ക്വാറന്റൈൻ പൊന്നോണം [Aadhi] 1330

” അതാ അങ്കമാലി ഡയറീസിലെ പെണ്ണല്ലേ.. ?? ”

” ഓ..അതെന്തേലും  ആവട്ടേന്റളിയാ.. നീ കേക്ക്.. അതാണേൽ നല്ല മണമാ ..ഞാൻ വെറുതെ ഇരിക്കുമ്പോ അതേന്നു ശകലം ദോണ്ടേ കയ്യിലെക്കെടുത്തു വെറുതെ തിരുമ്മി ഒന്ന് മണത്തു നോക്കും.. നമ്മടെ സ്പ്രേ ഒന്നും വേണ്ട മോനെ.. അമ്മാതിരി മണമാ.. പണ്ടേ ഈ ആക്സോക്കെ മേടിച്ചു പൈസ കളഞ്ഞ നേരത്തു ഇത് മേടിച്ചു ശകലം പൂശിയാ മതിയാരുന്നു… ”

” ഇപ്പൊ ആരാടാ വേറെ കാര്യങ്ങൾ പറയുന്നത് ?? ”

” ആ സോറി സോറി.. കേക്ക്…അപ്പൊ ഞാൻ ഇടക്കിടക്ക് അതെടുത്തു ഉപയോഗിക്കും.. പിന്നെ  ഓൺലൈനിന്ന്‌ ഒരു മാസ്ക്ക് ഓർഡർ ചെയ്തായിരുന്നു.. എൻ 95.. അതൊക്കെ വെച്ചാ എന്റെ നടപ്പ്.. പിന്നെ എന്തേലും വാങ്ങിച്ചോണ്ട് വന്നാ മുറ്റത്തു വെച്ച് തന്നെ ഡെറ്റോളോക്കെ കൂട്ടി തൊടച്ചു വെയിലത്ത് വെച്ച് ഒരു മൂന്നാലു മണിക്കൂർ കഴിഞ്ഞേ അകത്തേക്ക് പോലും വെക്കൂ.. അതിപ്പോ പച്ചക്കറി ആണേലും എന്താണേലും.. എന്നിട്ട് അത് വീട്ടിൽ ആ ഓഫീസ് റൂമിൽ ഒരു ദിവസം രാത്രി മൊത്തം വെച്ച് പിറ്റേന്നേ ഉപയോഗിക്കൂ… ഞാനാണേലോ.. പുറത്തു പോയി വന്നാ വീടിന്റെ പിന്നാമ്പുറത്തൂടെ പോയി കുളിമുറിയിൽ കേറി കുളിച്ചു പാന്റും ഷർട്ടും ഒക്കെ സോപ്പുവെള്ളത്തേ ഇട്ട് വെച്ചേ അകത്തു കേറത്തൊള്ളൂ…”

” ഇത്രേം സൂക്ഷിച്ചിട്ടും നിനക്കെങ്ങനാടാ കൊറോണ പിടിച്ചേ.. ”

”  അളിയാ…. ഞാൻ എന്തേലും പറയുമേ നല്ലോരു ദിവസായിട്ട്..കൊറോണയൊന്നുമില്ലാ… ക്വറന്റൈനിലാ… ആ നീയിത് കേക്ക്.. എന്നിട്ട് ഞാനന്ന് ഹെൽത്ത് സെന്ററീ പോയി.. വലിയ തെരക്കൊന്നുമില്ല..ന്നാലും ഒണ്ട്.. ഞാനവിടെ ചെന്നീ ശീട്ട് ഒക്കെ കാണിച്ചപ്പോ അവരൂ പറഞ്ഞു അതൊന്നും വേണ്ടാ പേരും നമ്പറും മതിയെന്ന്.. അതൊക്കെ പറഞ്ഞു കൊടുത്തു ടോക്കണും വാങ്ങി ഒരു കസേരേ ചെന്നിരുന്നു.. ഈ തെരക്കെല്ലാം ആയപ്പോ എന്റടുത്തേക്ക് ആള് വരുന്നേ കണ്ടു ഞാൻ വേഗം എണീറ്റാ പൊറത്തുള്ള സ്റെപ്പിന്റവിടെ പോയി നിന്ന്… അപ്പോഴാ നശിച്ച മൂക്ക് ചൊറിയുന്നേ.. പിന്നെയാ സാനിറ്റൈസർ എടുത്തു കൈയൊക്കെ തൊടച്ചു ഞാൻ മാസ്ക് പൊക്കി മൂക്ക് ചൊറിഞ്ഞു.. മാസ്ക് താഴ്ത്തി പിന്നേം കൈയൊക്കെ കഴുകി.. കുറെ നേരം കഴിഞ്ഞു അവിടേം ആള് വരാൻ തൊടങ്ങിയപ്പോ ഞാനാ പൊറത്തുള്ള മാവിന്റവിടെ ചെന്ന് നിന്ന്.. നേരം കൊറേ ആയിട്ടും എന്റെ പേര് വിളിക്കുന്നേ ഒന്നും കേൾക്കുന്നില്ല… എന്റെ ശേഷം വന്നവരൊക്കെ ദോ മരുന്നും മേടിച്ചോണ്ടു പോവുന്ന്.. അപ്പൊ ചെന്ന് നോക്കിയപ്പോഴാ… എന്റെ പേരൊക്കെ എപ്പോഴേ വിളിച്ചു.. ഇനിയങ്ങോട്ട് മാറി നിക്ക് ഇത്തിരി കഴിഞ്ഞു തരാമെന്നു.. ഞാനവിടെ കെടന്നു  ബഹളോക്കെ ഉണ്ടാക്കി അവസാനം അവര് എന്റെ മരുന്നെടുക്കാൻ തൊടങ്ങി.. ഞാനും വല്യ കാര്യത്തി ചുറ്റും നോക്കിയപ്പോ ദേ ഒരു പയ്യൻ.. ഒരു പത്തു പന്ത്രണ്ട് വയസ്സ് കാണും… ചൊമരീ കൂടെ പടം വരച്ചു കളിക്കുന്നു കൈ കൊണ്ട്.. അവനെ നോക്കി ഇവിടൊക്കെ ആരൊക്കെ തൊട്ടതാണെന്നറിയോ.. നീയീ പേപ്പറൊക്കെ വായിക്കുന്നെ അല്ലെ… എപ്പോ വേണേലും കൊറോണ വരാ.. അതോണ്ട് അവിടേം ഇവിടേം ഒന്നും തൊടേണ്ട എന്നും പറഞ്ഞു ഉപദേശിച്ചപ്പോ ഒണ്ടല്ലോ.. സത്യം പറഞ്ഞാ ഞാനൊരു നന്മമരം ആയ പോലെയാ എനിക്ക് തോന്നിയേ..  പിന്നെ മരുന്നൊക്കെ മേടിച്ചു ഇറങ്ങി അവിടുന്ന്…വണ്ടിയെ കേറി ഹെൽമെറ്റ് വെക്കുന്നേന്റെ മുമ്പും കൂടെ ഞാനാ സാനിറ്റൈസർ ഇട്ടെടാ…”