ആമുഖം,

കഥ മുന്‍വിധികള്‍  ഇല്ലാതെ വായീക്കുക… കഥ പറയാന്‍ ഉള്ള സൌകര്യത്തിന് പലരുടേയും പോയിന്‍റ് ഓഫ് വ്യൂ മാറി മാറി വന്നിട്ടുണ്ട് … അത് കൊണ്ട് അല്പം ശ്രദ്ധ കൊടുത്ത് വായിക്കണം… തെറ്റുകളോ കുറവുകളോ ഉണ്ടെങ്കില്‍ ക്ഷമിക്കണം ….

****************

ലവ് ആക്ഷന്‍ ഡ്രാമ-11

Love Action Drama-11 | Author : Jeevan | Previous Parts

അനുവിന്റെ പോയിന്റ് ഓഫ് വ്യൂ തുടരുന്നു-

“കൊള്ളാം മോളെ… നല്ല ഐഡിയ… പക്ഷെ ചെറിയ ഒരു കുഴപ്പമുണ്ട്…”

വരുൺ പറഞ്ഞത് കേട്ട് എന്താ എന്ന അർത്ഥത്തിൽ ശ്രദ്ധയോടെ ഞാൻ അവനെ നോക്കി…

“എനിക്ക് തലക്ക് ഓളമില്ല… ഒരു പക്ഷെ ഇത്‌ നിന്റെ തന്തയോടു പറഞ്ഞാൽ അങ്ങേര് സമ്മതിക്കുമാരിക്കും…”

ഞാൻ മൊത്തത്തിൽ ഒന്ന് ചൂളി… എല്ലാം എന്റെ കുഴപ്പം കൊണ്ട് തന്നെയാണ്… എനിക്ക് വേണ്ടി അവന് ഒന്നും ചെയ്യണ്ട കാര്യമില്ല… ആത്മാഭിമാനമുള്ള ആരായാലും ഇതേ മറുപടിയെ എനിക്ക് ലഭിക്കു…

“നിന്റെ വീട്ടുകാരുടെ മുന്നിൽ നിന്നെ പുണ്യവതി ആക്കിയാൽ എനിക്ക് വേറെ പെണ്ണിനെ ഒപ്പിച് തരുമെന്ന് അല്ലേ… അതിരിക്കട്ടെ എന്ന് തുടങ്ങി മോൾ ഈ മാമാ പണിയൊക്കെ…”

“എവിടുന്നു കിട്ടുന്നു നിനക്ക് ഈ ഐഡിയയൊക്കെ… ഇത്രയും തഴം താഴ്ന്ന് ചിന്തിക്കാൻ തുടങ്ങിയോ അനു നീ…”

“ഇതിന്റെ പകുതി ബുദ്ധി നീ വേണ്ട സമയത്ത് വേണ്ട പോലെ പ്രയോഗിച്ചിരുന്നു എങ്കിൽ ഇന്ന് നീ എന്റെ പിടലിക്ക് ഇരിക്കില്ലായിരുന്നു…”

“വരുൺ… അത് പിന്നെ… അങ്ങനെയല്ല… ഞാൻ കാരണം വരുണിന്റ ജീവിതം കൂടെ ഇല്ലാതെ ആകുമോ എന്ന് പേടിച്ച്… ”

“ആഹാ… എന്താ കെയർ… അതിരിക്കട്ടെ… ഇങ്ങനെ ഒക്കെ തട്ടി വിടാൻ കാര്യങ്ങൾ എല്ലാം മനസ്സിലാക്കി എന്നെ അക്‌സെപ്റ്റ് ചെയ്യാൻ നിനക്ക് പരിചയമുള്ള പെണ്ണുങ്ങൾ ആരേലുമുണ്ടോ…”

“ഇല്ല…”

“നിന്റെ പറച്ചിൽ കേട്ടാൽ ഒരു പത്തെണ്ണം എങ്കിലും സ്റ്റോക്ക് ഉണ്ടെന്ന് തോന്നുമല്ലോ… നിന്നെ തന്നെ കെട്ടിയ കേട് തീർന്നിട്ടില്ല…അപ്പോ പിന്നെ നീ കണ്ട് പിടിച്ചോണ്ട് വരുന്നതിനെ കൂടി ഇനി തലയിൽ എടുത്ത് വെക്കാത്തതിന്റെ കുഴപ്പം കൂടിയേ എനിക്കുള്ളു… ഒന്ന് പോയേടി…”

എനിക്ക് വേറെ നിവർത്തിയില്ല… അവന്റെ കാല് പിടിച്ചു ആയാലും സമ്മതിപ്പിച്ചേ പറ്റു… ഇല്ലെങ്കിൽ ഒരു പക്ഷെ സത്യം എല്ലാവരും അറിഞ്ഞാൽ ഞാൻ ഒറ്റപ്പെട്ടു പോകും… ഒരു പക്ഷെ എന്റെ അച്ഛനെ തന്നെ എനിക്ക് നഷ്ടം ആകും…

“വരുൺ… പ്ലീസ്‌… പ്ലീസ് ഹെല്പ് മി… എനിക്ക് വേറെ അഫ്ഫയർ ഉള്ളത് കൊണ്ടാണ് നമ്മൾ പിരിയുന്നത് എന്നറിഞ്ഞാൽ ഒരു പക്ഷെ എന്റെ അച്ഛൻ…” ഞാൻ കരച്ചിലിന്റെ വാക്കോളമെത്തി, വിതുമ്പി തുടങ്ങി…

“പൂങ്കണ്ണീർ ഒഴുക്കി ടൈം കളയണ്ട… പറ്റില്ല എന്ന് പറഞ്ഞാൽ പറ്റില്ല… സത്യം എല്ലാവരും അറിയട്ടെ അനു… കുറച്ച് നാൾ എതിർപ്പൊക്കെ ഉണ്ടാകും… നിനക്ക് ഇഷ്ടപെട്ട ആളിന്റെ കൂടെ ജീവിക്കാനുള്ള പ്രാപ്തിയുണ്ട്… കുറച്ച് നാൾ കഴിഞ്ഞ് എല്ലാവരും എല്ലാം മറക്കും… എല്ലാവരും നിന്നെയും അവനെയും ആക്സപ്റ്റ് ചെയ്യും… നിങ്ങൾക്ക് സുഖമായി ജീവിക്കാം… പക്ഷെ അപ്പോളും എന്റെ കാര്യം ആലോചിച്ചെ… ”

ഞാൻ ഒന്നും മിണ്ടിയില്ല… കണ്ണുനീർ ഇടതടവില്ലാതെ ഒഴുകിത്തുടങ്ങി…

“വരുൺ… അങ്ങനെ ആണെങ്കിൽ ആരും ഒന്നും അറിയണ്ട… ഞാൻ വരുണിന്റെ ഒപ്പം ജീവിച്ച് കൊള്ളാം…”

“അയ്യടി മോളെ… എന്നിട്ട് വേണം നാളെ മുതൽ നീ ഓരോന്ന് ഓർത്ത് പ്രതിക്കാരം ചെയ്ത് എന്നെ പെട്ടിയിലാക്കാൻ… വേല മനസ്സിൽ ഇരിക്കട്ടെ… മാത്രമല്ല ഇനി എന്ത്‌ തന്നെ ആയാലും നിന്നെ എനിക്ക് വേണ്ട… അത്രക്ക് നിന്നെ ഞാൻ സ്നേഹിച്ചിട്ടുണ്ട്… വിവാഹത്തിന് മുൻപ് എന്ത്‌ തന്നെ ആയാലും കുഴപ്പമില്ലായിരുന്നു… ഞാന്‍ സഹിച്ചേനേ, പൊറുത്തേനേ…പക്ഷെ വിവാഹ ശേഷം ഒരാളിന്റെ താലി കഴുത്തിലിട്ട് മറ്റൊരാളെ മനസ്സിൽ കൊണ്ട് നടക്കുന്നവളെ എനിക്ക് വേണ്ട…”