അറിയാതെ പറയാതെ 2 [ജെയ്സൻ] 159

രാത്രിയായതിനാൽ റോഡിൽ തിരക്കുകൾ തീരെ കുറവായിരുന്നു, അതുകൊണ്ട് ഒരു 20 മിനിറ്റിനുള്ളിൽ വീടെത്തി. വീടിനു മുൻപിൽ എത്തിയപ്പോ തന്നെ അടുത്ത വീട്ടിൽ ഉള്ളവരുടെ വക എത്തിനോട്ടം, ഈ കാലഘട്ടത്തിൽ അന്യം നിന്നു പൊയ്കൊണ്ടിരിക്കുന്ന, കേരളത്തിൽ മാത്രം കണ്ടുവരുന്ന ഒരു പ്രത്യേക കലാരൂപമാണ് ഈ എത്തിനോട്ടം.

എത്തിനോട്ടക്കാരെ വകവെയ്ക്കാതെ ബാഗും എടുത്തു ഞാനും അപ്പനും അകത്തേക്കു കയറി, ഞങ്ങളുടെ സ്വർഗ്ഗത്തിലേക്ക്, ഇപ്പൊ കരുതും ഏതോ വല്യ വീടാണ് എന്നു. തെറ്റുധാരണ തീരെ വേണ്ട, ഇതു ഒരു കൊച്ചു വീടാണ് ഒരുമുറിയും ഒരു ഹാളും പിന്നെ അടുക്കളയും ബാത്റൂമും പിന്നെ ഒരു കൊച്ചു സിറ്റ് ഔട്ട് ഇതൊക്കയുള്ള  ഒരു കൊച്ചു സ്വർഗ്ഗം. എല്ലാവർക്കും ഇഷ്ടപ്പെടണമെന്നില്ല എന്നിരുന്നാലും എനിക്ക് ഒരുപാട് ഇഷ്ടമുള്ള ഒരു വീട് ആണിത്….

അപ്പോഴേക്കും ഓടിപിടിച്ചു അകത്തു നിന്നും അമ്മ എത്തി. ഇരുകവിളിലും പിടിച്ചുകൊണ്ടു നെറ്റിയിൽ ചുംബിച്ചുകൊണ്ടു

“എന്റെ കുഞ്ഞു അങ്ങു കറുത്തുപോയി”.
“അപ്പാ അമ്മ പറയുന്നത് കേട്ടാൽ തോന്നും, ഞാൻ നേരത്തെ വല്ല സായിപ്പുമായിരുന്നെന്നു, അമ്മേ എനിക്കിത്തിരി വെള്ളം തായോ കുടിക്കാൻ”.

മറുപടി പറയാൻ നില്കാതെ ഓടിപിടിച്ചു പാവം പോയി വെള്ളം കൊണ്ടുവന്നു തന്നു.
സൂസമ്മ എന്നാണ് അമ്മയുടെ പേര്, വയസു 63 ഒരു സാധാരണ കുടുംബിനി.
“ഇന്നാ മോനെ വെള്ളം കുടിച്ചിട്ട് പോയി കുളിക്കു, എന്നിട്ട് നമുക്ക് അത്താഴം കഴിക്കാം”.
“ഉം” വെള്ളം കുടിച്ചോണ്ടു ഒന്നു മൂളി.