അനാർക്കലി 3❤️ [ARITHRA] 214

*******

അവരെ കണ്ടതിനു ശേഷം പെട്ടെന്ന് എന്തോ സന്തോഷം വന്നപ്പോലെ.

ആദി ഓർത്തു.

എന്തോ ഒരു അടുപ്പം ഉള്ളപോലെ, കാണാതെപ്പോയ കളിപ്പാട്ടം കണ്ടുമുട്ടിയ കുട്ടിയുടെ സന്തോഷമായിരുന്നു എനിക്കപ്പോൾ.

എന്താണതിന് കാരണമെന്ന് എത്ര ആലോചിച്ചിട്ടും പിടികിട്ടുന്നില്ല.

ആ എന്തേലും ആകട്ടെ.

അവരുടെ പേര് ചോദിക്കാൻ വല്ലാതെ മനസ്സ് വെമ്പൽ കൊള്ളുന്നു.

“എന്താടാ നിനക്ക് പറ്റിയെ?.”

ഞാൻ സ്വയം ചോദിച്ചു.

“എത്ര കാലായി ഈ ക്ലാസ്സ്‌ എടുപ്പ് തുടങ്ങീട്ട്, ഇതുവരെ ആരേം അങ്ങോട്ട് പേര് ചോദിച്ചു പരിജയപ്പെട്ടിട്ടില്ല, പക്ഷേ ക്ലാസ്സ്‌ തീരാറാവുമ്പോ എല്ലാ പേരും മനപാഠം ആകാറാ പതിവ്.,
പേര് ചോദിക്കാൻ ഇതുവരെ തോന്നീട്ടില്ല എന്നതാ യാഥാർഥ്യം.
പക്ഷേ ഇന്നിതാ അവരോട് സംസാരിക്കാൻ തോന്നുന്നു,
എന്തൊക്കെയോ ഒരു വാത്സല്യം എന്നെ വന്നു മൂടുന്നപ്പോലെ……”

പെട്ടന്ന് തന്നെ മണി മുഴങ്ങി ഇന്നത്തെ റോൾ കഴിഞ്ഞെന്ന മുന്നറിയിപ്പ്.

ഞാൻ പതിയെ വരാന്തയിലേക്ക് ഇറങ്ങാൻ തുടങ്ങി.

ഒരു നിമിഷം എന്തോ തോന്നി ഞാൻ തിരിഞ്ഞു നോക്കി.

ക്ലാസ് അലമ്പ് അവസ്ഥയിൽ തിരിച്ചെത്തിയിരിക്കുന്നു.

സ്വാഭാവികം.

ഞാൻ കുട്ടികൾക്കിടയിലൂടെ എന്റെ കണ്ണ് പായിച്ചു.

അവർ എന്നെ തന്നെ നോക്കിയിരിക്കുന്നുണ്ട്.
നേരത്തെ അതെ ചിരി മുഖത്ത് വച്.

എന്റെ മുഖത്തും ഒരു ചിരിവന്നു.

ഞാൻ പതിയെ നടന്ന് ഓഫീസ് റൂമിലേക്ക് കയറി,

സ്ഥിരം കാണുന്ന ദൃശ്യങ്ങൾ തന്നെ
ഫോണിൽ നോക്കിയിരുന്നു ചിരിക്കുന്ന ലളിത ടീച്ചർ, ബുക്കിലേക്ക് മുഖം പൂഴ്ത്തി ഇരിക്കുന്ന നരേന്ദ്രൻ സാർ,
ആർക്കോ വേണ്ടി എന്നപോലെ എന്തോ എഴുതി കുറിക്കുന്ന മഞ്ജുളൻ സാർ…

“എന്താണ് ആദി സാറേ വല്ലാത്തൊരു നോട്ടം ”

രവീന്ദ്രൻ സാറാണ്.

“വല്ലാതെ ഒന്നും നോക്കിയില്ല സാറേ,, ഞാൻ സാധാരണ നോക്കും പോലെ തന്നെയാ നോക്കിയേ. അത് മാഷ് ലളിത ടീച്ചർ ന്റെ മുഖത്തൂന്ന് ഇപ്പോളല്ലേ കണ്ണെടുത്തെ അതോണ്ട് തോന്നുവാ”

അത് കേട്ടതും ഓഫീസ് റൂമിൽ ആകെ ചിരി പടർന്നു.

രവീന്ദ്രൻ സാർ പിന്നെ ഒന്നും ചോദിക്കാതെ പുസ്തകത്തിലേക്ക് കണ്ണും നട്ടിരിപ്പായി.

………………………….

അനു – നീ എന്തൊക്കെയാണ് നേരത്തെ സാറിനോട്‌ പറഞ്ഞോണ്ടിരുന്നെ?

ആവണി – അതെന്താടി ഇപ്പൊ ഒരു സാർ വിളി, ഇവിടെ ഇപ്പൊ ആരും ഇല്ലല്ലോ.

“സാർ തന്നെ കേൾക്കണം ന്നില്ല വേറെ ആര് കേട്ടാലും നമ്മൾക്ക് തന്നെയാ പണി, ഇനിയെങ്കിലും സംസാരിക്കുമ്പോ നീ ഒന്ന് ലിമിറ് ചെയ്യണം.

ആവണി -പ്രത്യേകിച്ച് ഒന്നും പറഞ്ഞില്ലല്ലോ.

“നിന്റെ നേരത്തെയുള്ള പെർഫോമൻസ് കണ്ടപ്പോ ഞാൻ കരുതി എന്തേലും വായിന്നു വീണുപോകുംന്ന് ”

“അയിന് നീയല്ലല്ലോ ഞാൻ, വെറുതെ നിന്നെ പോലെ മിണ്ടാണ്ട് ഇരുന്നാലേ എല്ലാവർക്കും ഡൌട്ട് മാത്രേ ഉണ്ടാകു.”