അറിയാതെ പറയാതെ 2 [ജെയ്സൻ] 159

“വേണ്ട അപ്പാ, വീട്ടിൽ ചെന്നിട്ടു എന്തെങ്കിലും മതി. ഞാനെടുക്കാം ബൈക്ക്”
“ഉം” മൂളികൊണ്ടു അപ്പൻ ബൈക്ക് സ്റ്റാൻഡിൽ വെച്ചിറങ്ങി.

അങ്ങനെ അവിടെ നിന്നും ഞാൻ ബൈക്കു എടുത്തു കുറെനാളായി വണ്ടി ഓടിച്ചിച്ചിട്ടു അതിന്റെ ഒരു ബാലൻസ് ഇഷ്യൂ ഉണ്ട്. പിന്നെ പലരും പറയുന്നത്‌ പോലെ ഗൾഫിൽ നിന്നും വരുമ്പോൾ ഉണ്ടാവുന്ന ലെഫ്റ്റും റൈറ്റും എന്ന ഒരു ചെറിയ കൺഫ്യൂഷനും. 5 മിനിറ്റ് കൊണ്ട് അതൊക്കെ മാറി.

ഇനി ഒരു 6,7 km ഉണ്ട് വീട്ടിലേക്കു …

****************
എന്റെ നാട്, അതിനെപ്പറ്റി ഞാൻ പറഞ്ഞില്ലല്ലോ??
തിരുവല്ലയിൽ നിന്നും മാവേലിക്കരയ്ക്ക് പോകുമ്പോൾ, മൂന്നു ഭാഗവും പാമ്പയാറിനാൽ ചുറ്റപ്പെട്ട, ഹിന്ദു ക്രിസ്ത്യൻ സമൂഹങ്ങളാൽ നിറഞ്ഞ ഒരു ശാന്ത സുന്ദര ഗ്രാമപ്രദേശം, എവിടെ നോക്കിയാലും പച്ചപ്പ് മാത്രം, വല്ലപ്പോഴും വാഹനങ്ങൾ കടന്നുപോകുന്ന വീഥികൾ …. ശുദ്ധമായ വെള്ളം, ശുദ്ധമായ വായു എന്നിവയാൽ സമൃദ്ധം…

ഒരു കാലത്ത് ഞങ്ങളുടെ നാട്ടിൽ അഭിമാനമായി ഒരു പഞ്ചസാരമില്ലുണ്ടായിരുന്നു, അതിനാൽ ഒരുപാടു കരിമ്പിൻ പാടങ്ങളുണ്ടായിരുന്നു നാട്ടിൽ അതുപോലെ തോടുകളും, കാരണം അന്ന് ജലമാർഗമായിരുന്നുവല്ലോ? കമ്പനിയിലേക്കു ഗതാഗതത്തിനു പമ്പയാറിൽ നിന്നും വലിയ കൈവഴി വെട്ടിയിരുന്നു മണിമലയാറിലേക്കു അത് തുടങ്ങുന്ന സ്ഥലത്തിന് ഇന്നും പേര് കുത്തിയതോട്. ഇത് കൂടാതെ പുത്തനാറു എന്നൊരു കൈവഴി കൂടി വെട്ടിയിരുന്നു പമ്പയിൽ നിന്നും മണിമലയിലേക്കു എന്നാൽ അത് പൂർത്തീകരിക്കപ്പെട്ടില്ല, ഇതൊക്കെ പഞ്ചസാരമില്ലിന്റെ പ്രതാപകാലത്തായിരുന്നു, ഇന്നും ആ കമ്പനി പഴയപോലെ ഉണ്ടായിരുന്നു എങ്കിൽ എന്നെപോലെ ഉള്ള എത്രപേരുടെ കുടുംബം രക്ഷപ്പെട്ടേനെ, പറഞ്ഞിട്ട് കാര്യമില്ലല്ലോ?… ഇന്നും പഞ്ചസാരമില്ലു അവിടെയുണ്ട് പഴയപേരിൽ തന്നെ, ഇപ്പോൾ പഞ്ചസാരയല്ല പകരം ജവാൻ(മദ്യം) ഉണ്ടാക്കുന്നു, കൂട്ടത്തിൽ ഈ മാസം മുതൽ ബെവ്കോ ഔട്ലെറ്റും അങ്ങോട്ട് മാറ്റി, പഴയ സ്ഥലത്തുള്ള പ്രദേശവാസികളുടെ പരാതി മൂലം.

*****************