കുഞ്ഞുറുമ്പുകളുടെ ലോകം 2 [Fire blade] 105

എന്നെ ശ്വാസം മുട്ടിച്ചപോലെ തോന്നി…

അനുഭവക്കുറവ് കൊണ്ടാകാനാണ് സാധ്യത… എന്നും കിട്ടിയിരുന്നത് പുച്ഛമായിരുന്നല്ലോ…!!

” നിങ്ങക്കുള്ള താമസം ഇവന്റെ അമ്മായിഅപ്പന്റെ സ്ഥലത്താണ് ചേട്ടാ …

അവിടെ പടത്തിന്റെ അരികിനോട് ഇവൻ ഒരു സെറ്റ് അപ്പ് ഉണ്ടാക്കിയിട്ടുണ്ട്….”

ശബരി എന്റെ ബാഗൊക്കെ തൂക്കി അവന്റെ ജീപ്പിൽ വെക്കുമ്പോൾ എന്നോട് പറഞ്ഞു…

മനു അത് കേട്ട് ചിരിച്ചുകൊണ്ട് അതേ എന്ന അർത്ഥത്തിൽ കണ്ണിറുക്കി കാണിച്ചു…..

” അയ്യോ…. അതൊന്നും വേണ്ട…..ഞാൻ വല്ല ലോഡ്ജിലും നിന്നോളാം… ”

ഞാൻ ജീപ്പിൽ നിന്ന് ഇറങ്ങി ഓടണോ വേണ്ടേ എന്ന സംശയത്തിലായി…

” അടങ്ങിയിരിക്ക് മനുഷ്യാ…. അത് വരെ വന്നു അതൊന്നു കാണ്…. എന്നിട്ട് തീരുമാനിക്കാം ബാക്കി… ”

ശബരി ജീപ്പ് സ്റ്റാർട്ട്‌ ചെയ്ത് മുന്നോട്ടെടുത്തു….

ശെരിക്കും അവരുടെ നാടൊരു സ്വർഗം തന്നെ ആയിരുന്നു…. പാടങ്ങളും കൃഷിസ്ഥലങ്ങളും പറമ്പുകളും ചുറ്റിനും ഉള്ള അന്തരീക്ഷം…..

അവിടുത്തെ റോഡ് മാത്രമേ പുതിയ രീതിയിൽ തോന്നിയുള്ളൂ

ബാക്കി കടകളും, വീടുകൾക്കും, ചായക്കടകളും, അമ്പലപ്പറമ്പും, കളിസ്ഥലവും എല്ലാം പഴമ തിങ്ങി നിറഞ്ഞതായിരുന്നു….

വല്ലാത്ത കൗതുകത്തോടെ ഓരോന്നിനും ഞാൻ ഒരുപാട് ശ്രദ്ധ കൊടുത്തു…

എന്റെ നാടും ഗ്രാമം തന്നെയാണ്, പക്ഷെ എന്തൊക്കെയോ സൗകര്യങ്ങൾ അതിന്റെ തന്നതായ ഗ്രാമീണതയിൽ മാറ്റങ്ങൾ വരുത്തിയിട്ടുണ്ട്….

മാളുകളും ഷോപ്പിംഗ് കോംപ്ലക്സുകളും, വലിയ തുണിക്കടകളും, മൾട്ടിപ്ലക്സ് തീയേറ്ററുകളും നിറഞ്ഞ ഗ്രാമവും ഇവിടവും തമ്മിൽ കളർ സിനിമയും ബ്ലാക്ക് ആൻഡ് വൈറ്റ് സിനിമയും തമ്മിലുള്ള മാറ്റം പോലെ…

എനിക്ക് കൂടുതൽ ഇണങ്ങുന്നത് ഇവിടെയാകുമെന്ന് ഉള്ളിൽ നിന്നാരോ പറഞ്ഞു…