” അപ്പൊ ഓൾ ദി ബെസ്റ്റ് ! എല്ലാം കഴിയുമ്പോൾ നീ വിളിച്ചാ മതി. ഞാൻ വന്നു പിക്ക് ചെയ്യാം. പിന്നെ ഒരു കാര്യം കൂടെ. ഓവറാക്കി ചളമാക്കരുത്. എന്റെ അപേക്ഷയാണ്. “, കാർ റോഡിന്റെ ഓരം ചേർത്ത് നിർത്തുമ്പോൾ ജിതിൻ അല്പം തമാശയായിട്ട് പറഞ്ഞു.

” എന്ത് ഓവറാക്കാൻ? ”

” അല്ല. നീയൊരുമാതിരി മറ്റേടത്തെ ഫിലോസഫിയൊക്കെയടിച്ചു ആ പെണ്ണിനെ ഓടിക്കരുതെന്ന്. കണ്ടിട്ട് അതൊരു നല്ല കുട്ടിയാണെന്ന് തോന്നുന്നു. അവിടെ അച്ഛനുമമ്മക്കുമൊക്കെ ഇഷ്ടപ്പെട്ടതാ. പിന്നെ നിന്റെ ജോലികണ്ടു വീണതാണെന്നും എനിക്ക് തോന്നുന്നില്ല. അവളും നല്ല ജോലിയും വിദ്യാഭാസവുമുള്ള ആളാണല്ലോ. ”

” ഹാ.. സംസാരിച്ചു നോക്കട്ടെ. ഇഷ്ടമായാൽ നമുക്ക് നോക്കാം “, വാച്ചിൽ നോക്കികൊണ്ട് ഞാൻ പുറത്തേക്കിറങ്ങി.

‘ ബാരിസ്റ്റ ‘- എം ജി റോഡിലെ അത്യാവശ്യം നല്ലൊരു കോഫീഷോപ്പാണ്. വാതിൽ തുറന്നു തന്ന സ്റ്റാഫിനെ നോക്കി ഹൃദ്യമായി ചിരിച്ചുകൊണ്ട് എസിയുടെ ശീതളതയിലേക്ക്‌ കയറി, റോഡിനു അഭിമുഖമായുള്ള രണ്ടുപേർക്കിരിക്കാവുന്ന സീറ്റിൽ ചെന്നിരുന്നു.

‘ Reached ? I’ll be there in 10 minutes. Got stuck in traffic 🙁 ‘, ഫോണിൽ അവളുടെ മെസേജ് വന്നു.

‘ Yes.. No issue, take your time ‘ , തിരിച്ചു മെസേജ് അയച്ചുകൊണ്ടു പുറത്തെ തിരക്കിലൂടെ അരിച്ചരിച്ചു നീങ്ങിക്കൊണ്ടിരിക്കുന്ന വാഹനങ്ങളെ നോക്കിയിരുന്നു.

” സർ.. യുവർ ഓർഡർ പ്ലീസ് “, യൂണിഫോമിട്ടു തലയിൽ ക്യാപ് വെച്ചൊരു പെൺകുട്ടി അടുത്തേക്ക് വന്നു.

” ആം സോറി. മെനു കാർഡ് ഉണ്ടായിരുന്നല്ലേ. ഒരു പത്തുമിനിറ്റ്, ആം വെയിറ്റിങ് ഫോർ സംവൺ. വന്നിട്ട് ഓർഡർ തരാം “, മേശയുടെ ഒരു സൈഡിലായി വെച്ചിരിക്കുന്ന മെനുകാർഡ് കയ്യിലെടുത്തുകൊണ്ടു പറഞ്ഞു.

” ഇറ്റ്സ് ഓക്കേ സർ. ഇത് വെനസ്ഡേ ഹാപ്പി ഹവേഴ്സ് ആണ്. കോംബോസ് അവൈലബിളാണ് “, ഒരു ചെറുപുഞ്ചിരിയോടെ ഓർമിപ്പിച്ചുകൊണ്ട് അവൾ നടന്നകന്നു.

വെറുതെ മെനുവിലൂടെ കണ്ണോടിച്ചു നോക്കി. ഒരുപാട് തരത്തിലുള്ള കോഫീ വെറൈറ്റികൾ, സ്‌നാക്‌സ്. മറ്റൊരു പേജിൽ കോംബോ ഓഫറിന്റെ വിവരങ്ങൾ.

” എക്സ്ക്യൂസ്‌ മി “, മൃദുവായ സ്ത്രീശബ്ദം കേട്ട് മുഖമുയർത്തിനോക്കി.

അമൃത- രണ്ടു ദിവസം മുമ്പ് ഞാൻ പെണ്ണുകാണാൻ പോയ കുട്ടി.

” ഹായ് “, സൗഹൃദഭാവത്തിൽ ചിരിച്ചുകൊണ്ട് എണീറ്റ് ഷേക്ക് ഹാൻഡിനു വേണ്ടി കൈനീട്ടി.

” ഹായ്. ഇത്തിരി ലേറ്റായിപ്പോയി. പതിവില്ലാത്ത ട്രാഫിക്കുണ്ടായിരുന്നു ഇന്ന് “, ക്ഷമാപണത്തോടെ മുന്നിലെ സീറ്റിലേക്ക് അവളിരുന്നു.

” ആ.. ഇന്നിവിടെ എഞ്ചിനീയറിംഗ് കോളേജിന്റെ പ്ലാറ്റിനം ജൂബിലിയാണ്. ചീഫ് ഗസ്റ്റ് പ്രസിഡന്റാണ്. അതിന്റെയാ ”

” ഓ.. അത് ശരി “, ഒന്ന് തലയാട്ടിക്കൊണ്ടു അവൾ വേറെന്തോ ഓർത്തെടുത്തുകൊണ്ടു ചോദിച്ചു.

” അല്ല, അവിടെയല്ലേ പഠിച്ചത്? ”

” അതെ ”