പറയാൻ ബാക്കിവെച്ചത് [Shana] 83

കെട്ടിപ്പൂട്ടിവെച്ചൊരു ഹൃദയമായിരുന്നെന്റെത് എല്ലാർക്കുമുന്നിലും വിജയിച്ചു കാണിക്കണമെന്ന് കരുതിയപ്പോൾ അവിടെ നിന്നെയും മോനെയും പരിഗണിച്ചില്ല… എല്ലാം നേടിയെടുക്കണമെന്ന വാശി മാത്രമേ മുന്നിലുണ്ടായിരുന്നുള്ളു… ഒരിക്കൽ പോലും നീ എന്നെ തനിച്ചാക്കിപ്പോകുമെന്ന് സ്വപ്നത്തിൽ പോലും ചിന്തിച്ചിരുന്നില്ല… എനിക്കൊന്നുമറിയില്ല മൃദു എന്റെ എല്ലാം നീ ആയിരുന്നില്ലേ ഉറക്കമില്ലാത്ത രാത്രികൾ എനിക്ക് സമ്മാനിച്ചുകൊണ്ട് നീണ്ടൊരു ഉറക്കത്തിലേക്ക് നീ പോയല്ലേ…

ശെരിയാണ് ഒരിക്കൽ പോലും നിന്നെ ഞാൻ പരിഗണിച്ചില്ല. നിന്റെ ഇഷ്ടങ്ങൾ നോക്കിയില്ല, നിന്റെ ആഗ്രഹങ്ങൾ സാധിച്ചു തന്നില്ല. വാശിയായിരുന്നു തോൽപിച്ച എല്ലാർക്കും മുന്നിലും ജയിച്ചു കാണിക്കാനുള്ള വാശി. അതിൽ എന്റെ ഏറ്റവും വലിയ ധൈര്യം നീയായിരുന്നു മൃദു.. നീ ആഗ്രഹിച്ചൊരു ജീവിതം തരാൻ എനിക്കുകഴിഞ്ഞില്ല . പക്ഷേ എന്റെ ഉള്ളിൽ നീയും നമ്മുടെ മോനും മാത്രമേ ഉണ്ടായിരുന്നുള്ളു…….
പലപ്പോളും നീ പലതും മറക്കുന്നത് നിന്റെ അശ്രദ്ധമാത്രമായ് കണ്ടുള്ളു. അതിലെല്ലാം നിന്നെ ഞാൻ പഴിചാരി വേദനിപ്പിച്ചിട്ടുണ്ട്… അസഹ്യമായ തലവേദന പറയുമ്പോൾ ഫോണിലുള്ള നിന്റെ അമിത ഉപയോഗമാണെന്ന് പറഞ്ഞു കുറ്റപെടുത്തിയിട്ടുണ്ട്… പതിവുപോലെ അലാറം കിടന്നടിച്ചത് ഓഫ് ചെയ്തു എഴുന്നേറ്റു പോകാൻ നിന്നോട് ബഹളം വെച്ചതു പോലും എന്റെ ഉറക്കം പോയ ദേഷ്യമായിരുന്നു. ഒന്നിലും പ്രതികരിക്കാതെ നീ കിടക്കുന്ന കണ്ടപ്പോളാണ് ലൈറ്റ് ഇട്ടു നോക്കിയത് തന്നെ. എനിക്കിപ്പോളും ഓർക്കുവാൻ വയ്യ മൃദു മൂക്കിലും ചെവിയിലും ചോരയൊലിപ്പിച്ചു ബോധമില്ലാതെ കിടക്കുന്ന നിന്റെ മുഖം. ഉള്ളിലൊരാന്തലായിരുന്നു…. icu വിനു മുന്നിൽ അക്ഷമനായി നിന്നപ്പോൾ ഡോക്ടരുടെ വാക്കുകൾ തീമഴപോൽ എന്നിലേക്ക് പെയ്യുവായിരുന്നു…. ട്യൂമർ അവസാന ഘട്ടത്തിലേക് എത്തിയെന്നു കേട്ടപ്പോൾ തകർന്നുപോയി ഞാൻ… ഒരിക്കലെങ്കിലും നിന്നെ കേട്ടിരുന്നെങ്കിൽ നിന്റെ വാക്കുകൾ ഒന്ന് ശ്രദ്ധിച്ചിരുന്നെങ്കിൽ ഒരിക്കലും നിന്നെയെനിക്ക് നഷ്ടമാവില്ലായിരുന്നു… നീ തിരിച്ചുവരുവാൻ ഞാൻ ഉള്ളറിഞ്ഞു പ്രാർത്ഥിച്ചു…. അറിയാം വൈകിപ്പോയെന്ന് നിന്റെ ഇഷ്ടങ്ങൾക്കൊപ്പം കൈകോർത്തുപിടിച്ചു നടക്കാൻ ഞാൻ കൊതിച്ചു ഒരിക്കലും സാധിക്കില്ലന്നറിയാം… നീ ഇല്ലായ്മയിൽ ഞാൻ ഉരുകി തീരുവാണ് മൃദു… നിന്നോടൊപ്പം വരാൻ കൊതിക്കുവാണ്. . നീ ആഗ്രഹിച്ചൊരു ജീവിതം സാധിച്ചില്ല എങ്കിലും നമ്മുടെ മോനെ നീ ആഗ്രഹിച്ചപോലെ ഞാൻ വളർത്തി … നല്ലൊരു ഭർത്താവാകാൻ കഴിയാതെ പോയി പക്ഷേ നല്ലൊരു അച്ഛനായി ഞാൻ മാറി അങ്ങ് സ്വർഗ്ഗലോകത്തിരുന്ന് നീ അത് കണ്ടു സന്തോഷിക്കുന്നില്ലേ …….പതുക്കെ അയാൾ ഉറക്കിലേക്ക് വഴുതിവീണു… ഒരിക്കലും തിരിച്ചുവരാത്ത ഉറക്കിലേക്ക് അപ്പോൾ അയാളുടെ മുഖത്ത് ഒരു പുഞ്ചിരി വിരിഞ്ഞിരുന്നു തന്റെ മൃദുവിനു കൊടുത്ത വാക്ക് പാലിച്ചതിന്റെ പുഞ്ചിരി…..

ഫ്രണ്ട്സ് എഴുത്തിന്റെ തുടക്കകാലത്ത് എഴുതിയ ഒരു ചെറിയ കഥ ആണിത്… ഒത്തിരി പോരായ്മകൾ ഉണ്ടാവും… പോരായ്മകൾ  ക്ഷമിച്ചു വായിക്കണേ….