ആമുഖം,

പ്രിയരേ,  ഒരു കഥയുമായി ഞാൻ വീണ്ടും വന്നിരിക്കയാണ്. ഇതും ഒരു കൊച്ചു പ്രണയ കഥയാണ്. കുറച്ചു വർഷം മുൻപ് കേട്ട് മറന്നൊരു തീം ആണ്. എല്ലാവരുടെയും സ്നേഹവും സപ്പോർട്ടും പ്രതീക്ഷിച്ചു കൊണ്ടു തുടങ്ങുന്നു.

*******

ജീവിതത്തിലെ ഏറ്റവും പ്രധാനപ്പെട്ട ഒരു ടേണിങ് പോയിന്റ് ആയ കോളേജ് കാലഘട്ടത്തിലേക്ക് ഇന്ന് കാലെടുത്തു വെക്കുകയാണ് അനന്തു.

അനന്തുവിന്റെ യഥാർത്ഥ നാമം, അനന്ത നാരായണൻ. അനന്തുവിനെ പറ്റി പറയാൻ തുടങ്ങുമ്പോൾ, കാണാൻ വെളുത്തു, ട്രിം ചെയ്‌ത ഭംഗിയുള്ള മീശയും താടിയുമുള്ള മുഖം, ചെറിയ കണ്ണുകളും ഉയർന്ന നാസികയും ഒരുപാട് കട്ടിയില്ലാത്ത പുരികങ്ങൾ.

അഞ്ചടി ഒമ്പതു ഇഞ്ച് പൊക്കം, എപ്പോളും നുണക്കുഴി കാട്ടി പുഞ്ചിരി തൂക്കിയ മുഖവും, ആവറേജ് ശരീരവും ഉള്ള ഒരു പാവം ചെറുപ്പക്കാരൻ. സ്നേഹിക്കാൻ മാത്രം അറിയുന്ന അവന്റെ മനസ്സ് ആ പുഞ്ചിരിയിൽ നിന്നും വായിച്ചെടുക്കാനാകും.

അച്ഛൻ അമ്മ അനുജത്തിയും അടങ്ങുന്നൊരു കൊച്ചു സന്തുഷ്ട കുടുംബമാണ് അനന്തുവിന്റേത്.  ഹൈ റേഞ്ചിലെ മനോഹരമായ ഒരു  സ്ഥലത്ത്, നല്ല ഭംഗിയുള്ള കോട്ടജ് പോലെ ഉള്ള ഒരു രണ്ടു നില വീട്,  ഗേറ്റിൽ നിന്നും വീതിയുള്ള ഒരു വഴി വീടിന്റെ പോർച്ചിലേക്കു നീളുന്നു.

അതിന്റെ രണ്ടു സൈഡിലും അതി സുന്ദരമായ വർണ പുഷ്പങ്ങൾ പൂവിട്ടു നിൽക്കുന്നു, അതുപോലെ ഓറഞ്ചും, സപ്പോട്ടയും, സബർജില്ലിയും മറ്റും കായ്ച്ചു നിൽക്കുന്നുണ്ട്.