ഓണം ഇനിയും മരിക്കാത്ത ഓണം [Aadhi] 1519

രണ്ടു ദിവസം കഴിഞ്ഞു കോളേജിലെ അധ്യാപകരുമായുള്ള മീറ്റിങ് കഴിഞ്ഞു ഇത്തവണ കോളേജ്, ഓണാഘോഷങ്ങളിൽ നിന്ന് വിട്ടു നിൽക്കുന്നു എന്ന് തീരുമാനിച്ചു,  ഓഫിസ് മുറിയിലേക്ക് വന്നപ്പോഴാണ് പ്രിൻസിപ്പാൾ മേശയിൽ ഇരിക്കുന്ന വെള്ളക്കവർ കണ്ടത്. സെക്ഷനിലെ ആരെങ്കിലും വായിച്ചു നമ്പർ ഇട്ടാണ്  സാധാരണ കത്തുകൾ തന്റെ മുന്നിൽ എത്താറുള്ളത്. പക്ഷെ ഈ കവർ പൊട്ടിച്ചതിന്റെ യാതൊരു ലക്ഷണങ്ങളുമില്ല. കസേരയിൽ ചാരി ഇരുന്നുകൊണ്ട് മൂന്നായി മടക്കിയ കത്തെടുത്തു അദ്ദേഹം വായിക്കാൻ തുടങ്ങി.

‘ ബഹുമാനപ്പെട്ട സാറിന്,

ഞാൻ ജീവിതത്തിൽ ആദ്യമായിട്ടാണ് ഒരു കത്തെഴുതുന്നത്. സാറിനെ പോലെ ഉള്ള വലിയ ആളുകളോട് എങ്ങനെ സംസാരിക്കണം എന്ന് പോലും എനിക്കറിയില്ല. ഞാൻ ഷെൽഹയുടെ ഉമ്മയാണ്. സാറ് മറന്നിരിക്കാൻ വഴിയില്ല. കഴിഞ്ഞ വര്ഷം സാർ ഇവിടെ വീട്ടിൽ വന്നിരുന്നു. ഞങ്ങളോടൊക്കെ സംസാരിച്ചിരുന്നു. വീണ്ടും പലപ്പോഴും എന്റെ ഭർത്താവിനെ സാർ കണ്ടിട്ടുമുണ്ട്.

പത്രത്തിൽ കണ്ട ഒരു വാർത്തയാണ് ഈ കത്തെഴുതാനുള്ള കാരണം. കോളേജിൽ ഈ വര്ഷം ഓണാഘോഷം നടത്തേണ്ട എന്ന് തീരുമാനിച്ചെന്നു വായിച്ചു. എന്തിനാണ് അങ്ങനെ ഒരു തീരുമാനം എടുത്തതെന്നും അതിലുണ്ടായിരുന്നു. എന്റെ മോൾ ഇല്ലാതായി ഒരു വര്ഷം പോലും ആവാത്തത് കൊണ്ട്. അല്ലേ?

ഒരു വർഷമല്ല, കൃത്യമായി പറഞ്ഞാൽ മുന്നൂറ്റി ഇരുപത്തെട്ടു ദിവസം ആയി എന്റെ മോളെന്നെ ഉമ്മാന്ന് വിളിച്ചിട്ട്. ഇന്നും അവൾ ഉണ്ടായിരുന്നെങ്കിൽ ചിലപ്പോൾ പേപ്പറിൽ ഈ വാർത്ത ഒന്നും വരില്ലായിരുന്നു. അവിടുത്തെ കുട്ടികൾ ഓണപ്പരിപാടികൾ വേണ്ടെന്നും വേണമെന്നും പറഞ്ഞു സമരം നടത്തില്ലായിരുന്നു. എല്ലാവരും സന്തോഷത്തോടെ എല്ലാ വർഷത്തെയും പോലെ ഓണം ആഘോഷിച്ചേനെ.. അല്ലേ സാറേ..

അല്ല.. നിങ്ങൾക്കല്ലേ അവൾ ഇല്ലാതായിട്ടുള്ളൂ.. എനിക്ക് ഇന്നും എന്റെ മോൾ ജീവനോടെ ഉണ്ട്.. കോളേജ് കഴിഞ്ഞു അവൾ എന്നെങ്കിലും തിരിച്ചു വരുമെന്ന് വെറുതെ ആണെങ്കിലും ഞാൻ ആഗ്രഹിക്കാറുണ്ട്.. വരുമ്പോൾ ആദ്യം തന്നെ എന്നെ കാണുവാനായി ഞാൻ ഉമ്മറത്തിരിക്കാറുണ്ട്..  വെറുതെയാണെന്നറിയാം.. എങ്കിലും..

സാറിനു ഓർമ ഉണ്ടോ ആവോ?? കഴിഞ്ഞ രണ്ടു കൊല്ലവും എന്റെ മോളായിരുന്നു കോളേജിൽ ഏറ്റവും മാർക്ക് നേടിയത്. അതിനു സാർ കൊടുത്ത മെഡൽ ഇവിടെ അവളുടെ റൂമിൽ തൂക്കിയിട്ടുണ്ട്. അവൾക്ക് ആ കോളേജ് ഒരുപാട് ഇഷ്ടമായിരുന്നു. പഠിക്കാനായാലും കോളേജിലെ പരിപാടികൾ ആയാലും.. അതെല്ലാം മുഴുവനായും കണ്ടേ അവൾ വരുമായിരുന്നുള്ളൂ. അല്ലെങ്കിലും, പന്ത്രണ്ട് കൊല്ലം സ്‌കൂളിൽ പോയ പോലെ ആയിരുന്നില്ല അവൾ അവിടെ വന്ന് കുറച്ചുകാലം കഴിഞ്ഞപ്പോൾ… പറയുന്ന വാക്കിലും, ചെയ്യുന്ന പ്രവർത്തിയിലും ഒക്കെ അവൾക്ക് നല്ല ബോധ്യം ഉണ്ടായിരുന്നു. അവൾ എങ്ങനെ ആവണമെന്ന് ഞങ്ങൾ ആഗ്രഹിച്ചോ, അതുപോലെ അവൾ മാറുന്നത് കണ്ടു ഞങ്ങൾ സന്തോഷിച്ചിരുന്നു.