അഗ്നിപരീക്ഷ 1 [ദാസൻ] 74

” മോൻ ഇന്ന് വന്നേയുള്ളൂ ഉടനെ തന്നെ ടിക്കറ്റ് എടുത്ത് അവനെ പറഞ്ഞയക്കേണ്ട കാര്യം എന്ത് ”

ചേട്ടൻ പറഞ്ഞു.

” പോകാനുള്ള ഇടത്ത് പോയി കാര്യം നടത്തി വന്നാൽ പിന്നെ അവൻ ഫ്രീയല്ലേ. പിന്നെ ഇവൻ കുറച്ചു ദിവസത്തേക്ക് ഇവിടെ കാണും. അമ്മക്കും മോൾക്കും അവനെ കണ്ടു കൊണ്ടിരിക്കാം. ”

അങ്ങിനെ ഭക്ഷണത്തിന് ഇരിക്കുമ്പോൾ അമ്മയും ചേച്ചിയും വിശേഷങ്ങളൊക്കെ ചോദിച്ച് മനസ്സിലാക്കി. ചേട്ടൻ എന്നോട് ചോദിച്ചു.

” നാട്ടിൽ പോകുമ്പോൾ എന്തെങ്കിലുമൊക്കെ വാങ്ങേണ്ടേ. ആർക്കൊക്കെയാണ് അത് വേണ്ടത്. നാളെ രാവിലെ തന്നെ നമുക്കൊരു ഷോപ്പിംഗ് നടത്താം നിന്റെ ചേച്ചിയും കൂടെ വരട്ടെ ഇവൾക്ക് കുറച്ച് സെലക്ഷൻ ഒക്കെ അറിയാം. ആർക്കൊക്കെ എന്തൊക്കെ വാങ്ങണമെന്ന് കിടക്കുന്നതിനു മുമ്പ് നീയൊരു ലിസ്റ്റ് തയ്യാറാക്കു. ”

ഞാൻ മനസ്സിൽ കണക്കുകൂട്ടി അമ്മാവനും അമ്മായിക്കും പിള്ളേർക്കും ഡ്രസ്സുകൾ എടുക്കുക. കുറേ നാളുകൾക്ക് ശേഷം വീട്ടിൽ കിടന്നതിന്റെ സന്തോഷത്തിൽ പെട്ടെന്ന് ഉറങ്ങി. രാവിലെ ചേച്ചി വാതിലിൽ മുട്ടിയപ്പോഴാണ് എഴുന്നേൽക്കുന്നത്. പെട്ടെന്ന് തന്നെ പ്രാതൽ കഴിച്ച് ചേട്ടനും ഞാനും ചേച്ചിയും ഷോപ്പിങ്ങിനായി ഇറങ്ങി. അമ്മായിക്ക് സാരിയും സ്വപ്നക്ക് ഫ്രോക്കും അമ്മാവനും മറ്റു രണ്ട് ആൺപിള്ളേർക്കും ഷർട്ടിനുള്ള തുണിയുമെടുത്തു. മാധുവിന് എന്തെങ്കിലും എടുക്കണമെന്നുണ്ടായിരുന്നു പക്ഷേ, അവൾ സ്വീകരിച്ചില്ലെങ്കിൽ. ഇല്ല ഈ അവസ്ഥയിൽ ഒന്നു സംസാരിക്കാൻ പോലും അവസരം തന്നില്ല എന്നിരിക്കും. അതുകൊണ്ട് വേണ്ട. അങ്ങനെ നാട്ടിലേക്ക് പോകുവാനുള്ള അല്ലറ ചില്ലറ ഷോപ്പിംഗ് ഒക്കെ നടത്തി. ചേട്ടന്റെ നിർബന്ധത്തിൽ എനിക്ക് മൂന്ന് നാല് ജോഡി ഷർട്ടിനും പാന്റിനും തുണിയെടുത്തു. ചേട്ടന്റെ പരിചയത്തിലുള്ള തയ്യൽ കടയിൽ അടുത്തദിവസം വൈകുന്നേരം തരണമെന്ന് ഉറപ്പിൻമേൽ അടയാളവും കൊടുത്തു വീട്ടിലേക്ക് മടങ്ങി. യാത്രയിൽ ചേച്ചി എന്നോട് ചോദിച്ചു

” നീ പറഞ്ഞ കുട്ടിക്ക് എന്തേ ഒന്നും എടുക്കാതിരുന്നത്? ”

അതിന് ചേട്ടനാണ് മറുപടി പറഞ്ഞത്.

” ഇപ്പോഴത്തെ ഈ സാഹചര്യത്തിൽ ആ കുട്ടിയുടെ നിലപാട് എന്താണെന്ന് ഇവന് അറിയില്ലല്ലോ. അതിനു കൂടി വേണ്ടിയാണ് ഇപ്പോൾ ഇവൻ നാട്ടിൽ പോകുന്നത്.”

ചേട്ടൻ എന്റെ നേരെ തിരിഞ്ഞ്

“ഇനി നിന്നോട് ഞാൻ ഒരു കാര്യം പറയട്ടെ. ഇനി നീ ആ കുട്ടിയോട് സംസാരിച്ചിട്ട് അവൾ, നിന്റെ കൂടെ വരാൻ തയ്യാറാണെങ്കിൽ എങ്ങോട്ട് വിളിച്ചു കൊണ്ടുവാ. ഇവിടെ ഞങ്ങളൊക്കെ ഇല്ലേ.”

ഞാൻ കുറച്ചു നേരം വരെ ചേട്ടനെ തെറ്റായി ധരിച്ചു. ഇയാൾക്ക് ഞങ്ങളുടെ ബന്ധം വേർപെടുത്തിയിട്ട് എന്ത് നേട്ടത്തിലാണ് എന്ന് ചിന്തിച്ചിരുന്നു. ഇപ്പോൾ ചേട്ടൻ തന്ന ധൈര്യം എന്നെ അത്ഭുതപ്പെടുത്തി. ചേച്ചിയും പറഞ്ഞു