ഹൃദയത്തിൽ സൂക്ഷിക്കാൻ 3 [വിഷ്ണു?] 304

“അത് പൊട്ടെടാ..ഞാൻ വെറുതെ പറഞ്ഞതല്ലേ…
ഇവിടെ ഇപ്പൊ വരാൻ ആകെ കൂടി നിങ്ങളൊക്കെ അല്ലേ ഉള്ളൂ..അപ്പോ നിന്നെയും കൂടി കാണാതെ ആവുമ്പോ..”

പറഞ്ഞ് തീരുമ്പോഴേക്കും ഒരു തുള്ളി കണ്ണുനീര് ആ കണ്ണിൽ നിന്നും വീണിരുന്നു..

” തള്ളേ..നിങ്ങടെ കെട്ടിയോൻ എന്തിയെ..?വല്ല ചിരവയ്ക്കും അങ്ങേരെ തീർത്തോ..?”

രാവിലെ തന്നെ അതിനെ കരയിപ്പികേണ്ട എന്ന് ഓർത്ത് ഞാൻ ഒരു നമ്പർ ഇട്ടു..വർഗ്ഗീസ്ഏട്ടൻ ചെട്ടത്തിയും ആയി വല്യ സ്നേഹത്തിൽ ആണ്.എങ്കിലും ഇടയ്ക്ക് ചില തട്ടലും മുട്ടലും ഒക്കെ ഉണ്ടാവാറുണ്ട്.പക്ഷേ ഇടഞ്ഞാൽ ചെട്ടത്തിയാണ് മിക്കവാറും ജയിക്കാറ്.അങ്ങനെ എന്തേലും ഓക്കേ വഴക്ക് നടന്നാൽ.. അതിൻ്റെ ഒരു സ്മാരകം പിറ്റേന്ന് അങ്ങേരുടെ മുഖത്ത് കാണാം..

“ഒന്ന് പോടാ ചെക്കാ..ഞാൻ അങ്ങേരെ എന്തോ ചെയ്യാൻ ആണ്..ഇതുവരെ എനീട്ടില്ല…”

അതും പറഞ്ഞു നേരത്തെ നിറഞ്ഞ കണ്ണ് തുടയ്ക്കുമ്പോ ചെട്ടത്തിക്ക് ഒരു ചിരി വന്നിരുന്നു..എൻ്റെ ഉദ്ദേശവും അത് തന്നെ ആയിരുന്നു…

“ഞാൻ ഒന്ന് പോയി കണ്ടിട്ട് വരാം..അന്നമ്മ ഞങ്ങൾക്ക് ഓരോ ചായ അങ്ങ് എടുത്തോ..”

അതും പറഞ്ഞ് ഞാൻ വണ്ടി അകത്തേക്ക് കയറ്റി ഒതുക്കി..

“അതൊക്കെ എടുക്കാം.. ആദ്യം അങ്ങേരെ പോയി വിളിക്കാൻ നോക്ക്…”

അകത്തേക്ക് നടക്കുന്ന വഴി അന്നമ്മ വിളിച്ച് പറയുന്നത് ഞാൻ കേട്ടു..

ഞാൻ പതിയെ അകത്തേക്ക് നടന്നു..
ചേട്ടനും, ചേട്ടത്തിയും മാത്രേ ഇപ്പൊ വീട്ടിൽ ഉള്ളൂ..ഇവർക്ക് രണ്ട് മക്കൾ ആണ്. ഒരാണും ഒരു പെണ്ണും. മൂത്തവൾ വർഷ ഇപ്പൊ കല്യാണം കഴിഞ്ഞ് അമേരിക്കയിൽ ആണ്.അവൾ ഇങ്ങോട്ട് വന്നിട്ട് തന്നെ വർഷങ്ങൾ ആയി.അവൾക്ക് കെട്ടിയോനും പിള്ളേരും മതി എന്ന ഒരു ലൈൻ ആണ്..വേറെ ഒരുത്തൻ ഉള്ളതും ഇല്ലാത്തതും എല്ലാം കണക്കാണ്… ഏത് നേരവും അവൻ വെള്ളം ആയിരിക്കും..അവനെ ആണെങ്കിൽ ഇപ്പൊ ചേട്ടത്തി ഇങ്ങോട്ട് കേറ്റില്ല.ഇങ്ങോട്ട് അവൻ വരുന്നത് പോലും അവൻ്റെ ഷെയറും ചോദിച്ചാണ്.അത് മെടിച്ചിട്ട് വേണം അതും വിറ്റ് അവന് കുടിക്കാൻ..

ഞാൻ വീട്ടിലേക്ക് കയറി..ഇന്നലെ രാത്രി എന്നെ വിളിച്ച കൂട്ടത്തിൽ വേറെ എന്തോ പറയാൻ ഉണ്ടെന്നും.. നാളെ ഇങ്ങോട്ട് ഇറങ്ങാനും പറഞ്ഞിരുന്നു..അതാണ് രാവിലെ തന്നെ ഞാൻ ഇങ്ങ് പോന്നത്.

“എടോ നിങ്ങൾക്ക് ഇതുവരെ നേരം വെളുത്തില്ലെ മനുഷ്യാ…”

അകത്തേക്ക് കയറിയപ്പൾ ഒരു കൈലി മുണ്ട് എടുത്ത് കൊല പഴുപ്പിക്കാൻ മൂടി കെട്ടി വച്ചത് പോലെ കട്ടിലിൽ കിടപ്പുണ്ട് ആള്..അല്പം ഉറക്കെയുള്ള എൻ്റെ ശബ്ദം കേട്ട് ഞെട്ടി പിടഞ്ഞു എനീകുന്നത് കണ്ടൂ..

“ഹൊ.. എടാ വിച്ചുവെ നീയയിരുന്നോ..??എന്തൊന്നടാ തെണ്ടി ഇങ്ങനെ ആണോ ഒരു മനുഷ്യനെ വിളിക്കുന്നത്… ഇന്നലെ പതിനൊന്ന് മണിക്കാണ് വന്നു കിടന്നത്…”

പാവം ഉറക്കം കളഞ്ഞതിൻ്റെ കലിപ്പ് ഉണ്ട്..ഞാൻ ആയത്കൊണ്ട് കുഴപ്പമില്ല.എങ്കിലും പറയുന്നത് കെട്ട് എനിക്ക് ചിരി വന്നു.

“അതേ.. ഇന്നലെ പൂസ് ആയിട്ടാണോ എന്നോട് രാവിലെ തന്നെ വരാൻ പറഞ്ഞത്…എന്തോ ആഭ്യന്തര കാര്യം ചർച്ച ചെയ്യാൻ ഉണ്ടെന്നൊക്കെ പറഞ്ഞല്ലോ..?”

ഞാൻ ഒരു ചിരിയോടെ ചോദിച്ചു..അത് കേട്ടതും ആള് കട്ടിലിൽ നിന്ന് എണീറ്റു.എന്നിട്ട് പുതച്ചിരുന്ന ആ മുണ്ട് തന്നെ ഒന്നൂടെ ശെരിക്കും ഉടുത്തു.നേരെ പോയി മുഖവും,വായും കഴുകി വന്നു.മുഖം കണ്ടപ്പോ തന്നെ എനിക്ക് കാര്യം സീരിയസ് ആണെന്ന് മനസ്സിലായി..

“വിച്ചുവേ..നീ പ്ലസ് ടു വരെ അല്ലേ പഠിക്കാൻ പോയിട്ടുള്ളൂ…”