ങോട്ട് ഓർത്തില്ല.

ഞങ്ങടെ സംസാരം എല്ലാം കേട്ട പ്രിൻസിപ്പൽ പറഞ്ഞു.

“ഞാൻ നെടുമ്പള്ളി അച്ഛനെ വിളിച്ചു കാര്യം പറഞ്ഞിട്ടുണ്ട്. നാളെ ദിവാകരൻ സാറിനോട് ഇവിടെ വച്ചൊരു മീറ്റിങ്ങിനും പറഞ്ഞിട്ടുണ്ട്.”

“ഈ നെടുമ്പള്ളി അച്ഛൻ ആരാ സാറേ. വല്യ പുള്ളി ആണോ?”ശ്രീജ ടീച്ചർ ചോദിച്ചു.

“ആ ബെസ്റ്റ്. വല്യ പുള്ളി ആണോന്നോ. ടീച്ചറിന് അയാളെ പറ്റി അറിയാത്തത് കൊണ്ടാ. അങ്ങേര് പഴയ ഗുണ്ട അല്ലായിരുന്നോ. പിന്നീട് ദൈവവിളി വന്നു എന്നൊക്കെയാ പറയുന്നത്. ഇപ്പൊ ഒരു പത്തറുപത് വയസ്സെങ്കിലും കാണും. പക്ഷെ ഇപ്പോഴും നല്ല ആരോഗ്യം ആണെന്നാണ് പറയുന്നത്. പണ്ട് വല്യ ഗുണ്ടായിസം കളിച്ചു നടന്ന ആളാണ്.
ഈ വിഷയത്തിൽ എന്നെക്കാൾ വിവരം നമ്മുടെ പ്യൂൺ സുരേഷ് അണ്ണനാണ്. ഇവര് ദോസ്തുക്കൾ അല്ലെ.” രാജീവ് സർ പറഞ്ഞു.

എല്ലാരും പ്രതീക്ഷയോടെ സുരേഷ് അണ്ണനെ നോക്കി. ചെറു ചിരിയോടെ അയാൾ പറഞ്ഞു തുടങ്ങി. നെടുമ്പള്ളി അച്ഛന്റെ കഥ.