റെഡ് ഹാൻഡ് 1 [Chithra S K] 114

‘Chinju(wife)’

ഭാര്യയാണ്… ഫോൺ എടുത്തു ഹലോ പറഞ്ഞു. മറുതലക്കൽ ഒരു കാന്താരിയുടെ ശബ്‍ദം.

” അപ്പച്ചാ… അപ്പച്ചൻ എത്താറായോ. ”

ജസ്റ്റിന്റെ മകളാണ് കക്ഷി. ക്രിസ്തുമസ് ഒക്കെ വരുന്നത് കൊണ്ട് അപ്പച്ചനായ ജസ്റ്റിനെ പ്രതീക്ഷിച്ചിരിക്കുകയാണ്.ജസ്റ്റിൻ തിരുവനന്തപുരം തമ്പാനൂർ പോലീസ് സ്റ്റേഷനിലെ സി ഐയാണ്. മൂന്ന് ദിവസം കൂടി കഴിഞ്ഞാൽ ക്രിസ്തുമസായതുകൊണ്ട് നാട്ടിലേക്ക് പോരുന്നവഴിയാണ്.

” ദാ എത്തിയല്ലോ…. എന്റെ കാന്താരിയുടെ അപ്പച്ചൻ ദാ അടുത്തെത്തി. ”

“അപ്പച്ചൻ കേക്ക് മേടിച്ചല്ലോലെ…. ” അവൾ കൊഞ്ചികൊണ്ടു അയാളോട് ചോദിച്ചു.

” അമ്പടി കാന്താരി അപ്പോൾ കേക്ക് കിട്ടുവന്നാണല്ലേ നിനക്ക്…. അല്ലാതെ എന്നെ കാണുവാൻ ആശയുണ്ടായിട്ടല്ല” ചിരിച്ചു കൊണ്ട് ജസ്റ്റിൻ പറഞ്ഞു നിർത്തുമ്പോൾ മറുതലക്കൽ നിന്നും കൊഞ്ചിയുള്ള ചിരി കേട്ടു.

” മോൾ അമ്മച്ചിക്ക് ഫോൺ കൊടുത്തേ.”

പെട്ടന്നാണ് ഒരു പോലീസ് ജീപ്പ് മുന്നിൽ നിന്നു കുറച്ചു മാറി ബ്രേക്കിട്ട് നിർത്തിയത്. പെട്ടെന്നുള്ള വണ്ടിയുടെ വരവിൽ ജസ്റ്റിൻ ഒന്നു ഞെട്ടി. ബീക്കൺ ലൈറ്റുകൾ കത്തുന്ന ആ വണ്ടി ജസ്റ്റിന്റെ മുൻപിലേക്ക് റിവേഴ്‌സ് എടുത്ത് നിന്നു.

” എന്താണ് സർ…. ഡിപ്പാർട്ട്മെന്റിൽ ബ്ലാക്ക് മഷി വീഴാത്ത ഒരാൾ, ട്രിവാൻഡ്രം നഗരത്തെ കിടു കിടാ വിറപ്പിച്ച ഗർജിക്കുന്ന സിംഹം എന്നൊക്കെ വിളിപേരുള്ള ഒരാൾ ഇങ്ങനെ ഭയക്കുന്നത് മോശമാണ് കേട്ടോ. ” ജീപ്പിൽ നിന്നും ഒരു മുപ്പതുവയസ്സ് തോന്നിക്കുന്ന വനിത എസ് ഐ പുറത്തേക്കിറങ്ങി.

ജസ്റ്റിന്റെ മുഖത്ത് ഒരു ചിരിവിടർന്നു. കൈയിലെ ഫോണിൽ ‘ ഹലോ… ഹലോ ‘ എന്ന വിളി തുടർന്നുകൊണ്ടിരുന്നു.