ഭദ്ര [Enemy Hunter] 2145

“അതൊക്കെ വെല്ല്യ വെല്ല്യ… എഴുത്തുകാർക്ക് പറഞ്ഞിട്ടുള്ള പ്രശ്നങ്ങളല്ലേ.. എന്നെ അലട്ടുന്നത് മറ്റുപലതുമാണ്”

“എന്ത് “ അവളുടെ മുഖമൊരു ചോദ്യചിഹ്നമായി

“ വീട്ടുകാരുടെ കല്യാണലോചന …കുറഞ്ഞുവരുന്ന സേവിങ്സ്…എല്ലാത്തിലിമുപരി ഈ എഴുതൊക്കെ എനിക്ക് പറഞ്ഞിട്ടുള്ള പരുപാടി ആണോന്ന് ഒരു സംശയം. ഒരുമാസമായി ഒരു വാക്കുപോലും എഴുതാൻ പറ്റീട്ടില്ല “

“ഒരുപക്ഷെ നീ മുൻപ് പറയാറുള്ള പോലെ കഥകൾ നിന്നെ തേടി വരുകയല്ലേ പതിവ്. അടുത്ത കഥയ്ക്കുള്ള സമയമായിട്ടുണ്ടാവില്ല… നീ ഡെസ്പ്പാവല്ലേ “അവളെന്നെ ആശ്വസിപ്പിക്കാൻ ശ്രമിച്ചു.

“അത് പോട്ടെ എന്താണ് ഭവതിയുടെ അഗമനോദ്ദേശം? “

“അത് പിന്നെ എറണാകുളം വരയൊന്ന് വരേണ്ട ആവശ്യമുണ്ടായിരുന്നു… അപ്പൊ നിന്നെയൊന്ന് കാണാന്നു വെച്ചു
“

“മാഡം… എറണാകുളത്തിന്നു ഇങ്ങോട്ട് നൂറ്റാമ്പത് കിലോമീറ്ററുണ്ട് “

“അത്… പിന്നെ നിന്നെയൊന്ന് കാണാൻ തോന്നി വന്നു “ അവൾ കൊഞ്ചി

“എന്തായിരുന്നു എറണാകുളത്ത് പരുപാടി “

“ഒരു ടാറ്റൂ ചെയ്യാൻ പോയതാ “അവൾ ചിരിച്ചുകൊണ്ട് പറഞ്ഞു

“ഈ ശരീരത്തിൽ ഇനി ടാറ്റൂ ചെയ്യാൻ വല്ലിടവും ബാക്കിയുണ്ടോ?. കഴുത്തിൽ കാലിൽ കയ്യിൽ എല്ലായിടത്തും ആയില്ലെ” ചെറിയൊരു പരിഹാസത്തോടെ ഞാൻ ചോദിച്ചു

“നീ കാണാത്ത ഇടങ്ങളും എന്റെ ശരീരത്തിലുണ്ടെടാ “ഞാൻ മനപ്പൂർവ്വം അവളുടെ കള്ളചിരിയിൽ നിന്ന് വിട്ടോഴിഞ്ഞു.

“നീ വന്നതിന്റെ കാര്യം പറ “ ഞാൻ വിഷയം മാറ്റി

“നിന്നോട് ഒരു കഥപറയണം എന്നുതോന്നി “

“ആഹാ നിങ്ങൾ കോർപറേറ്റേകൾക്കും സാഹിത്യമൊക്കെ വശമുണ്ടോ”

“അങ്ങനെ അങ്ങ് പുച്ഛിക്കെല്ലേടാ.. ഒന്നില്ലേലും കുറെ നാള് അരിവാങ്ങീതല്ലെ “

“അത് കള നീ കാര്യം പറ “

“രണ്ടുമാസം മുന്നേ ഞാൻ സൈമണിന്റെ കൂടെ ഒരു റോഡ് ട്രിപ്പ് പോയില്ലെ”അവൾ സിഗറേറ്റ് കുതികെടുത്തിക്കൊണ്ട് എന്നോട് ചോദിച്ചു.

“ഉവ്വ….. ചെന്നൈ ടു കൊൽക്കട്ട”

“ആഹാ.. നിനക്ക് ഓർമ്മയുണ്ടല്ലേ…അന്ന് ബുവനേശ്വർ കൊൽക്കട്ട ഹൈവേയിൽ ഞങ്ങൾ ഒരു രാത്രി സ്പെൻഡ്‌ ചെയ്തു.വിജനമായ ആ വഴിയിൽ.ചുണ്ടുകളിൽ മുറുക്കാൻ കറയും…വായിൽ നുരയ്ക്കുന്ന ബാങ്ങുമായി . വഴിയരികിലെ കത്തുന്ന വിറകിൽ നിന്ന് തീക്കാഞ്ഞുകൊണ്ട് ഒരു കിളവി ഞങ്ങളോട് പറഞ്ഞ കഥയാണ് എന്നെ ഈ അതിരാവിലെ നിന്റെയടുത്ത് എത്തിച്ചത് “