കള്ളൻ 65

“പൂക്കൾ പറിക്കരുത് “.
എന്നല്ലേ എഴുതിയത് “പൂ പറിക്കരുത്” എന്നല്ലല്ലോ അപ്പോൾ പിന്നെ ഞാൻ എങ്ങിനെ തെറ്റുകാരനാവും എന്ന ആശയകുഴപ്പത്തിൽ വെള്ളപൂശിയ ചുമരിൽ ചാരിയങ്ങനെ നിൽക്കുബോൾ

“ടാ ചെണ്ടുമല്ലികള്ളാ” എന്നു വിളിച്ചു കൊണ്ട് എനിക്ക് മുന്നിലൂടെ മുട്ടോളം ഇറക്കമുള്ള പാവാടയും ഇട്ട് ഒരു ചുരുണ്ടമുടിക്കാരി ഓടിയകന്നു..
ജീവിതത്തിൽ ആദ്യമായി ഞാനന്നൊരു കള്ളനായി…..

കള്ളനെന്ന പട്ടവുമായി സ്കൂളിലെ ഓരോ ദിനങ്ങളും തള്ളി നീക്കവെ

ഇടവപ്പാതിയിൽ തിമർത്തു പെയ്യുന്ന മഴക്കിടയിൽ കുത്തിയൊലിച്ചു ഒഴുകുന്ന മഴവെള്ളപാച്ചിലിൽ കോലായിലിരുന്നു പഞ്ചാര പൊതിഞ്ഞു കൊണ്ടുവന്ന കടലാസുകൊണ്ട് കളിത്തോണിയുണ്ടാക്കി കളിക്കുമ്പോഴാണ് രാഘവേട്ടന്റെ തൊടിയിലൊരു തേങ്ങ വീണത്…

ഒരു മുറിതേങ്ങ അവിലുംപഞ്ചാരയും കൂട്ടി കൊഴക്കാനും, രണ്ടാമത്തെ മുറിതേങ്ങ അമ്മിയിലിട്ട് നീട്ടിയരച്ചു ചമ്മന്തി അരച്ച് നല്ല ചൂടുള്ള കഞ്ഞികുടിക്കുന്നതും ഓർത്ത് മഴവെള്ളത്തേക്കാൾ നാവിലൂറിയ വെള്ളമിറക്കി വേലിക്കിടയിലൂടെ തുളവീണ കറുത്ത ശീലക്കുടയുമായി കൈയ്യിട്ട് ഉണക്കതേങ്ങ എടുക്കുബോൾ

ചതുര കള്ളികളുള്ള മുണ്ടുമുടുത്ത് പഴകിയ കൈബനിയനുമിട്ട് ഇറയത്തു തൂങ്ങി പിടിച്ച് ബീഡിക്കറ വീണ് നിറം മങ്ങിയ പല്ലിളിച്ചു നീട്ടിയൊരു വിളി
“ടാ തേങ്ങാക്കള്ളാന്ന് “…

ആ വിളി കേട്ടപ്പോൾ എടുത്ത തേങ്ങകൊണ്ട് മോന്തക്കിട്ടൊരു ഏറ് കൊടുക്കാനാ തോന്നിയതെങ്കിലും
പകരം അസ്സല് തെറിയങ്ങ് കാച്ചി മനസ്സിൽ…

പിന്നെ കരുതി അയാളെ എന്തിന് തെറി പറയണം

“തീറ്റെം കുടീം ഇവിടെന്ന് കൂറ് മൊത്തം അപ്പുറത്തെ വീട്ടാരുടെടുത്താ…”

അതോണ്ടാണല്ലോ തെങ്ങിന്റെ മണ്ട അയാൾടെ തൊടീലിക്ക് നീണ്ടു പോയതെന്നോർത്തപ്പോൾ തെങ്ങിനും കിട്ടി ഫ്രീ ആയിട്ടൊരു അഞ്ചാറ് തെറി.

അല്ലെങ്കിലും അയാൾ എന്തിന് എന്നെ കള്ളനെന്നു വിളിക്കണം…?

എന്റെ വീട്ടിലുണ്ടായ തെങ്ങിന്ന് വീണ തേങ്ങ അയാളുടെ പറമ്പിൽ നിന്നുമെടുത്തതൊ…?

“ദാണ്ടെടി ഇവനാണ് നിന്റെ മുട്ട മുഴോനും ദെവസോം എടുത്തോണ്ട് പോവുന്നത്…
ഞാനെന്റെ രണ്ട് കണ്ണുകൊണ്ടും കണ്ടതാ…